Ecidna

De Vicipedia
Ecidna de beco corta
Ecidna de beco longa

Ecidnas parteni a la familia Tacigloside de mamales ci pone ovos. La cuatro spesies esistente de ecidnas e ornitorincos, es la sola membros survivente de la ordina Monotremato. Ecidnas abita en Australia e Gine Nova. Cuando matur, un fema pote pesa asta 4.5 kg, e un mas asta 5 kg. La longia de vive de un ecidna savaje es estimada como 14 a 16 anios. A sirca 33º C, la ecidnas ave un temperatur de corpo ativa plu basa ca la ornitorincos, ci ave la temperatur plu basa de tota mamales.

Ecidnas ia evolui entre 20 e 50 milion anios a ante, desendente de un monotremato plu simil a un ornitorinco. Esta asendente ia es acual, ma la ramo cual produi la ecidnas ia ajusta a vive sur tera. La ecidnas es nomida per Ecidna, un carater mitolojial ci ia es dui fem e dui serpente, car la animal ia es persepida como ave la cualia de mamales e retiles.

Los ave gamas corta e forte con garas grande, e los es cavores potiosa. Sua garas a sua gamas posterior es longida e curvida a retro per aida en escava. Ecidnas ave bocas peti e mandibulas sin dentes. Los come par rompe abrida troncos mol, montones de formicas, etc, e donce usa sua lingua longa e aderente, cual protende de sua beco, per colie la preda. La ecidna de beco corta come xef formicas e termitas, e la spesies de beco longa come tipal vermes e larvas de insetos. Ambos spesies no ave dentes e rompe sua comedas par mole los entre sua lingua e la fondo de sua bocas.

La saison de reprodui comensa en junio tarda e estende tra setembre. La mases crea linias de asta 10 individuas, la plu joven a la fini, cual segue la fema e atenta copula, un ativia nomida la sistem de "tren". Mases ave 4 penises, e usa du a un ves, cambiante cual es usada cada atenta. La femas ave du dutos de reprodui, e ovuli es stimulada par la spinos peti de la penises de la mas.

La fema pone sola un ovo cuorin, con un casca mol, 22 dias pos copula, e pone lo direta en sua pox. Cuando lo emerji, la bebe abri la casca con un "dente de ovo", simil a lo de retiles. Los emerji pos sirca 10 dias de jesta. La bebe nase en un forma larvin e fetin, e el suca lete de la pores de la du pesos de lete (monotrematos no ave tetas), e resta en la pox per 45 a 55 dias, cuando lo comensa developa un spino dorsal. La madre escava un tunel "enfanteria" e pone la joven, reveni cada 5 dias per teti lo asta sirca 7 menses. La enfante resta con sua madre asta un anio ante parti.