Asembla Popular Suprema

De Vicipedia
Jump to navigation Jump to search
La Casa de Asembla Mansudae, Mansudong, Distrito Sentral, Pyongyang.

La Asembla Popular Suprema (최고인민회의, 最高人民會議, choigo inmin houe-i) (APS) es la legeria con un salon de la Republica Democrata Popular de Corea (RDPC). Lo es composada de 687 membros: un delegada de cada de la 687 distritos elejal en la RDPC. Como instituida par la Constitui Sosialiste de la Republica, la APS es gidada su la Partito de Laborores Corean (PLC), ma 85 sejas es tenida par membros de estra la PLC: 51 de la Partito Democrata Socialiste de Corea, 21 de la Partito de la Jovenes Chondokyo, e 13 membros nondependente. Tota partitos formi la organiza Fronte Democrata per Reuni de la Patria (FDRP). An si la APS es la autoria leginte la plu alta, lo delega usual la potia a la Presidio.

Como scriveda en la Constitui de la RDPC, tota sitadanes con 17 anios o plu pote vota en la eleje, o aspira la ofisia de un delegada. Tota aspirores debe es recomendada par la FDRP ante la eleje. En realia, la FDRP recomenda un sola aspiror a cada distrito elejal, e sua nom va es primida sur la paper de vota. A la dia de vota, la votores pote o pone la paper de vota sin marca en la caxa (aproba la aspiror) o vade a un ciosco e rasca la nom de la aspiror (desaproba la aspiror) ante pone la paper de vota en la caxa elejal. En pratica, esta prosede permete ce la polisia reconose ci ia vota contra la recomenda ofisial.

La Asembla reuni usual a un o du veses en cada anio en Pyongyang per aproba alga proposas de leges nova e proposas finansial. La Asembla eleje ance la membros de la Comision Nasional de Defende, e la membros de la Presidio. La Constitui pote es cambiada par du tris de la membros de la APS. La membros servi tra sinco anios. La APS es moderada par la Presidente de la Asembla (Choe Thae Bok, 최태복, 崔泰福, per la Asembla 2009-2014).

La Presidio es la comite permanente de la APS, cual eserse potia cuando la Asembla no consenta (en la resta de la anio). La Presidio supravide la organizas statal, eleje la judis, validi la tratas internasional, e emete pardonas e amnestias. La presidente de la Presidio (Choe Ryong-hae, 2019-) es la xef de la stato.

La eleje la plu resente ia aveni a soldi la 9 marto 2014. La novas ia dise ce Kim Jong Un, la Presidente de la Comision Nasional de Defende, ia es elejeda como la delegada de la Distrito Elejal 111-Paektusan en la provinse de Ryanggang. Par contrasta, la Ajenteria Sentral Corean de Novas ia reporta ce Kim Jong Un ia vade a un stasion elejal a la Universia Kim Il Sung de Politica en Pyongyang, cual es en la Distrito Elejal 105, e ia vota per Comandor Kim Kwang Hyok.