Blancaneva

De Vicipedia

Blancaneva es un narada de fes antica e poplal. La narada fundal vade como esta:

Multe anios pasada, un rea ia nase un bebe fia ci ave pel blanca como neva, labios roja como sangue, e capeles negra como ebon. Los clama el prinsesa Blancaneva. Ma, pos la bebe ia nase, la rea mori.

Pronto pos, la re ia sposi de nova. La sposa es multe bela, ma ance multe vana. El ave un miror majial ce responde a demandas. La rea demanda multe veses "Miror, miror, a la mur, ci es la plu bela en la pais?" E la miror responde sempre "Tu, me rea, es la plu bela!" Ma, cuando Blancaneva maturi, la miror dise a la rea "Rea, tu es multe bela, ma Blancaneva es plu bela ce tu."

La rea ia deveni jelos e comanda un xasor ce el prende Blancaneva a la bosce per mata el. La xasor ia obedi la rea, ma cuando el ia es a punto de mata Blancaneva, el no pote. En loca, el relasa Blancaneva.

En la foresta, Blancaneva descovre un caseta peti de sete nanas. La nanas compati el e permete el vive con los. Los avisa el: no permete stranjeres entra la casa.

Durante, la rea ia demanda de la miror ancora "Ce es la plu bela," e la miror responde ancora "Blancaneva." La rea ia masca se, e atenta mata Blancaneva duveses, ma la nanas resusita el. La ves tre, la rea masca se como la sposa de un cultivor, e dona un poma venenos a Blancaneva. El morde la poma e cade a la solo en un coma profonda. Cuando la nanas reveni, los no pote resusita el. Los crede ce el ja mori, donce los pone el en un caxon funeral de vitro.

Pos multe anios, un prinse ia viaja tra la foresta e vide Blancaneva en se caxon. El es encantada par se belia e comensa ama el. El demanda la caxon de la nanas e el e se servintes porta la caxon e prosede a la castel. La servintes malpasa e la peso de poma cade de la boca de Blancaneva - e el velia!

La prinse dise a Blancaneva ce el ama el, e los sposi. La rea mal veni a la rituo de sposi e mori de la xoca de vide Blancaneva vivente. La prinse e Blancaneva vive sempre felis.

Scolores crede ce Blancaneva es un de multe naradas ce segue la viaja de la eroe (Blancaneva) de felisia tra malia e retro a felisia. Un sinifia plu simple es ce la narada es un leson supra la periles de vania.