Etnojenese
Etnojenese (de elinica ἔθνος, etnico, e γένεσις jenese) es la formi e developa de un grupo etnical. Esta pote orijina par un prosede de autoidentifia, e pote ance aveni como la resulta de identifia de esterna.
La parola es un neolojisme de la sentenio 20, refere a la fenomeno oservable de la emerje de grupos sosial nova cual es identifiada como avente un identia coerente, pe, un grupo etnica en termas antropolojial. Siensas relatada no sola oserva esta fenomeno, ma xerca per un esplica de sua causas.
Etnojenese pote aveni pasiva, en la acumula de marcas de identia de un grupo creada par interata con la ambiente fisical, cultural, e relijial entre partes de un sosia, migras, e otra prosedes, per cual sudivide etnical es un resulta nonintendeda. Lo pote aveni ativa, en cual persones fabrica con intende identias separada en un atenta per solve un problem political - la preserva o imposa de alga valuas, potia, relatas, etc. De la sentenio 18 tarde, tal atentas ia es comun relatada a la revive de linguas o crea de un lingua nova, en cual deveni ultima un "leteratur nasional".
En la sentenios 19 e 20, sosias ia es menasada par la desusa de la naras cual ia furni lo a ante sua coere ia reveni a naras etnical o razal como un modo de manteni o reafirma sua identia comunal.
Etnojenese pote es promoveda per inclui o esclui cualce minoria etnical abitante en un nasion spesifada. En Frans, la politica integriste de la Republica Franses ia es incluinte; sua leges dise ce tota persones naseda o abitante legal en Frans ia es franses. La lege no ia distingui cualce categoria etnical o razal: tota persones en Frans ia es franses e deveni sitadanes de la Republica Franses su la lege.
Lingua[edita | edita la fonte]
Lingua ia es un modo per autentici identias etnical. La prosede de revive un identia etnica antica comun presente un problem, car linguas desusada tipal no ave espresas per esperias contemora. En Europa en la desenio de 1990, esemplos de promovores de revives ia es de la franjes celta en Cimri e nasionalistes en la paises euscara. Atentas par ativistes de la desenio 1970 per revive la lingua en Frans sude es un esemplo simil. E en Er, la revive de la lingua eres ia es parte de la reclama de la identia eres en la republica.
En la sentenio 19, la Duxia Grande de Suomi de la promove Fennoman ia atenta leva la lingua suomi de un lingua de campanianes a la rol de un lingua ofisial nasional, en loca de sveria, cual ia es la lingua ofisial per un tempo longa. La Fennomanes ia institui la Partito Suomi per ateni sua goles nasionaliste. La publica en 1835 de la epica nasional de Suomi, la Kalevala, ia es la funda de etnojenese suomi. Suomi ia es reconoseda como la lingua ofisial de Suomi sola en 1892. La Fennomanes ia es oposada par la Svecomanes, gidada par Axel Olof Freudenthal (1836–1911). El ia suporta la continua de usa de svensce como la lingua ofisial; lo ia es un lingua de un minoria, usada par la elite educada en governa e dirije. Seguente la teorias raziste de la eda, Freudenthal ia crede ce Suomi ave du "razas", un ci parla sveria e la otra suomi. La Svecomanes ia declara ce la "raza germanica" de la svensces ia es superior a la popla suomi.
En Beljia, lingua ia es un forte importante e dividente entre la flames (nederlandes) e la walones (franses) de la crea de la rena en 1831. Suiz es divideda entre la deutscheschweizer (parlores de deutx), conta la romandes e arpitianes (franses), la lombardes (italian), e la parlores de rumans en la sude e este, ma los continua funsiona en un modo acordante.
En Italia, on ave diferes etnolojial e linguistica entre multe grupos rejional, de la lombardes a la norde a la sisilianes a la sude. Tereno montaniosa ia permete la developa de comunias relativa isolida e multe dialetos ante la uni de la nasion en la sentenio 19. Asi, la lingua ofisial nasional ia tende es adotada par la plu de sitidanes.
Relijio[edita | edita la fonte]
La marcas cultural cual acompania cada de la relijios major pote deveni un parte de identias etnica distinguinte. Seguores de cristianisme, iudisme, islam, e hinduisme ia es aliniada istorial con etnicos (e plu tarde nasiones) ci parla linguas diferente e con cultures diferente cual developa sur la funda de la linguas cual seguores de cada relijio ia favori istorial: latina, ivri, arabi, e sanscrito.
La linia entre un seto relijiosa bon definada e un etnico unica no pote sempre es clar definada. Setos cual la plu de oservores ta aseta como composante un etnico separada ave plu comun, a minima, un colie de regulas firma relatada a la manteni de endogamia, condenante los ci sposi esta la seto o no eleva sua enfantes en la relijio coreta. Esemplos pote inclui la iudis, amix, druze, mormones, sices, iazidis, e zoroastristes.
Jeografia[edita | edita la fonte]
Fatores jeografial pote resulta como isola cultural e jenetical de sosias umana plu grande. Grupos cual abitua en areas distante e intersposi per jeneras va oteni cualias diferente, cultural e jenetical, cual evolui de la continui cultural e la interata con sua ambiente unica. Etnojenese en esta casos resulta tipal en un identia cual es min cargada con valua ca un identia creada en contrasta con un popla competente. Spesial en popla pastoral de areas montaniosa, organiza sosial tende depende xef de identifia familial, e no un identia coletiva plu estendeda.