Esopo

De Vicipedia
La comensa de la edita italian de Aesopus Moralisatus

Esopo (sirca 620 - 564 aec) ia es un naror de fables, cual ia es atribuida a el tra la sentenios, an si sua autoria no es sabeda. La naras es, como un colie, conoseda como la Fables de Esopo. La fables ia es traduida a multe linguas e amirada como lesones de moralia o, a min, de astutia. Multe de la fables inclui animales cual pote parla, solve problemes, e ave jeneral la cualias de umanas. An si lo es probable ce Esopo ia esiste, la detalias de sua vive es nonserta.

Un nara sur sua vive, nomida "la romanse de Esopo" , presenta un descrive de Esopo cual ia deveni tradisional. Lo inclui un descrive de lo como un sclavo (probable coreta) cual ia es multe fea e malformida (posible, ma no serta). La referes la plu alta, incluinte lo par Aristotele, sujeste ce el ia veni de un site en Tracia sur la costa de la Mar Negra. Otras sujeste Frigia, Samos, Sardis, o Lidia.

Aristotele e Herodoto ia sujeste ce lo ia es un sclavo en Samos, e sua mestres ia es prima un om nomida Xanto, e alora un nomida Iadmon. Los ia dise ce Esopo ia es librida a un punto en sua vive, car es ia servi como un avocato per un om rica. Los ia dise ance ce el ia vade a Delfi sur un mision per Re Creso de Lidia, en cuando el ia insulta la sitadanes e ia es condenada per fura de un templo, per cual el ia es lansada de un presipe. Studiantes de la periodo nota ce la datis de esta avenis e la referes en alga de la naras no acorda, e ce la plu (o tota) de la racontas es imajinal.

Ma Esopo ia es multe famosa en Elas antica, e sua fables ia es lodada par multe persones cual nos pote fide. La fables ia es recordada par eruditas como Socrate e Sofocle, e traduida a latina par autores bon conoseda de Roma. Ma serta la fables ia continua es traduida, complicada, e alterada per sentenios, un multe plu ia es simple ajunta a la colie su sua nom.

En la eda medieval, la idea ia es introduida ce Esopo ia es no sola fea, ma ance negra. Multe autores ia crede ce la nom Esopo es un varia de Itiopia, e posible esta es la fonte de la idea. Ance, la lia en la mentes de alga europeanes e americanes entre sclavia e negria probable ance ajunta a la idea. Lo serta es posible ce el ia es negra (la mediteraneo de antica ia es multe multicultural!), ma la lia entre sua nom e Itiopia es falsa.

Un lista de alga de la fables atribuida a Esopo: