Flajelata

De Vicipedia
Jump to navigation Jump to search

Un flajelata es un selula o organisme con un o plu apendises nomida flajelos. La parola descrive ance un construi o nivel de organiza tipal de multe procariotas e eucariotas e sua modos de move. La parola no implica cualce relata o clasi de organismes cual posese flajelos.

La flajelos de eucariotas es suportada par microtubetas in un ordina spesifada, con nove duples fusada cual ensirca du microtubetas sentral. Estas estende de un corpo basal. In alga flajelatas, la flajelos move comedas en un sitosoma o boca, en cual la comeda es asorbada. Flajelos suporta comun capelas, nomida mastigonemes, o conteni bastetas. Sua ultrastrutur enata un rol importante en la clasi de eucariotas.

Entre protoctistes e animales microscopial, un flajetata es un organisme con un o plu flajetos. Alga selulas en animales pote es flajelatas, per esemplo la spermatozones de la plu filos. Plantas no produi selulas con flajelos, ma filises, moses, alges verde, e alga gimnospermas ave los. Simil, la plu de fungos no produi selulas con flajelos, ma la fungos primitiva "citrides" ave los. Multe protistes ave la forma de flajelatas de sola un selula.

Flajelos es plu comun usada per propulsa. En la plu de tal organismes, la flajelos es locida a o prosima a la anterior de la selula, per esemplo, en la euglenas. Comun, on ave un flajelo dirijeda a ante e un es estende a pos. Entre animales, fungos, e coanozones, on ave sola un flajelo posterior. Multe parasitos cual afeta la sania de umanas es flajelatas. E flajelatas es la consumantes major de produi prima e du en ecosistemes acual, consumante bateria e otra protistas.