Cometa
Un cometa es un corpo peti e jelin de la sistem solal cual, cuando pasante prosima a la Sol, caldi e comensa relasa gases, un aveni nomida estra-gasi. Esta produi un atmosfera o coma vidable, e a veses ance un coda. Esta fenomenos es la resulta de la efetos de radia solal e la venta solal atante sur la nucleo de la cometa. La nucleos de cometas pote ave un largia de alga sentos de metres a deses de km, e es composada de colies nonsecur de jelo, polvo, e particulas rocosa peti. La coma pote es asta 15 veses la diametre de la Tera, e la coda pote estende a un unia astronomial. Si sufisiente briliante, un cometa pote es vided de la Tera sin la aida de un telescopio, e pote sutende un arco de 30º (60 Lunas) tra la sielo. Cometas ia es oservada e rejistrada par multe cultures de edas antica.
Cometas ave tipal orbitas multe elise, e los ave un estende larga de periodos de orbita. Cometas con periodos corta orijina en la Sintur de Kuiper o sua disco sperdeda, cual es locada estra la orbita de Netuno. Cometas con periodos longa es suposada como orijinante en la Nube de Oort par disturbas de gravita causada par stelas pasante e la marea galatical. Cometas iperbolal pote pasa un ves tra la sistem solal interna ante es lansida a spasio interstelal.
Cometas es distinguida de asteroides par la esiste de un atmosfera estendeda (e nonliada par gravita) sirca la nucleo. Esta atmosfera es composada de la coma e la coda. Cometas estinguida cual ia pasa prosima a la presa de la lus de Sol ia perde cuasi tota de sua jelas e polvos volatil e pote sembla asteroides peti. Lo es suposada ce asteroides ia ave orijines diferente de cometas, e ia formi en la orbita de Jupiter en loca de la sistem solal esterna.
De novembre 2014, 5253 cometas es conoseda, un cuantia cual crese continuante. Ma esta cuantia representa sola un frato peti de la cuantia posible, car la reserva de corpos cometin en la nube de Oort es estimada como un trilion. Sirca un sola cometa per anio es vidable a la oios, e ancora multe de estas no es spetaculin. La cometas la plu briliante es conoseda como "cometas grande". Cometas ia es visitada par sondas spasial como la Rosetta de la Ajenteria European de Spasio, cual ia deveni la prima per atera un veculo robotical sur un cometa, e como Deep Impact ("colpa profonda") de NASA, cual ia crea un crater sur la cometa Tempel 1 per studia sua interna.