Diftongo

Un diftongo es un combina de du vocales, con un de los espresada plena e la otra prosiminte un semivocal, plu comun "i" ([j]) or "u" ([w]). En elefen, per esemplo, la diftongos permeteda es "ai", "au", "eu", e "oi". En otra linguas, on pote trova diftongos como "ei", "ou", "iu", e "ui". Diftongos esiste ance con la semivocal a la comensa - "ue" o "io", per esemplo. Final, alga linguas ave diftongos en cual la vocal du es sentral. Anglo-saxon e frisian, per esemplo, ave diftongos scriveda "oa" e "ea", en cual la "a" represente la sona de la xva ([ə]).

La diftongos en lfn es multe rara:

• "Ai" apare en alga parolas como "aida", "aira", "bait", "mais", "naive", "saisi", e "saison". Lo apare ance en la prefisa "airo-", derivada de la parola "aira".
• "Au" es la diftongo la plu comun en elefen. Lo aveni en "auto", "audio", "causa", "cauta", "cauxo", "flauto", "lauro", "nausea", "pausa", e "trauma". Lo pote es trovada ance en parolas con la prefisa "auto-" e la sufisa "-sauro".
• "Eu" es trovada en un cuantia peti de parolas, como "euro", "feudo", e "neutra". Plu comun, lo aveni en prefisas elinica en parolas siensal: "eu-", "leuco-", "neuro-", "pneumo-", "pseudo", e "reumato-".
• "Oi" es la plu rara de la diftongos. Lo aveni en parolas como "boicota", derivada de engles. Lo es trovada ance en parolas siensal cual conteni la sufisas elinica "-oide" e "-noide".

Elefen ave ance un cuantia peti de parolas composada o con prefisas o sufisas en cual, an si du vocales aveni la un pos la otra, los es pronunsiada separada. Per esemplo, "eroina" es pronunsiada "ero-ina", con cuatro silabas, e "reuni" es pronunsiada "re-uni", con tre silabas. La pronunsias spesial es indicada en la disionario.