Botai
La cultur Botai es un cultur arceolojial (sirca 3700-3100 aec) de Cazacstan e Asia norde preistorial. Lo ia es nomida per la loca de Botai en Cazacstan norde. La cultur ave du otra locas grande: Crasni Iar e Vasilcovca. La loca en Botai es a la rio Iman-Burluc, un enflue de la rio Ixim. lo ave a min 153 casas partal suteran. Lo ia es partal destruida par erode cual es ancora aveninte, e par maneja de la foresta.
La ativias de a popla de Botai ia es liada a sua cavalos. Alga rexercores dise ce cavalos ia es domada local par la botai. A un ves, los ia pensa ce la plu de cavalos trovada ia es probable spesies savaje, Equus ferus, xasada con arcos, flexas, e lansas. Ma plu descovres en 2009 ia revela seramicas cual conteni lete de cavalos e osos de cavalos con indicas de es elevada pos doma, aora sujesta ce la cultur ia es un usor major de cavalos domada per sirca 3500 aec, prosima a 1000 anios plu temprana ca la acorda a ante. La cavalos ia es xef la asendentes de la cavalos de Przewalski, cual ia contribui 2.7 % de la erita a cavalos moderna.
La vasos de la cultur ia ave formas simple, la plu de la esemplos gris en color e no vernisida. La decoras es jeometrial, incluinte triangulos e rombos grilin e desinias scalerin. Puntos e sirculos ia es ance videda.
Un studia paleojenetical de 2018 ia prende samples de tre individuas diferente de la botai per estrae e analise de ADN. Du ia es mas e un fema. Autosomal, los ia es plu prosima a la grupos de eurasian norde antica ca la popla iamna. No flue de jenes sinifiante entre botai e iamna ia es oservada. Un mas ia es datida par radiocarbono como de 3108 - 3517 aec, la otra de 3016 - 3343 aec. De yADN, un ia es R1b1a1-M478, cual es tipal noneuropean e ave sua frecuentias la plu alta en la popla sirca la rejion de Altai, la asendente comun con R1b vivente sirca 13,000 anios ante aora. La otra ia ave aplogrupo N*-M231, tipal en Asia norde-este.