Corvo

De Vicipedia
Jump to navigation Jump to search
Un corvo american
Un corvo de casa de Bangalor, India

Corvos es membros de la jenera Corvus de avias en la familia Corvide. Los es un grupo multe susedosa, bon ajustada a abituas variosa e a la presente de umanas. La jenera "corvo" inclui, en ajunta a la multe spesies cual usa la nom "corvo", ance corvones (Corvus corax), gralias (Corvus frugilegus), e monedulas (Corvus monedula). Los es relatada prosima con otra jeneras de la familia Corvido, como jaies, crasenozas, e pigas.

La grandia de corvos estende de monedulas peti (como pijones) a la corvon comun de la rejion holoartica e la corvon con beco spesa de Itiopia. La 45 membros de esta jenero abita sur tota continentes temperada estra America Sude e alga isoas. La membros de la jenero ia evolui probable en Asia, e la corvide probable en Australia.

La plu de spesies de corvos es tota negra o negra con alga plumas blanca o gris. Los es spesa con becos e gamas forte. La difere entre mases e femas es minimal. Los es omnivore con un dieta multe diversa. Los ta come cuasi cualce cosa, incluinte otra avias, frutas, nozas, moluscos, vermes, semes, ranas, ovos, avietas, muses, e caronia.

Corvos congrega en reposerias grande e comunial en cuantias entre 200 e multe miles de individuas en la menses estra los per reprodui, spesial en la inverno. Esta congregas tende aveni prosima a locas con grande colies de comedas, como montones de dejetadas e sentros comersial.

Multe avenis es arcivida de corvos juante. Multe siensistes vide jua como un cualia esensal en animales intelijente. Rexerca resente ia trova ce alga spesies es capas de no sola usa de utiles, ma ance la construi de utiles. Corvos es aora considerada entre la animales la plu intelijente en la mundo. Los ave un proportio de ensefali egal a multe primates nonumana. Alga gralias e monedulas ave un cuantia de nidopalio egal proportial como la neocortexes de umanas e ximapanzis, e plu ca los de gibones.

En ajunta a jua, los ia es trovada partisipa en ativias como asconde e reserva comedas tra saisones, e un memoria per episodos. Los ia mostra la capas per distingui umanas individua par reconose fases. Los es un de la poca animales nonumana capas de comunica sur cosas cual no es presente spasial o tempal. Sola abeas e formicas mostra esta capasia ance. Corvones ia es oservada enscrive otra corvones a locas grande de come, como la corpos mor de animales grande.

En folclor e mitolojia, corvos es comun asosiada con moria, posible como un resulta de sua coloor e atrae a caronia. Los es comun presentada como intelijente e como furnintes de informa. En mitos, los apare frecuente como "trucores", pd spiritos cual usa trucos e ruses per engana umanas o otra dios.