Asero

De Vicipedia
Jump to navigation Jump to search
Un asero de zucar
la samara, fruta de la asero
La folias e floras de un asero

La asero es un jenero de arbores e arboretas de la familia Sapindaceae. On ave sirca 128 spesies, la plu de cual es nativa a Asia, con alga ance trovada en Europa, Africa norde, e America Norde. Sola un spesie, Acer laurinum, estende a la emisfero sude. Aseros es fasil reconosable par sua folias palmin e frutos con alas.

La plu de aseros es arbores cual pote crese a un altia de 10 - 45 m. Otras es arboretas min ca 10 m de altia con un cuantia de troncas peti comensante a la solo. La plu de spesies es caduca, e multe es famosa per la colores de sua folias en autono. Un cuantia peti en Asia sude e la Mediteraneo es sempreverde. La folias en la plu de spesies es palmin e lobosa. La flores es verde, jala, orania, o roja. An si los es peti como individuas, la efeto de un arbor completa florinte pote es stonante en alga spesies. Alga aseros es un fonte de polen e netar per abeas en la primavera temprana.

La frutas es nomida samaras, e ave multe nomes comun, como "claves de asero", "elicotores", etc. Esta semes aveni en duples, cada conteninte un seme encluida en un "nozeta" liada a un ala plata de texeda fibrosa e paperin. Los es formida per jira cuando los cade, e per sperde la semes a un distantia sur la venta.

Alga spesies de asero es usada como arbores ornal, spesial per sua color autonal e sua crese relativa rapida. Popular varias inclui la aseros norsce, arjento, japanes, e roia. Aseros es ance un eleje popular per la arte de bonsai. Aseros japanes, tridente, Amur, campo, e Montpellier es comun elejes e responde bon a la tecnicas cual coraji redui de folias e rami.

La asero zucarosa es forada per sava, cual es alora bolida per produi xirope, zucara, o caramel de asero. On nesesa sirca 40 litres de sava per prepara un litre de xirope. Cualce asero pote es usada, ma la plu no produi sufisinte zucar per es usosa. La industria es consentrada en Quebec, Canada, e es valuada a sirca un dui bilion de dolares canadian per anio. Un folia de la asero es sur la scermo de eraldia e la bandera de Canada, e es un simbol de fortia e dura e la arbor nasional de Canada.

Alga de la spesies de asero plu grande ave lenio valuada, spesial la asero zucarosa en America Norde e la asero sicamoro en Europa. La lenio de la asero zucarosa es comon nomida "asero dur", e es la tipo prefereda per bastones e cursos de boling, la ases de bastones per biliardo, e blocos de carnor.

Asero es un lenio de tono, pd un lenio cual transmete bon la ondas de sona e es usada per strumentos musical. Asero es plu dur e ave un sona plu briliante ca mogano, un otra lenio comun usada per strumentos. La dorso, lados, e colo de la plu de strumentos de cordetas, es fabricada con asero. La colos de gitares eletrical es comun fabricada de asero, per sua stablia. Asero es ance usada per fabrica basones e otra strumentos de venta como flautas dulse.