Galeno
Aelio Galeno o Claudio Galeno ia es un dotor medical, sirurjiste e filosofiste en la Impero Roman. La plu capas de la rexercores medical de Anticia, Galeno ia influe la developa de diversa disiplinas siensal, incluinte anatomia, fisiolojia, patolojia, farmacolojia e neurolojia, como ance filosofia e lojica.
Fio de Aelio Nicon, un arciteta rica con interesas erudita, Galeno ia resta un educa completa cual ia prepara el per un carera susedosa como mediciste e filosofiste. Naseda en Pergamo (oji Bergama, Turcia), Galeno ia viaja multe rapida ma a multe locas, esposante el a un varia grande de teorias e descovres medical ante abita a fini en Roma, do el ia servi a membros importante de la sosia roman e a fini ia es donada la posto de mediciste personal de diversa imperores.
La vide de Galeno sur anatomia e medica ia es xef influeda par la alora teoria corente de humorisme (ance conoseda como la cuatro humores) como ia avansa la medicistes elinica antica como Hipocrate. Sua teorias ia domina e ia influe la siensa medical ueste per plu ca 1 300 anios. Sua reportas anatomial, xef fundida sur disesioni de simias, spesial macacas, e porcos, ia resta nondisputada asta 1543, cuando descrive e imajes primida de disesionis umana ia es publicida en la obra influente De humani corporis fabrica par Andreas Vesalius do la teoria fisiolojial de Galeno ia es ajustada a la oservas nova. La teoria de Galeno sur la fisiolojia de la sistem de sirculi ia resta nondefiada asta s 1242, cuando Ibn al-Nafis ia publica sua libro Sharh tashrih al-qanun li’ Ibn Sina (Comenta sur la anatomia en la Canon de Avicena, en cual el reporta sua descovre de la sirculi pulmonal.
Galeno ia vide se mesma como ambos dotor medical e filosofiste, como el ia scrive en sua tese La plu bon mediciste es ance un filosofiste. Galeno ia es multe interesada en la debate entre la setas medical empiricaliste e razonaliste, a sua usa de la oserva direta, disesioni e vivisesioni representa un loca media entre la estremas de acel du puntos de vista. Multe de sua obras ia es conservada e/o traduida de la elinica orijinal, an si multe ia es destruida e alga cual ia es atribuida a el on crede ce los es nonvalida. An si on ave alga debate sur la data de sua mori, el no ia es plu joven ca setedes cuando el ia mori.
En la eda medieval, sua scrivedas sur anatomia ia es la sentro de la studias de universia de la dotores medical medieval, ma par la cade de la Impero Roman Ueste en la sentenio 5, los ia vide un stania inteletal. An tal, la Impero Bizantian e la califia abasi ia continua studiante e ajuntante avansas. Alga de la ideas de Galeno ia es noncoreta, car nunca ia disesioni un corpo umana par causa de es tabu en la sosia elinica-roman. En la eda medieval esta ia cambia e la studiantes de medica de Bologna ia comensa disesioni corpos, esente Mondi de Luzzi (s 1275-1326) la prima ci ia scrive un libro sur anatomia fundida sur disesioni umana.
La testos orijinal en elinica de Galeno ia ia gania importa denova en la eda moderna. En la desenio de 1530, la anatomiste e mediciste Andreas Vesalius ia tradui multe de la testos elinica de Galeno a latina. La obra plu conoseda de Vesalius, De humani corporis fabrica, ia es influida par la forma de scrive de Galeno.