Democratia sosial

De Vicipedia
Jump to navigation Jump to search

Democratia sosial es un ideolojia political, sosial, e economial cual suporta intervenis per promove justia sosial en la strutur de un politica libral e un economia capitaliste. La protocoles e normas usada per ateni esta envolve un dedica a democratia representante e partisipante; taticas per redistribui de revenu e regula de la economia per la benefica jeneral; e furnis per la bonstate par la stato. Democratia sosial en esta modo atenta crea la situa en cual capitalisme pote resulta en plu democratia, plu egalia, e plu solidaria. Un resulta de la governas par partitos de democratia sosial e sua influe a la developa en la nasiones de Scandinavia, la ideas ia deveni plu popular en multe otra nasiones.

Democratia sosial ia orijina como un ideolojia political cual ia promove un evolui de capitalisme a sosialisme par usa prosedes political establida, contrastante con la metodo de revolui asosiada con Marxisme ortodox. En la periodo pos la gera en Europa ueste, paritos sosial democrata ia rejeta la model Staliniste alora corente en la Uni Soviet. En esta periodo, democratas sosial ia abrasa un economia miscada fundida sur la continua de posese privata, ma con un grado de servis publica. Como un resulta, democratia sosial ia deveni asosiada con economica keynesiste, interveni par la stato en la prosedes capitaliste cuando nesesada, e aida sosial, sin la gol de recambia la sistem capitaliste.

Democratia sosia moderne es marcada par un dedica a politica dirijeda a la redui de nonegalia, opresa de grupos min vantajosa, e povria, incluinte suporta de servis publica asedable universal como aida per la vea, enfantes, educa, nesesas medical, e compensa per laborores. Lo es comun asosiada con sindicatos, la promove ecolojial, diretos egal per femes e minorias razal, relijiosa, e sesal, etc.

Otra sosialistes sujeste ce politicas de servi publica promoveda par democratia sosial no pote solve la problemes strutural de capitalisme, como flutuas siclical, esplota de laborores, e aliena. La asentua sur servi publica sola legali e estende la sistem de esplota de capitalisme e la diminui de la sosia e la bonstate de la popla.