Geras de Napoleon

De Vicipedia
Jump to navigation Jump to search

La Geras de Napoleon ia es un serie de disputas entre la Impero Franses e sua aliadas, gidada par Napoleon 1, contra la ordina flutuante de potias european unida en alias diversa, finansiada e usual gidada par Britan. La geras es frecuente categorida en sinco disputas.

Napoleon, pos deveni la Consul Prima de Frans en 1799, ia erita un republica tumultosa; el ia crea un stato con finansias stable, un burocratia forte e un armada bon instruida. En 1805, Osteraic e Rusia ia declara un gera contra Frans. En responde, Napoleon ia vinse la armada aliada rusce-osteraic en desembre 1805 en Austerlitz, cual on regarda como sua vinse la plu grande. En la mar, la briteses ia vinse la marina franses-espaniol en otobre 1805, securinte la controla brites de la mares e evitante un invade de Britan. La consernas prusen de un potia franses aumentante ia gida a la declara de gera en otobre 1806. Napoleon ia vinse la prusenes e, a pos, ia vinse Rusia en junio 1807, traente un pas noncuieta a la continente. La pas ia fali, e a du anios a pos, la gera ia comensa en 1809, e esta alia ia es rapida vinseda.

Esperante isoli economial Britan, Napoleon ia invade la penisola iberian, declarante sua frate como re de Espania en 1808. La espanioles e portugeses ia revolta con suporta brites, e, pos ses anios de lutas, ia espulsa la franseses de la penisola en 1814. A la mesma tempo, Rusia, no volente tolera la resultas de un comersia reduida, ia viole la sistem continental, fante ce Napoleon ia lansa un invade masosa de Rusia en 1812. La campania resultante ia fini con la disolve e retira de la Grande Armée. Corajida par la defeta, Prusen, Osteraic e Rusia ia comensa un campania nova contra Frans, vinsente Napoleon en modo desidente en Leipzig en otobre 1813, pos alga engranas nonconcluinte. Alora la aliadas ia invade Frans, caturante Paris a fini de marto 1814 e forsante Napoleon a renunsia en april temprana. Lo ia es escluida a la isola Elba, e la borbones ia es reinstituida a la potia. An tal, Napoleon ia fuji en febrero 1815 e ia regania la controla de Frans. La aliadas ia responde con la Alia Sete, vinsente Napoleon en modo defininte en la batalia de Waterloo en junio 1815 e escluinte el a San Helena.

La Congresa de Wien ia redesinia la fronteras de Europa, e ia trae un pas durante a la continente. La geras ia ave resultas profonda en la istoria global: lo ia coraji la estende de nasionalisme e libralisme, e ia vide la asende de la Impero Brites como la potia xef de la mundo; lo ia vide ance la promoves de nondepende en America Latina e la colasa de la Impero Espaniol, la reorganiza fundal de Deutxland e Italia en statos plu grande, e la institui de metodos nova de gera.