Fusil
Un fusil es un aparato desiniada per propulsa un lansada usante presa o forte esplodente. La lansadas es tipal solida, ma pote ance es licuida compresada (pe en fusiles/canones de acua), o gas (pe fusil de gas lejera). Lansadas solida pote es libre volante (como con baletas e cartuxes) o liada (como con aturdadores eletrical, fusiles de lansia e fusiles de arpon). Un fusil de calibre grande es ance nomida un canon.
La metodos de propulsa de lansadas varia seguente la desinias, ma es tradisional realida pneumatical par un presa alta de gas contenida en un tubo de cano (cano de fusil), produida o par la combusta esotermal rapida de propulsantes (como con armas de foco), o par compresa macinal (como con fusiles de aira). La gas de presa alta es introduida a retro de la lansada, puiante e aselerante lo longo la longia de la tubo, donante un rapidia de lansa sufisinte per manteni sua viaja plu a la ojeto pos cuando la gas propulsante sesa ata a lo pos cuando lo sorti de la boca. Alternativa, armas de motor linial de conseta nova pote emplea un campo eletromagnetal per ateni aselera, en cual caso la cano pote es sustituida par reles gidante (como en fusiles de rel) o envolveda con un bobin eletromagnetal (como en fusiles de Gauss).
La aparatos prima identifiada como fusiles o protofusiles ia apare en Xina sirca 1000 EC. A la fini de la sentenio 13, los ia deveni "fusiles vera", armas de foco con cano de metal cual ia xuta lansadas singular cual ia bloci la cano. Polvo negra e tecnolojia de fusiles ia sperde tra Eurasia en la sentenio 14.