Congresa de Verona
La Congresa de Verona en novembre 1943 ia es la sola congresa de la Partito Faxiste Republiciste Italian, seguor de la Partito Nasional Faxiste. En acel tempo, la Partito Faxiste Republiciste ia governa la Republica Sosial Italian, un stato faxiste comensada en Italia norde a pos la governa italian ia suscrive un sesaspara con la Aliadas e ia fuji a Italia sude. La Republica de Saló ia es un stato pupetin deutx e la plu de la politicas interna e esterna ia es ditada par comandores militar deutx. An tal, faxistes italian ia es permeteda ave autonomia. Lo ia es su esta condisionas ce los ia organiza la Congresa de Verona, parente per desinia un via political nova e per rejoveni la promove faxiste. La disposa de la faxistes italian a la iudis ia cambia pos la Congresa de Verona, cuando la autoria faxiste ia declara los como "nasionalia enemin" e ia comensa partisipa ativa en sua persegue e aresta.
Proposas fada
[edita | edita la fonte]La Congresa ia produi declaras, proposa e desides variosa, plu de cual nunca ia es enforsada par causa de la gera e de la ocupa deutx. Seguente la istoriste Peter Neville, la delegadas faxiste en la congresa ia conose sua manca de potia political real, donce los ia fa prometes nonrealiste intendente, sabente ce los nunca va pote reali los[1]. Benito Mussolini, fundor e gidor de la faxisme italian, no ia es presente en la congresa. El sola ia envia un letera a la delegadas, cual ia es lejeda en la rituo de abri[1].
De la desides fada en la Congresa de Verona, la plu importante ia es la muta de faxisme italian a un promove republiciste, a pos lo ia suporta la monarcia de la Re Vittorio Emmanuele 3per 21 anios. La deside ia es motivada par la fato ce la re la aresta Mussolini e ia suscrive la pas con la Aliadas alga menses ante la Congresa; en fato, lo ia es acel ata cual ia forsa la faxistes fuji a Italia norde per comensa un stato nova. La rea ia es, donce, un trador per los.
La Congresa de Verona ance ia fa alga prometes cual ia representa un cambia intera en relata a sua politica faxiste anterior. Lo ia promete introdui un governa democrata elejeda sur la funda de autonomia popular, reuni un Asembla Constituinte cual ta desinia un constituida nova, permete libria de jornalisme, crea un juderia nova cual ta investiga froda e malusas su la governa faxiste anterior, dona teras noncultivada a cultivores povre, trae alga industrias xef su propria statal e institui comparti de profita en multe otra industrias privata[2]. Esta politicas economial ultima ia representa un "posa tre" entre la plutocratia capitaliste e la sosialisme marxiste.
Seguente la filosofiste italian Julius Evola, la Manifesto de Verona "ia es forte sosialiste e prolabora en orienta"[3]. Un de la plances insertada en la Declara de Verona ia presa per "aboli la sistem capitaliste e luta contra la plutocratias mundal"[4].
An tal, zero de esta prometes ia es mantenida. La xef de stato ia resta nonelejeda, la Asembla Constituinte nunca ia asembla, libria de parla ia es restrinjeda como ante, e la Juderia Spesial ia es instituida per condena enemis de faxisme en loca de investiga malusa governal. La "via tre" proposada ia fali en reali. En industrias clave asionores privata ia ave un rol sentral, la diretos de laborores ia es multe limitada, e sindicatistes ia ave no potia[5].
En 12 febrero 1944, la governa de Mussolini ia aproba la projeta legal de "Sosiali" gidada par la Declara de Verona, clamante per la "Enforsa de la conseti mussolonian sur sujetos como; justia sosial plu alta, distribui plu egal de ricia e partisipa de labora en la vive statal"[6]. Mussoloni ia clama ce el nunca ia abandona intera sua influes sosialiste, insistente ce ia atenta nasionali propria en 1939-1940 ma ia es forsada a pospone per razonas tatical relatada con la gera[7]. Con la suverti de monarcia, Mussolini ia clama ce la ideolojia intera de faxisme ia pote es realida e ia comanda nasionali tota companias con plu ca 100 empleadas[8]. Mussolini ia ance demanda aida a la excomuniste Nicola Bombacci, un exstudiante de Vladimir Lenin, per aida el estende la imaje ce faxisme ia es un promove progresiste[8] .
Istoristes desacorda sur la ojeto de la prometes fada en Verona. Un teoria es ce la Partito Faxiste Republiciste ia vole mostra confusa sur sua politicas e ojetos; car on ia ave un contrareata forte en Italia sude e sentral contra cualce cosa relatada con faxisme, e la faxistes en la norde ia pote atenta dirije coleria popular en la sude contra un idea o politica liante los mesma con acel idea o politica[9].
Declara de Verona
[edita | edita la fonte]La Declara de Verona (Manifesto di Verona en italian) ia es un documento de 18 puntos cual ia resoma la politicas futur de la Republica Sosial Italian. La documento, un atenta confusante de reveni a la estremisme de la faxiste inisial e, a la mesma tempo, per pasi Deutxland Nazi, cual aora ia controla la republica. Lo ia reafirma sua promete con sua aliadas deutx e nion. En ajunta a sua prometes de cambias en politica interna e de libria, la declara ia nota la puntos clave seguente[10]:
- Punto 1: Aboli de monarcia e proclama de la republica sosial. Denunsia de la "re trador e fujor" ultima".
- Punto 6: Catolicisme ia es declarada relijio statal ma otra relijios ia es tolerada.
- Punto 7: La membros de la raza iudi es stranjer. En la gera corente los es considerada nasionalia enemin. Esta ia cambia la situa de la iudis en Italia, ci ia es protejeda en compara con la areas controlada par la nazis. Aora los ia es arestada e deportada a campas de consentra con la aida de la polisia faxiste italian. Esta persegue no ia estende a persones desendente de sposis miscada.
- Punto 18: Continua en la gera per vinse la Aliadas e defende la teritorios italian ganiada.
Referes
[edita | edita la fonte]- ↑ 1.0 1.1 Neville, p. 189.
- ↑ Neville, p. 188.
- ↑ Evola, Julius (2013). Fascism Viewed from the Right. United Kingdom: Arktos Media Ltd. p. 83.
{{cite book}}: Manteni de CS1: data autotraduida (link) - ↑ Gregor, A.J. (1969). The Ideology of Fascism: The Rationale of Totalitarianism. New York: Free Press. p. 388, pp. 356f.
{{cite book}}: Manteni de CS1: data autotraduida (link) - ↑ Neville, pp. 188-189.
- ↑ Norling, Erik (2011). Revolutionary Fascism. Lisbon: Finis Mundi Press. p. 103.
{{cite book}}: Manteni de CS1: data autotraduida (link) - ↑ Smith, Denis Mack (1983). Mussolini: A Biography. New York: Vintage Books. p. 311. ISBN 0-394-71658-2.
{{cite book}}: Manteni de CS1: data autotraduida (link) - ↑ 8.0 8.1 Smith 1983, p. 312.
- ↑ Neville, p. 190.
- ↑ Stanislao G. Pugliese. "Italian Fascism and Anti-Fascism: A Critical Anthology."
Fontes
[edita | edita la fonte]- Peter Neville, Mussolini. Routledge Historical Biographies, 2003. 9780415249904
- Carlo Gentile. The Police Transit Camps in Fossoli and Bolzano - Historical report in connection with the trial of Manfred Seifert. Cologne.
- Denis Mack Smith (1983). Mussolini: A Biography. New York: Vintage Books. p. 311. ISBN 0-394-71658-2.
{{cite book}}: Manteni de CS1: data autotraduida (link)</ref>