Heer Halewijn

Heer Halewijn (pronunsiada /hɪr haləʋæɪn/, simil a lfn "her halavain") es un nara de folclor de Nederland cual survive en un balada de folclor. An ce la varia prima primida de la canta apare sola en un antolojia publicida en 1848, la balada mesma dati a la sentenio 13 e es un de la baladas nederlandes con un sujeto antica la plu vea recordada. La fable de Halewijn es an plu vea e conteni elementos cual estende a la Eda carlin. Multe de sua temas mital estende a ante a lejendas germanica ante cristianisme.

La sujeto de la balada es simil en multe aspetas a alga cantas germanica cual ia sirculi Europa en la Eda Medieval, notable la balada engles May Colvin o False Sir John, e sua varias Lady Isabel and the Elf Knight. La lejendas es posible la prototipo per la lejende de Blue Beard ("Barbablu").

La nareta

Varias multiple de la nareta de Halewijn esiste. En tota, Halewijn es un om mal, un majiste, un demon, o un senior fein ci canta un canta majiosa. Cada fem joven ci oia esta canta es traeda a el e vade per encontra el en sua foresta, do el mata los. En un varia el destesti los, en un otra el toca los con sua spada majiosa cual cambia los a petra.

Un prinsesa (tipal sin nom, ma en un varia nomida Machteld) oia la canta e es traeda en la foresta per encontra Halewijn. En alga varias el conose sua reputa ma el ave un scema, en otras el es avertida cuando el pasea par un avia blanca. El encontra Halewijn e permete se per sede a sua encanta. Los vade con lunlotra a un campo de pendadores do el declara sua intende per mata el. Ma impresada par la belia de la prinsesa, el permete ce el eleje la forma de mori el prefere. La prinsesa eleje la destesta, ma suplica Halewijn per desvesti sua camisa afin sua sangue no ta manxa lo.

___

Maer trekt eerst uit uw opperst kleed.

Want maegdenbloed dat spreidt zoo breed, Zoot u bespreide, het ware my leed.

(Ma prima, desvesti tua roba esterna, car la sangue de un virjin sperde tan distante ce si lo ta manxa tu, lo ta es mea vergonia)

___

Halewijn pone sua spada a lado e comensa desvesti, cual ia es la scema de la prinsesa. En alga varias, cuando el desvesti sua roba supra sua testa, la stofa de la roba amorti la canta majiosa. En otras, cuando el trae la roba supra sua testa, el no pote plu usa sua regarda encantante. En otras plu, el turna a retro cuando desvesti. En tota varias, cuando el desvesti, la prinsesa velia de la encanta, el prende la spada e destesti Halewijn.

La prinsesa colie la testa e trae lo per reveni vinsente a sua propre casa. A la via, el encontra la madre de Halewijn ci demanda per sua fio. La prinsesa alora revela la mal fortuna de Halewijn. En la castel de la re, la testa es esibida e la nareta fini con un selebra grande. Un varia ajunta un nota cual dise ce la prinsesa ia resta nonsposida per sua vive intera, car no corteor pote egal la pasion ce el senti per Halewijn.

La balada

Het Lied van Heer Halewijn ("la canta de Senior Halewijn") es la balada rimante cual presenta la nareta de Halewijn e la prinsesa e cual dati a la Eda Medieval. Lo ia es prima arcivida sirca 1830 par Jan Frans Willems, ci ia combina fontes diversa, bocal e primida, en 40 strofes. La plu de la varia plu popular sutra la partes plu descrivente o alga senas nonesensal (pe la encontra con la madre de Halewijn), per corti la canta a sirca 20 strofes.