Ainu (lingua)

La estende istorial de Ainu

Ainu es un lingua parlada par la popla ainu en Hokkaido, la isola norde de Japan. En la pasada, el ia es parlada en la isolas Kurile, la norde de Honxu, e la sude de Sahalin. Es sirca 150 000 ainus en Japan, ma on divina aora ce min ce 1 000 persones parla la lingua. Alga ainus atenta crese la numero de parlores, notable la ativiste ainu Xigeru Kaiano.

Fonolojia

Silabas en ainu es CV(C), pd, los debe comensa con un consonante, segueda par un vocal, e los pote ave un coda elejable. On ave poca grupos de consonantes.

On ave sinco vocales en ainu: /i/, /e/, /a/, /o/, /u/. En la ainu de Sahalin, los ave ance vocales longa.

Consonantes enclui la esplodentes /p/, /t/, /k/, un africante /ts/, un fricante /s/, un glotal /h/, nasales /m/ e /n/, semivocales /j/ e /w/, e un tocante /r/. Un esplodente glotal esiste ance a la comensa de un parola ante un vocal, ma lo no es indicada. La esplodantes pote es voside entre vocales e pos nasales. Alga palatali aveni ance.

Ainu ave un sistem de asentua par tonos, cual varia en la dialetos. Jeneral, parolas con afisas ave un tono alta a la radis, o sur la silaba prima si lo es cluida o ave un diftongo. En otra parolas, la silaba du ave un tono alta, ma esetas esiste.

Gramatica

La strutur de ainu es simil en ordina de parolas (e alga aspetas de fonolojia) a japanes.

La ordina tipal es SOV, e lo usa posposadas en loca de preposadas. Nomes pote grupi per altera lunlotra, con la nom xef a la fini. Verbos, cual es o transitiva o nontransitiva, aseta afisas variosa de deriva. Ainu no ave jenero gramatical. Plurales es indicada par un sufisa.

Ainu clasica, la lingua de la yucar (sagas), es polisintesal, con incorpora de nomes e averbos; esta es multe reduida en la lingua moderna.

Aplicadas (alterantes corporada) pote es usada per pone nomes en roles dativa, strumental, comitative, locativa, alativa, o ablativa. En ajunta a nomes libre, esta roles pote es donada a nomes encorporada, e la usa de aplicadas es nesesada per corpora nomes oblica. Aplicadas ia deveni min comun en la lingua moderna.

Ainu ave un clase de verbos plural cual es cluida, e alga de estas es noncoerente, usante parolas con orijines diferente (como, en engles, on espresa formas de "es" con am, is, are, be, was, were, etc.

Scrive

La lingua ainu es scriveda en un varia alterada de la silabario catacana de japanes. On ave ance un alfabeta latina, en cual /ts/ es speleda par c, e /j/ par y. La esplodente glotal, no es scriveda. Un sinieta de egalia (=) es usada per marca bordas de morfemes, pe pos un prefis. La asentua tonal es indicada par un asentua agu (pe á) en la scrive latina, ma no es indicada en catacana.

Esemplo

Per mostra, asi es la Prea de la Senior en Ainu:

Kando otta an chikoro Michi,
E kon reihei orota aeoripak kuni ne ki wa un kore.
E koro moshiri ekte wa un kore.
E kor' irenga kando otta an korachi,
moshir'otta ne yakka une no aki kuni ne ki wa un kore.
Kesto kesto chi e kunip tanto ne yakka un kore.
Chi utara anak ne chikoro ashosere utara tusare okere korachi,
chikoro shosep ne yakka tusare wa un kore.
Chi utara anak ne iteki akoramnukara kuni ne ki wa un kore;
koroka wenbe orowa no un ohaitare wa un kore.