Carl Jung

De Vicipedia
Jump to navigation Jump to search
Carl Jung
CGJung.jpg

Informa personal

Nase: 26 julio 1875 en Kessewil, Suiz
Mori: 6 junio 1961 en Küsnacht, Suiz
Pais: Suiz

Otra informas

Profesa: Psiciatriste

Carl Gustav Jung ["iung"] ia nase a 26 julio 1875 en Kessewil, un vileta peti en Suiz. Sua padre ia es Paul Jung, un pastor de la campania, e sua madre ia es Emilie Preiswerk. Jung ia es ensircada par un familia de persones bon instruida, incluinte alga otra relijios e alga persones nonusual.

Sua padre ia comensa ensenia la lingua latina a Carl cuando Carl ia ave ses anios. Esta ia comensa un interesa grande en linguas e leteratur, spesial la leteratur de la anticas. Jung ia pote leje la plu de linguas moderna de Europa, e ance alga linguas antica, incluinte sanscrito, la lingua de la libros santa orijinal de induisme.

Carl ia es un adolesente solitar, ci no ia gusta la scola, spesial la compete. El ia vade a un scola abitada en Basel, Suiz. Ala, el ia es la ojeto de multe molestas jelosa. El ia comensa usa maladia como un escusa, e ia developa un tende embarasante de desmaia su presa.

Sua carera prima elejeda ia es la arceolojia, ma el ia studia medica a la Universia de Basel. En sua labora su la neurolojiste famosa Krafft-Ebing, el ia eleje la psiciatria como sua carera.

Pos gradua, el ia prende un posto a la Ospital Mental de Burghoeltzli en Zurich su Eugene Bleuler, un esperta sur scizofrenia (e la person ci ia nomi lo). En 1903, Jung ia sposi Emma Rauschenbach. En esta periodo de sua vive, el ia instrui clases a la Universia de Zurich, ia opera un ofisia privata, e ia inventa la tecnica de asosia de parolas.

El ia es un amiror de Sigmund Freud tra multe anios, e ia visita el en Wien en 1907. Un nara dise ce, pos cuando los ia encontra lunlotra, Freud ia cansela tota sua encontras per la dia e los ia parla per 13 oras sin pausa. Plu tarda, Freud ia vide Jung como la "re futur" de psicoanalise e sua eritor.

Ma Jung no ia aseta tota la teoria de Freud. Sua relata ia comensa fri en 1909 en un viaja a America. Cuando los ia interprete la sonias de lunlotra, Freud ia mostra un resiste a la analise. Freud ia para la analise, temente ce el va perde sua autoria supra Jung! Jung ia es insultada.

La Gera Mundal Prima ia es un periodo de autoesamina dolosa per Jung. Algas pensa ce el ia esperia un periodo de psicose. Ma esta periodo ia es ance la comensa de un de la teorias de personalia la plu interesante en la istoria de psicolojia.

Pos la gera, Jung ia viaja multe, visitante, per esemplo, poplas tribal en Africa, America e India. El ia jubila en 1946 e ia comensa retira se de la oios de la popla pos la mori de sua sposa en 1955. El ia mori a 6 junio 1961 en Zurich.