Falda

De Vicipedia
Jump to navigation Jump to search

Un falda es un veste cual covre un person de la taie, ance, o su la senos, a su. La longia de la falda depende multe de la cultur, la pais, la eda, tradisiones de moralia, la clase, e la stilo de la individua, e varia entre los cual ateni la solo e los cual apena covre la gluteos. En nosa eda moderna, faldas es tipal portada par femes e enfantes fema, an si a veses on pote vide omes portante los, como la cilt o falda scotes e otra esemplos etnical. A la plu simple, un falda pote es fabricada par un peso de stofa. Ma la plu de faldas es formida per prosima plu la ancas de la person ci porta lo. Supra la gamas, faldas plu comun estende per es plu plen, con esetas. Cosores usa plias, talias, insertas, etc, per crea la efetos desirada. Faldas moderna es tipal fabricada de stofas lejera o media, como coton, lino, denim, tricota, lana petenida, popelin. Faldas per femes nesesa a veses faldetas a su la falda.

Faldas ia es portada de edas preistorial como la modo la plu simple per covre la corpo basa. Figures produida par la cultur Vinca (sirca 5700-4500 aec) de la Balcanes de la comensa de la eda de cupre mostra femes en vestes como faldas.Un falda de palia texeda datida a 3900 aec ia es descovreda en Armenia a la compleso de cavas Areni-1.

Faldas ia es la vestes normal per omes e femes en tota cultures de Asia sude-ueste e en Egipte. La sumerianes en Mesopotamia ia porta kaunakes, un tipo de falda de pelo liada a un sintur. La parola "kaunakes" refere orijinal a la lana de oveas, ma ultima ia es aplicada a la veste mesma. Plu tarda, la pelos ia es reponeda par stofa cual ia imita la pelo lanosa de la oveta. La stofa ia es ance un simbol en icones relijiosa, como en la capo de pelo de Joan la Batiste.

La vestes de Egipte antica ia es fabricada xef de lino. Per la clases alta, los ia es bela texeda e detaliosa plisada. Sirca 2130 aec, en la Rena Vea de Egipte, omes ia porta faldas cual es un tipo de cilt, nomida la shendyt. Los ia es fabricada de un peso retangulo de lino envolveda sirca la corpo basa e liada a la fronte. Per la Rena Media, faldas plu longa, de la taie a la talo, e a veses pendeda de la axilas, ia deveni la moda. En la Rena Nova, ciltes con un parte triangulo e plisada ia deveni la moda per omes. Su estas, un shente, un covreseso triangulo la finis de lo liada con cordas, ia es portada.

En la eda de bronze, en Europa sude, un roba envolveda ia es prefereda. Ma en Europa norde, persones ia porta faldas con camisas.

En la eda medieval, omes e femes ia prefere vestes como robas. La parte basa de la robas de omes ia es multe plu corta ca los per femes. Los ia es larga e comun plisada o con insertas afin la monta sur cavalos va es plu comfortosa. An la armur de un cavalor ia ave un falda corta de metal su la armur de peto. Lo ia covre la bandas cual ia lia la armur de gamas a la armur de peto. Avansas tecnolojial en texe en la sentenio 13-15, como la texadores grande con pedales, e sisores con manicos e lamas pivotente, ia boni la fabrica de pantalones e calsones. Los ia deveni la moda per omes e de alora la moda normal per omes, e a la mesma ora, tabu per femes.

En la sentenio 19, la forma de faldas e robas per femes en cultures ueste ia varia multe. Los ia cade de su la senos en la "stilo de impero" (cual refere a la eda de Napoleon), e gradal moveda a la taie natural. Faldas ia es alga streta per un tempo, e alora ia crese multe a la stilos de la desenio de 1860, cuando faldas con anelos o stofa rijida cual estende los a la basa ia deveni la stilo, a alora la ajunta de cuxinetas supra la gluteos per asentua los deveni popular.

Comensante sirca 1915, la basas de faldas nonformal ia deveni plu corta. Faldas deveni corta en la desinia de 1920, plu longa per la desenio 1930, e alora plu corta (con la restrinjes de stofa en la geras), e alora longa denova, e final la plu corta posible sirca 1970 - la minifalda.

De la desenio de 1970, pantalones per femes ia deveni un eleje per femes per la plu de acasos. La longia de faldas es plu dependente de la desiras de la individua, e min de la esemplores de moda.