Alfa Centauri

De Vicipedia
Jump to navigation Jump to search
Alpha Centauri relative sizes.png
La tre stelas en la sistem de Alfa Centauri, con grandia comparada a nosa Sol.

Alfa Centauri o Alfa de Sentauro (α Centauri, α Cen) es la sistem stelal la plu prosima a nosa sistem solal, con distantia de 4,37 anios de lus (sirca 4,13×1013 km, o 277 600 UA) de la Sol. Lo es en Sentauro, un constela de la sielo sude.

Lo es composada de tre stelas: α Cen A e α Cen B, cual formi la stela binaria α Cen AB (ance nomida Rigil Kentaurus), e un nana roja peti e nonbriliante, α Cen C, comun nomida Proxima Centauri, cual es laxe gravital liada e orbita la otra du a distantia de sirca 13 000 UA (0,21 anios de lus). Proxima es la stela la plu prosima a la Sol, con distantia de 4,22 anios de lus.

A la oios nuda, la du composantes xef aspeta como sola un punto de lus con brilia parente de -0.27, forminte la stela la plu briliante en la constela Sentauro, e la stela tre de la plu briliantes de la sielo notal, pos sola Sirio e Canopo.

α Cen A ave 1,1 veses de la masa e 1,519 veses de la luminosia de la Sol. α Cen B es plu peti e plu fria, con 0,907 veses de la masa de la Sol e 0,445 veses de sua luminosia. La duple pasa 79,91 anios en orbita sua sentro comun, e en acel tempo la distantia entre los varia de cuasi la distantia entre Pluto e la Sol (35,6 UA) asta lo entre Saturno e la Sol (11,2 UA).

Proxima es a la distantia pico plu peti de 4,24 anios de lus de la Sol, tal ce lo es la stela la plu prosima a la Sol, an si on no pote vide lo par oios nuda. La distantia entre Proxima e α Cen AB es sirca 13 000 unias astronomial (0,21 anios de lus), egal a sirca 430 veses de la grandia de orbita de Netuno. En 2016, on ia descovre Proxima Centauri b, un esoplaneta con grandia simil a la Tera en la zona abitable de Proxima.