Atlantida

La mapa de Atlantida, par Athanasio Kircher, cual loci lo en la media de la mar Atlantica, de Mundo Subterraneus, publicada en Amsterdam en 1669; la mapa es orientada con la sude a alta.

Atlantida (elinica Ἀτλαντὶς νῆσος, "isola de atlas") es un isola imajinal notada en un alegoria sur la orgulo de nasiones en la obras par Platon Timeo e Critia, do lo represente la potia marinal enemin cual ataca "Atina antica", la esemplo pseudoistorial de la stato ideal en la Republica. En la nara, Atina repele la ataca atlantidan diferente de cualce otra nasion de la mundo conoseda, atestante, suposada, la superioria de la conseta de la stato Platon imajina. La nara conclui con Atlantida perdente la respeta de la dios e sumerjinte en la mar Atlantica.

An si la nara no es multe sentral a la obras, la nara ia importa multe en leteratur. La aspeta alegorial de Atlantide ia es prendeda par alga scrivores de la Renase en sua obras utopian, como Atlantida nova de Francis Bacon e Utopia de Thomas More. A la otra lado, rexercores amator de la sentenio 19 ia malcomprende la nara par Platon como un tradision istorial, notable en Atlantide: la mundo antedeluvian par Ignatius L. Donnelly. La indicas neblosa de la nara par Platon de un tempo de avenis plu ca 9,000 anios ante sua eda e la loca alegada de Atlantide - "ultra la colonas de Hercule" - ia resulta en multe divina pseudosiensal. Seguente, Atlantida ia deveni un nom burlante per cualce sivilia avansada cual es perdeda preistorial, e lo continua inspira naradas moderne, de libros de cartunes a estravagantes de sinema.

En cuando filolojistes e clasicistes moderne acorda sur la natur imajinal de la nara, on ave ancora debata sur cual ia inspira lo. Per esemplo en la nara de Gige, Plato es conoseda como emprestante alga de sua alegorias e metafores de tradisiones plu vea. Esta ia causa alga eruditas per investiga la inspira posible per Atlantide de la arcivos egiptian de la eruta de la Isola Tera, la invades par la popla de la mar, o la gera de Troia. Otras ia rejeta esta cadena de tradision como nonprobable e insiste ce Plato ia crea un nasion intera nonreal, derivante inspria de avenis de sua eda como la invade nonsusedosa de Sisilia par Atina en 415-413 aec, o la destrui de Helice en 373 aec.