Fibromialjia

De Vicipedia
Fatiga, un de la sintomes de fibromialjia (un depinta par Christian Krohg)

Fibromialjia es un disturba medical marcada par dole cronica e sperdeda con un responde alta de dole a presa. Otra sintomes inclui fatiga cual pote afeta ativia normal, problemes con dormi, e problemes con memoria. Alga persones ance reporta la sindrom de gamas ajitada, problemes con la intestines e vesica, nonsensosia e titilosia, e sensosia a ruido, lus briliante, o temperatur. Fibromialjia es comun asosiada con depresa, ansia, e la sindrom postraumal. Otra tipos de dole cronica pote es ance presente.

La causa de fibromialjia no es conoseda; ma on suspeta ce lo envolve un combina de fatores jenetica e ambiente, con cada ave un rol sinifiante. La disturba es comun en familias, e multe jenes es probable culpable. Fatores ambiente inclui stresa psicolojial, trauma, e alga infetas. La dole pare resulta de prosedes en la sistem sentral de nervos, e algas refere a lo como un "sindrom de sensosi sentral". Un metodo per diagnose spesifada no esiste. Diagnose envole prima la sutrae de otra causas posible e la serti ce la sintomes defininte es presente.

La trata de fibromialjia pote es difisil. Recomendadas inclui comun dormi sufisinte, eserse regulal, e comeda sana. Terapia cognosial-condual pote ance es aidante. La medisines duloxetin, milnasipran, o pregabalin pote es usada. La usa de medisin opiode es disputada, con algas sujestente ce la evidente es minimal, e otras ce opiodes debil pote es un posible si otra medisines no es efetosa. Ajuntas dietal ave ance suporta minimal. An si fibromialjia pote dura un tempo longa, lo no resulta en mori o dana a la texedas.

Fibromialjia es estimada como afetante 2-8% de la popla. Femes es afetada sirca du veses plu comun como omes. La proportios pare simil en areas diferente en la mundo e entre cultures diferente. Fibromialjia ia es prima definada en 1990, con criterios corentida en 2011. On ave debata sur la clasi, diagnose, e trata de la maladia. Algas sujeste ce la diagnose de fibromialjia pote afeta algun en un modo negative; otras sujeste ce lo es benefial. La parola "fibromialjia" es de latina nova fibro- ("texeda fibrosa"), elinica mio- ("musculo"), e elinica algos ("dole"), donce la nom sinifia leteral "dole de musculos e texedas fibrosa".