Anticia tarda

De Vicipedia

Anticia tarda es la nom usada par la istoristes per descrive la periodo de cambia de la anticia clasica a la eda medieval en Europa, la mundo mediteranean, e Asia sude-ueste. La developa en istoriografia de esta periodo ia es fada par la istoriste Peter Brown, pos la publici de sua obra seminal The World of Late Antiquity (1971). La fronteras de la periodo es materia de debate continuante, ma Brown proposa un periodo entre la sentenio 3 e 8 ec. Jeneral, on pote situa esta periodo de la fini de la crise de la sentenio 3 (s 235-284) asta, en la este, la periodo muslim temprana (sentenio 7 a 9), pos la concistas muslim de la dui de la sentenio 7. En la este la fini es plu temprana: la comensa de la eda medieval temprana es jeneral locada en la sentenio 6, o a ante en la bordas ueste de la impero.

La Impero Roman ia sufri cambias sosial, cultural e organizal importante con la rena de Diocletian, ci ia comensa la costum de divide la Impero en duis este e ueste gidada par imperores multiple. Comensante con Constantino la grande, la cristianisme ia es legalida en la Impero, e la capital nova ia es fundida en Constantinopoli. La migras de tribus germanica ia disturba la governa roman de la sentenio 4 a ante, culminante en la colasa final de la Impero en la ueste en 476, sustituida par la renas barbar. La fusa resultante de la tradisiones elinica-roman, germanica e cristian ia forma la fundas de la cultur futur de Europa.

La declina jeneral de la cuantia de abitores, la conose tecnolojial e la modeles de vive en Europa en esta periodo ia deveni un esemplo arcetipal de colasa sosial per la scrivores de la Renas asta oji. Como resulta de esta declina, e la manca relativa de rejistras istorial de Europa en spesial, la periodo entre la cade de la Impero e la eda medieval ia deveni conoseda como "eda oscur", un terma deslocada en par la introdui de "Anticia tarda".