Foronido

De Vicipedia

Foronidos es animales de un filo peti con 20 spesies en du jeneras. Los ave la forma de vermes, ma con un tubo de dijesta cual turna se e sorti de la corpo prosima a la boca (no ocupante la longia intera de la corpo, como en anelidos). Los es trovada en tota mares, estra la artica e antartica. Los abita la mares a profondia de 0 a 70 metres (masima 400 metres). Los pote vive tra sirca un anio.

La adultes secrete tubos citinosa cual pote es enterada en la arena o fango, o resta supra la fondo de la mar o la rocas, en cual caso la foronidos tende vive en colonias con sua tubos liada e forminte un masa grande e nonpenetrable. Alga spesies pote disolve rocas, concas o molos de beton, per crea foras en cual los secrete sua tubos. Los come con un lofoforo (un strutur de silios sirca la boca).

An si los es normal longa (de 50 cm), foronidos es normal multe magra. Foronopse armeri, per esemplo, es longa de 20 cm, ma ave sola 3 mm de diametre. Multe spesies es plu corta ca esta, ma tota es multe magra. Forone ipocrepia ave sola 3 a 5 cm de longia, e Forone ovalis ave sola 6 mm. Foronos oval abita en colonias a la concas de ostras con asta 150 animales per cm cuadrida.