Deserto Namib

De Vicipedia
Jump to navigation Jump to search
Namib desert MODIS.jpg

La Namib es un deserto en Africa sude-este a la costa de la Mar Atlantica. La nom Namib es de orijina nama e sinifia "loca enorme". Seguente la defini la plu larga, la deserto estende tra plu ca 2000 cilometres longo la costas atlantica de Angola, Namibia e Sudafrica. La parte la plu norde, cual estende tra 450 cilometres, es conoseda como la deserto Moçâmedes de la frontera entre Angola e Nomibia, e la parte la plu sude prosimi a la deserto Kalahari.

A este de la costa atlantica, la Namib asende gradal, ateninte un altia de 200 cilometres a la pede de la Presipe Grande. La presipita anial varia de 2 milimetres en la rejiones la plu seca asta 200 milimetres a la presipe, tal ce la Namib es la sola deserto vera en Africa sude. Pos dura un state seca o semiseca tra sirca 55–80 milion anios, la Namib es cisa la deserto la plu vea de mundo, e lo conteni alga de la rejiones la plu seca de mundo.

La jeolojia de la deserto es composada de dunas prosima a la costa, con ce plu interna on trova planos de calculos e montes de loca a loca. La dunas, de cual alga ave 300 metres de altia e 32 cilometres de longia, es numero du de la plu grandes de mundo pos los de la Deserto Badain Jaran en Xina.

Temperatures longo la costa es stable, jeneral con varia anial entre 9 e 20 °C, ma temperatures plu interna es variable: la temperatur en un dia de estate pote esede 45 °C, e notes pote es jelada. Neblas orijinante de la colide de la fria de la Corente Benguela e aira calda de la Selula Hadley crea un zona de nebla cual covre frecuente partes de la deserto. Rejiones costal pote esperia plu ca 180 dias de nebla densa en un anio. An si esta es un peril major per barcones (on ave plu ca mil ruinas longo la Costa de Sceletos), lo es un fonte esensal de umidia per viventes desertal.

La Namib es cuasi intera nonabitada par umanas estra alga viletas peti e grupos pastoral nativa. Par causa de sua anticia, la Namib conteni cisa plu spesies endemica ca cualce otra deserto de mundo. La plu de la viventes desertal es artropodos e otra animales peti cual survive con poca acua, an si animales plu grande abita la rejiones norde. Prosima a la costa, la acua fria de mar es rica con pexes e suporta poplas de otarios brun e avias costal, cual deveni la preda de la leones de la Costa de Sceletos.