Dublin

De Vicipedia
Jump to navigation Jump to search
Vista par satelite de Dublin
La Castel Dublin
La libreria de la Universia de la Trinia

Dublin (eres: Baile Átha Cliath, pronunsia aprosima: balia aha clia) es la site capital e la plu grande de Er. Lo es situada a un baia a la costa este a la boca de la Rio Liffey, en la provinse de Leinster. Lo ave plu ca un milion abitantes, e sirca du milion en la area urban cual conteni Dublin, en 2016.

La nom Dublin deriva de la parola eres Dubhlin, de dubh, cual sinifia negra o oscur, e lin per stange, e refere a la stange mareal oscur, locada do la Rio Poddle entra la Rio Liffey, pos la Castel Dublin.

La area de la Baia Dublin ia es abitada par umanas de edas preistorial. Ptolemeo ia refere a un colonia prosima ala en sirca 140 ec, e nomida lo Eblana polis.

Lo ia es colonida par cristianes, ci ia nomi lo Duibhlinn. La vicinges ia entra la area sirca 841, e nomida lo Dyflin. En la sentenios 9 e 10, on ave du colonias cual ultima deveni Dublin. La nara temprana eres, Táin Bó Cúailnge (la fura de la boves de Cooley), refere a "Dublin, nomida Ath Cliath".

La Rena de Dublin ia es fundida como un colonia de la vicinges en la sentenio 10 e, an si lo ia es atacada multe veses par la eres nativa, lo ia resta controlada par la vicinges asta la invade norman, cual ia es lansada de Cimri en 1169. Re Henry 2 de England ia afirma sua controla par comanda un invade plu grande en 1171, e ia clama se "senior de Er". La Castel Dublin ia es fundida en 1204 como un fortres major par John, re de England.

Seguente la asinia de la Senior Maior prima de Dublin en 1229, la site ia estende e ia ave sirca 8000 persones a la fini de la sentenio 13. Dublin ia flori como un sentro de comersia, an con la atenta par re Robert 1 de Scotland per catura la site en 1317. El resta como un site relativa peti en la sentenio 14 e ia es menasada constante par la clanes eres ci ensirca lo.

En 1348, la Moria Negra, un pesta matante cual ia ruina Europa, ia ateni Dublin e ia mata miles de la desenio seguente.

Dublin ia deveni asorbeda su la Corona Engles como "la Pale", un banda streta de colonias engles longo la borda de la mar a la este. La concista de Er intera par la Tudores en la sentenio 16 ia crea un eda nova per Dublin, con la site joia un importa renovida como la sentro de rena dirijente en Er. Rea Elizabeth 1 de England ia intende ce Dublin deveni un site protestante, e donce funda la Universia de la Trinia en 1592 como un universia tota protestante, e comanda ce la catedrales catolica - la Catedral de San Patrico e la Catedral de Eglesa de Cristo - deveni protestante.

La site ia ave sirca 21,000 en 1640 ante un pesta en 1649 a 1651 ia mata cuasi dui de la abitantes de la site. Ma la site ia flori denova pronto a pos como la resulta de la comersia de lana e lino con England. Lo ia ateni un cuantia de popla de plu ca 50,000 en 1700.

De la sentenio 17, la site ia estende rapida e ia es, per un tempo corta, la site du en grandia en la Impero Brites ante la Atas de Uni en 1800. Seguente la parti de Er en 1922, Dublin ia deveni la capital de la Stato Libre Eres, plu tarda renomida Er.

Dublin es un sentro istorial e contempora per educa, arte, governa, e industria. De 2018, la site ia es listada par la Rede de Rexerca de Globali e Sites Mundal (cortida a GaWC en engles) como un site global, como un de la tre-des sites la plu bon en la mundo.

Dublin ia selebra sua milenio "ofisial" en 1988, cual indica ce la governa de Er ia reconose 988 como la anio en cual la site ia es colonida e ce esta colonia prima va deveni plu tarda la site de Dublin. La site es plu vea ca esta, ma 988 (o 989) es suposada la anio en cual la re norsce de dublin ia reconose la re alta de Er, ia comensa paia imposta, e ia aseta la leges eres.