Copepodo

De Vicipedia
Jump to navigation Jump to search
Copepodos
Filogram de ordinas de copepodos [1]

Copepodos es un grupo de crustaseos peti trovada en cuasi tota abitadas de acua dulse o sal. Alga spesies es planctonal (vagante en mares), algas vive sur la leto de mares, e alga spesies continental pote vive en pantanes, forestas mol, lagetas, stanges, etc. Multe vive sutera en cavas maral o de acua dulse, dolinas, o la letos de rietas.

Como otra crustaseos, copepodos ave un forma larval. Per copepodos, la ovo emerji con la forma con testa e coda, ma no torax o adomen vera. La larva muta alga veses asta lo semble la adulta e alora, pos plu mutas, lo ateni adultia.

Copepodos varia multe, ma es tipal un o du mm de longia, con un corpo la forma de un larma e antenas grande. Como otra crustaseos, los ave un esosceleto blindada, ma los es tan peti ce, en la plu de spesies, esta armur magra e la corpo intera es cuasi tota transparente. Alga copepodos polal pote ateni un cm. La plu ave un sola oio composada, tipal roja briliante e en la sentro de un testa transparente. Spesies suteran pote es sin oios. Como otra crustaseos, copepodos ave du duples de antenas, con la prima tipal longa e fasil persepable.

Car los es tan peti, copepodos no nesesa un cor o sistem de sangue (sola la membros de la ordina Calanoida ave un cor, ma no dutos sangual). La plu copepodos no ave brancias; en loca, los asorbe osijen direta en sua corpos. La plu de copepodos cual vive autonom come direta sur fitoplancton, caturante selulas individua. Un sola copepodo pote come asta 373,000 fitoplanctones en cada dia.

Sirca dui de la estima de 13,000 spesies de copepodos es parasital e ave corpos multe mutada. Los lia se a pexes ososa, selacos, mamales maral, e multe tipos de nonvertebratos como moluscos, tunicatos, o corales. Los vive como endoparasitos o ectoparasitos sur pexes o nonvertebratos en acua dulse e en abitadas maral.

  1. Khodami, S., McArthur, J.V., Blanco-Bercial, L. and Arbizu, P.M. (2017) "Molecular phylogeny and revision of copepod orders (Crustacea: Copepoda)". Nature: Scientific Reports, 7(1): 1–11.