Gottfried Wilhelm Leibniz

Gottfried Wilhelm Leibniz (1 julio 1646 – 14 novembre 1716) ia es un filosofiste e erudita ci ave un loca importante en la istoria de matematica e la istoria de filosofia, car el ia developa la calculo integral e diferensial en modo nondependente de Isaac Newton. La sistem de scrive creada par Leibniz ia es usada de sua publici. El ia es un de la inventores la plu produosa en la campo de la calculadores mecanical.

En filosofia, el ia es plu conoseda per sua otimisme, pd sua conclui ce nosa universo es la plu bona cual Dio ia pote crea, un idea criticada par otras como Voltaire. Leibniz, en junta con René Descartes e Baruch Spinoza, ia es un de la tre defendores grande de la razonalisme en la sentenio 17.

Lebniz ia fa plu contribuis a fisica e tecnolojia, e ia previde ideas cual va apare a pos en filosofia, biolojia, medica e jeolojia. El ia scrive sur filosofia, politica, leges, etica, teolojia, istoria e filolojia.

Biografia

Gottfried Leibniz ia nase 21 junio 1646. Sua padre ia es un profesor de filosofia a la Universia de Leipzig. Gottfried peti ia es un jenio joven, natural, e ia reseta sua diploma dotoral a la eda de 20. El ia spende alga tempo viajante sirca Europa, probante cuasi tota filosofia cual la continente pote ofre el.

En 1672, el ia vade a Frans como un diplomata. Ala el ia comensa inventa calculo e un calculador cual pote multipli e divide. En 1676, el ia visita Spinoza en Nederland (do el ia leje la manoscrito per Etica), e alora ia vade a Hanover per servi la prinse ala. En 1700, el ia funda la Academia de Berlin.

La projeta major de sua vive ia es la reconsilia de catolicisme e protestantisme. El ia fali, clar. Lo ta nesesa multe plu ca jenio per reconsilia acel du!

Leibniz ia deveni plu e plu isolida e povre tra tempo, car el no ave un sponsor political. El ia mori en 1716, e sua funera ia es atendeda sola par sua secretor.

Teoria

Sua obra major en la rena de psicolojia, es Esajos nova sur comprende umana, un refuta de Locke scriveda en 1703 ma no publicida asta 1765.

Sua punto fundal ia es ce mente no es un tabula rasa, un tableta limpa pasiva sur cual esperia scrive, como Locke (e Aristotele) ia sujesta. La mente es un cosa complicada cual opera sur e muta esperia. "No cosa es en la mente cual no ia es en la sensa" el ia dise, parafrasente Locke, "estra la mente mesma". Esta ta inspira Kant e multe psicolojistes en tempos plu resente.

Leibniz ia sujesta ance ce en cuando nos es vivente, la mente es nunca intera a reposa, an en dormi profonda. En fato, lo es frecuente funsionante an cuando nos no es consensa de lo. Esta conseta de la nonconsensa ia influe multe Schopenhauer e, plu tarda, Freud.

Leibniz ia ave un metafisica multe noncomun. El ia comensa con la mesma tipo de seticisme como Descartes. Ma el ia fini con un metafisica idealiste el nomi monadolojia cual vade plu distante ca an la metafisica de Berkeley. Monades es spiritos individua. Cada spirito conteni en se la "persepi" de la universo intera. Lo no es la idea ce on ave un universo intera esta nosa spiritos cual tota de nos persepi como un ojeto - spiritos es tota cual esiste! Nos comun esperia nos mesma como interatante con otras - "monad a monad", on pote dise. Ma Leibniz esplica ce nos es sola parente interatante, cada de nos en nosa universo interna. Monades, el ia dise, es "sin fenetra".

Nos persepi consensosa sola un peti peso de esta universo interna - nosa "punto de vista". On no es conosente de la apare de la interna de mea stomaco, o de la pensas de un otra, o de cual es aveninte sur alga planeta jirante sirca Alfa de la Sentauro. Tota esta e plu es "en" me, ma es sola persepida nonconsensa.

An ce cada spirito ave sua propre "punto de vista", tota spiritos conteni la mesma persepi de la universo. Esta es cual el nomida armonia. Ma alga spiritos ave un vista plu clar, plu completa, plu consensa ca otras. Sola un spirito singular es intera consensa, e conteni tota "puntos de vista". Acel spirito es Dio.

Vide ance

Simboli de Leibniz

Lias esterna

(Polsce) Zbigniew Sepioł (2003): «Legal and political thought of Gottfried Wilhelm Leibniz»