Diabete (tipo 2)

Comunia de diabete en la mundo en 2000. La promedia mundal ia es 28 per 1000 abitantes.

  no data

  ≤ 7.5

  7.5–15

  15–22.5

  22.5–30

  30–37.5

  37.5–45

  45–52.5

  52.5–60

  60–67.5

  67.5–75

  75–82.5

  ≥ 82.5

Diabete tipo 2 es un maladia metabolal de dura longa cual es marcada par glucosa sangual alta, resista a insulin, e un manca relativa de insulin. Sintomes comun inclui polidipsia (sidia aumentada), poliuria (urina frecuente), e diminui de pesa sin esplica. Sintomes pote ance inclui polifajia (famia aumentada), un senti de fatiga, vide neblosa, pruri, infetas vajinal, neuropatia periferial, e ulseras cual no remedia. Sintomes veni comun lenta. Complicas de dura longa de glucosa alta inclui maladias de cor, atacas serebral, retinopatia diabetica (cual pote resulta en siecia), nefropatia (fali de la renes), e flue debil de sangue en la membros (cual pote resulta en amputas). La comensa subita de un state de coma hiperosmolal hiperglisemica (multe alta glucosa cual causa presa sangual basa e diminuida consensa) es posible. Lo es ance asosiada con un risca plu alta de la maladia de Alzheimer e dementia vasculal.

Diabete tipo 2 aveni xef como la resulta de obesia e manca de eserse. Alga persones ave riscas jenetica plu grande ca otras. Diabete tipo 2 composa sirca 90% de casos de diabete, con la otra 10% es composada de diabete tipo 1. En diabete tipo 1, on ave un grado plu basa de insulin per controla glucosa, la resulta de un perde de selulas beta de la pancreas per la produi de insulin, induida par un autoimunia. Diagnose de diabete es par esaminas de sangue como glucose plasmal junante, proba oral de tolera de glucosa, o hemoglobin glucatada (A1C)

Diabete tipo 2 es partal prevenable par resta a un pesa normal, eserse regulal, e come coreta. Trata inclui eserse e cambias de nuri. Si la grados de glucosa sangual no es sufisinte basida, la medisin metformin es tipal recomendada. Multe persones pote ultima nesesa injetas de insulin. Per persones ci debe usa insulin, la esamina de grados de glucosa es avisada. Sirurjia bariatrica pote es sujesteda per boni diabete en los ci es obesa.

Frecuentia de diabete tipo 2 ia crese forte pos 1960, paraleli la crese de obesia. En 2015, sirca 392 milion persones ia es diagoseda como avente la maladia, comparada con sirca 30 milion en 1985. Tipal, lo comensa en adultia media o vea, ma la frecuentia de diabete tipo 2 es cresente en persones plu joven. Lo es asosiada con un espeta de longia de vive plu corta par des anios.

Diabete ia es un de la maladias prima descriveda. La importa de insulin en la maladia ia es determinada en la desenio de 1920.