Arciteta romanica

De Vicipedia
Abaia de Maria Laach, Deutxland
Eglesa de la Scola de Tum, Polsca
Abaia de Lessay, Normandia, Frans

Arciteta romanica es un stilo de arciteta de Europa medieval marcada par arcos semisirculo. On ave no acorda per la comensa de la stilo, con sujestes de sentenio 8 a 11, con 11 la plu comun sujeste. En la sentenio 12, lo ia developa a la stilo gotica, marcada par arcos puntida. Esemplos de arciteta romanica pote es trovada tra la continente, cual fa ce lo es la prima stilo arcitetal european pos la arciteta de la Impero Roman. En England, la stilo es nomida arciteta normande, de sua orijin en la stilo de la invadores de Normandia.

Arciteta romanica ia combina cualias de construidas roman e bizantian e otra tradisiones local, e es reconosable par sua cualia masosa, mures spesa, arcos ronda, colonas forte, voltas barilin, tores grande, e arcadas decorosa. Cada construida ave formas clar definada, comun con un desinia simetre e multe coerente. La apara completa es de simplia cuando comparada con la construidas gotica cual segue. La stilo pote es identifiada tra tota Europa, an con cualias rejional e materiales diferente.

Multe casteles ia es construida en esta periodo, ma la eglesas grande es multe plu ca los. Multe de la eglesas es ancora en bon state e comun usa. La cuantia enorme de eglesas construida en la periodo romanica ia es susededa par la periodo an plu produosa de arciteta gotica, cual ia reconstrui la plu de eglesas romanica en areas rica como England e Portugal. La grupos de eglesas survivente la plu grande es en areas cual ia es min rica en periodos seguente, incluinte partes de Frans sude, Espania campanian, e Italia campanian. Surviventes de casas e palasios nonfortida en la stilo romanica, e la abiterias de moncerias es multe plu rara, ma estas ia usa e ajusta la cualias trovada en construidas eglesal, en un grandia plu familial.