Acenaten

De Vicipedia
Jump to navigation Jump to search
Sculta de Acenaten

Acenaten (egiptian antica ꜣḫ-n-jtn, cual sinifia "efetosa per la Aten") ia es un faraon de Egipte antica ci rena sirca 1353-1336 o 1351-1334 aec, la renor 19 de la dinastia 18. Ante la anio 5 de sua rena, el ia en conoseda como Amenhotep 4 (jmn-ḥtp, "Amun es sasiada").

Acenaten es notada per abandona la relijio politeiste tradisional de Egipte, e per introdui atenisme, sentrida sur Aten. Aten ia es tipal representada par la sol, como la "Sol Invictus" de la romanes plu tarda. Egiptolojistes no pote es serta si atenisme ia es un monoteisme asoluta, o un monolatria, sincretisme, o henoteisme. Esta move de la cultur de la relijio tradisional no ia es vasta asetada.

Pos sua mori, La monumentos creada par Acenaten ia es desconstruida e ascondeda, sua scultas ia es destruida, e sua nom escluida de la listas de renores compilada par faraones plu tarda. La relijio tradisional ia es restorada gradal su la gida de Tutancamun, la fio de Acenaten, ci ia cambia sua nom de Tutancaten temprana en sua rena.

Acenaten ia es cuasi perdeda de istoria asta la descovre de Amarna (o Acetaten) en la sentenio 19 tarda, la site capital cual el ia construi per la adora de Aten. Plu, en 1907, un momia ia es trovada en la Vale de Res cual ia es la padre de Tutancamun.

La descovre de Acenaten e la escava temprana a Amarna ia crea un interesa popular en la faraon e sua rea Nefertiti. El ia es descriveda como "enigmosa", "misteriosa", "revoluinte", "la idealiste la plu grande", e "la individua prima en istoria", ma ance como "erese", "manica", "posible demente", etc. Multe de la interesa veni de sua lia a Tutancamun, la stilo e cualia alta de la artes cual el suporta, e un interesa continuante en la relijio cual el ia atenta fundi. La discutes de la influe posible de atenisme e la monoteisme de iudisme continua.

La imajes de Acenaten (vide la sculta a supra) mostra un fas longa e alga strana, cual ia causa multe sujestas de maladias e malformis jenetical. Serta, la abita de faraones per sposi sua frates o sores sujesta un causa jenetical posible. Ma studias jenetical no indica cualce problemes jenetical. Lo es probable ce sua imajes es un indica de un stilo de representa nova cual refleta la relijio nova.