Dinastia Xia

De Vicipedia
Jump to navigation Jump to search
Yu la Grande, imperor prima de la dinastia Xia
Mapa de la dinastia Xia de Yu la Grande, con un indica de la deluvia grande de lejenda

La dinastia Xia es la dinastia prima en istoriografia tradisional de Xina. Seguente tradision, la dinastia Xia ia es instituida par la imperor lejendal Yu la Grande, cuando Imperor Shun, la imperor final de la sinco imperores de antica, ia dona la trono a el. La Xia ia es plu tarda segueda par la dinastia Shang.

No arcivos contempora de la Xia esiste, e los no es notada en la testos la plu vea de Xina, car la enscrives de osos oraculal dati de la periodo de la dinastia Shang (sentenio 13 aec). La notas la plu temprana aveni en la capitales la plu vea de la Libro de Documentos, cual reporta parlas de la periodo Zhou ueste temprana, e es asetada par la plu de eruditas como dati de acel eda. Esta parlas justi la concista par la Zhou de la Shang como la pasa de la Comanda de Sielo, comparante lo a la susede de la Xia par la Shang. Esta filosofia political ia es promoveda par la scola confuziste en la periodo de Zhou este. La seguente de dinastias ia en incluida en la Arcivos anial de bambu e la Arcivos de la Istoriste Grande, e ia deveni la disposa ofisial de istoriografia e ideolojia imperal. Alga eruditas considera la dinastia Xia como mitolojial, o a min nonsuportada, cuando otras identifia lo con la cultur de Erlitou arceolojial.

Seguente la cronolojia tradisional, fundida sur calculas par Liu Xin, la Xia ia rena entre 2205 e 1766 aec; seguente la cronolojia fundida sur la Arcivos anial de bambu, lo ia rena entre 1989 e 1558 aec. La Projeta de Cronolojia de Xia-Shang-Zhou, encargada par la governa de Xina en 1996, ia conclui ce la Xia ia esiste entre 2070 e 1600 aec.

Arceolojistes ia descovre sites, utiles de bronze, e tombas cual indica la esiste posible de la dinastia Xia a la locas sitada en la testos antica. Los debate esce la cultur de Erlitou ia es la site de esta dinastia. Dati radiocarbonal ia sujesta ce la loca es de 2100 a 1800 aec. En 1959, un loca en la site de Yanshi ia es escavada cual conteni palasios grande cual alga arceolojistes sujesta pote ia es la capital de la dinastia Xia. Alga locas arceolojial ia es trovada a la locas sitada en la testos antica. A min, la eda tradisional nomida la dinastia Xin marca un nivel de evolui de la cultures neolitica e la sivilia urban de la dinastia Shang.

La istoria tradisional trasa la developa de la Xia a la tre renores e la sinco imperores. Ante la institui de la Xia dinastia, batalias ia es comun entre la tribus de la area. La tribu Xia ia developa lente en la rena de Zhuanxu, un de la sinco imperores, e la arcivos antica dise ce Yu la Grande ia es la neto de Zhuanxu.

Un nara mitolojia esplica la comensa de la dinastia par refere a Gun, la padre de Yu la Grande. Cuando la Rio Huanghe (acc la Rio Jala) ia inonda la rejion, multe tribus uni per controla la inonda. Gun ia es encargada con la taxe par Imperor Yao. Gun ia comanda la construi de paradeluvias grande, ma, pos nove anios, lo no ia susede. Yu, la fio, ia es encargada par Imperor Shun per completa la taxe, ma sua metodo ia difere de lo de sua padre: el ia organiza persones de tribus variosa e ia comanda los per aida en la construi de canales de tota rios major cual ia inonda la rejion per condui la acua a la mar. El ia susede, e sua susede ia permete la crese de produi de la cultiverias. Esta resulta en la crese de la potia de la tribu Xia, e Yu ia deveni la xef de tota tribus de la rejion.