Maia (linguas)
La linguas maia es un familia de linguas parlada par a min ses milion persones maia, spesial en Guatemala, Mexico, Beliz, e Onduras. La familia es un de la familias la plu studiada e documentida en la Americas. Los desende de la lingua protomaia, cual ia es parlada sirca 5000 anios a ante. Lo ia es partal reconstruida usante la metodo de compara. Protomaia ia divide a, a min, ses ramos, composada de 30 linguas unica.
La linguas maia formi un parte de la linguas de la area nomida Mesoamerica, cual refere a la partes sude de Mexico e la norde de America sentral. La area es definida par la cultures temprana cual comparti multe cualias de cultiva, utiles, relijio, politica, e economia. Los ance comparti multe cualias de la linguas, pe la usa de nomes de relata (como "testo" per "supra") en loca de aposadas, cual ia developa par la interata de poplas per milenios.
La morfolojia de la linguas maia es plu simple ca los de otra linguas mesoamerican, an si lo es ance aglutinante e polisintesal. Verbos es marcada per aspeta o tempo, la person de la sujeto, la person de la ojeto (en la caso de verbos transitiva), e per la plural de person. Nomes poseseda es marcada per la person de la posesor. La nomes no es normal marcada per caso e seso, ma si nesesada, la seso de nomes animada pote es spesifada par un prefisa.
En la eda precolonial de la istoria de Mesoamerica, alga linguas maia ia es scriveda en un scrive logosilabal. Sua usa ia es spesial sperdeda en la periodo clasica de la sivilia maia (sirca 250 - 900). La colie survivente de plu ca 10,000 enscrives conoseda sur construidas, monumentos, vasos, e manoscritos de paper de cortex (combinada con la leteratur maia poscolonial e multe rica, scriveda en la alfabeta latina) furni un funda per la comprende moderna de istoria precolonial sin egal en la Americas.
Fonolojia[edita | edita la fonte]
Protomaia, reconstruida, es suposada como un lingua, cuasi sempre, de monosilabas. La forma de silabas ia es CVC, con consonantes duplida trovada sola entre du silabas. La perde de alga vocales ia produi alga consonantes complicada en la desendentes.
| frontal | sentral | dorsal | ||||
|---|---|---|---|---|---|---|
| corte | longa | corte | longa | [corte | lonta | |
| alta | i | iː | u | uː | ||
| media | e | eː | o | oː | ||
| basa | a | aː | ||||
| bilabial | alveolal | palatal | velal | uvulal | glotal | |||||||
|---|---|---|---|---|---|---|---|---|---|---|---|---|
| simple | implodente] | simple | ejetada | simple | ejetada | simple | ejetada | simple | ejetada | simple | ||
| esplodentes | p | ɓ | t | tʼ | tʲ | tʲʼ | k | kʼ | q | qʼ | ʔ | |
| africantes | t͡s | t͡sʼ | t͡ʃ | t͡ʃʼ | ||||||||
| fricantes | s | ʃ | x | h | ||||||||
| nasales | m | n | ŋ | |||||||||
| licuidas | l r | |||||||||||
| semivocales | j | w | ||||||||||
Gramatica[edita | edita la fonte]
Protomaian es suposada como ave un ordina de parolas fundal de VOS (verbo-ojeto-sujeto), un ordina multe rara, con la posible de cambia a VSO. Oji, yucatecan, tzotzil, e tojobalal ave un ordina fisada de VOS; mamean, qanjobal, jakaltek, e un dialeto de chuj ave un ordina fisada de VSO. Sola chorti ave la ordina SVO (como lfn); otra linguas maia permete ambos VSO e VOS.
Nomes[edita | edita la fonte]
En multe linguas maia, conta nesesa la usa de clasintes cual indica la clase de cosas cual es contada; la numero no pote apare sin la clasintes. Clase es tipal asiniada seguente la ojeto es animada o nonanimada, o acordante con la forma jeneral. Donce, cuando on vole conta ojetos "plata", on debe usa un forma diferente de la clasinte cual on ta usa cuando on conta ojetos ronda, o longa, o animal, o umana. La clasintes es alga linguas es en la forma de afisas liada a la numero; en otras los es autonom. E otras usa los nunca. Jakaltek ave ambos clasintes per la numeros e clasintes per la nomes, e los per nomes pote es usada como pronomes (pe "el-la-om", "lo-la-util", e simil).
La sinifia de un nom pote es cambiada par cambia la clasinte. En chontal, pe, la clasinte -tek es usada con nomes de plantas cuando la ojetos es arbores intera. Si on usa -tsit (usada per conta ojetos longa e magra) es usada per la mesma planta, on indica ce la ramos o bastetas de la arbor es contada.
La morfolojia de nomes maia es simple: los infleta per numero (singular o plural) e, cuando poseseda, per la person e cuantia de sua posesor. Posese pronomal es espresada par un colie de prefisas de posese afisada a la nom (pe, en kagchikel, ru-kej - sua cavalo. Nomes pote ave formas spesial cual marca los como poseseda. Per posesores en la forma de nomes, la nom poseseda es infletada como poseseda par un posesor de person tre, e segueda par la nom de la posesor (pe, en kaqchikel, rukkey ri achin - la cavalo de la om, o leteral sua cavalo la om). Esta tipo de posese es un bon indica de tota lingas mesoamerican.
Linguas maia contrasta comun posese alienable e nonalienable par varia la modo en cual la nom es o no es marcada como poseseda. Per esemplo, jakaltek contrasta la nonalienable wetʃel (mea foto, en cual me es mostrada) con la alienable wetʃele (mea foto, cual me ia fa). La prefisa we- marca la posesor en la person un, e la -e marca la poseseda como alienable.
La linguas maia cual ave cualce preposada ave normal sola un. Per espresa loca e otra relatas entre persones o cosas, on usa un clase de nomes spesial nomida "nomes de relata". Esta es ance videda tra tota mesoamerica. La nomes de relata es tipal derivada metafor de partes de la corpo. Pe, "sur" es espresada par la parola per "testa".
La linguas maia es ergativa en sua alinia: La sujeto de un verbo nontransitiva es tratada simil a la ojeto de un verbo transitiva, ma diferente de la sujeto de un verbo transitiva. Per esemplo, "me core" e "el colpa me.
Linguas maia ave du grupos de afisas cual es liada a la verbo per indica la person de sua partisipantes (sujeto e ojeto). Un grupo indica la person de sujetos de verbos nontransitiva, e la ojetos de verbos transitiva. Los pote ance es usada con predicas ajetival o nomal per indica la sujeto.
Clase B
- Sujeto de un verbo nontransitiva en kaqchikel: x-ix-ok - "vos ia entra"
- Ojeto de un verbo transitiva en kaqchikel: x-ix-ru-chöp - "el ia prende vos"
- Sujeto de un predica ajetival en kaqchikel: ix-samajel - "vos es asidua"
- Sujeto de un predica nomal en tzotzil: antz-ot - "tu es un fem"
Un otra grupo es usada per indica la person de sujetos de verbos transitiva e ance la posesores de nomes:
Clase A
- Sujeto de un verbo transitiva en kaqchikel: x-ix-ru-chöp - "el ia prende vos"
- Marca de posese en kaqchikel: ru-key ri achin - la cavalo de la om, leteral "sua cavalo la om"
- Marca de relata en quiche clasica: u-wach ulew - sur la tera, leteral "sua fas la tera"
Verbos[edita | edita la fonte]
En ajunta a sujeto e ojeto (ajente e pasiente), la verbo maia ave afisas cual indica aspeta, tempo, e modo. Tempo es jeneral simple. Jakaltek, pe, contrasta sola pasada e nonpasada; mam ave sola futur e nonfutur. Aspeta es normal plu importante. Modo no forma normal un sistem separada, ma es entretexeda con tempo e aspeta.
Linguas maia tende ave un colie rica de voses gramatical. Protomaia ia ave a min un construi pasiva e un regala antipasiva per redui la importa de la sujeto en relata a la ojeto. Moderne kiche ave du antipasivas: un cual dona foca a la ojeto e un otra cual asentua la ata de la verbo. On pote trova ance construis de vose como mediopasiva, corpora (inclui un ojeto en la verbo), strumental (leva la strumento a la rol de la ojeto), e referente (leva un resetor o beneficada a la rol de la ojeto).
Stativas[edita | edita la fonte]
En la linguas maia, stativas es un clase de parolas predicante cual espresa cualia o state, como en otra linguas como japanes: en loca de "el es grande", on dise simple "el grande", con "grande" operante como un verbo. Stativas en linguas maia pote es a veses infletada per person, ma tipal manca infletas per tempo, aspeta, etc. Statives pote es ajetivos, locas, o numeros.
Stativas de loca es un clase de radises cual es posible unica en la linguas maia, e forma ajetivos stativa e verbos (tipal con la aida de sufisas) con sinifias relatada a la loca o forma de un ojeto o person. Linguas maia ave entre 250 e 500 radises de loca distinguida:
Telan ay jun naq winaq yul bʼe. On ave un om reclinante cadeda sur la rua.
Woqan hin kʼal ay max ekkʼu. Me ia spende la tota dia sentante a su.
Yet ewi xoyan ay jun lobʼaj stina. Ier on ave un serpente reposante enrolada a la entra de la casa.
En esta tre frases qanjobal, la stativas de loca es telan ("alga cosa grande o silindre reclinante como cadeda"), woqan ("person sentante sur un ojeto simil a un seja"), e xoyan ("enrolada como un cordon e serpente").
Composa de parolas nova[edita | edita la fonte]
La composa de radises de nomes per forma nomes nova es comun. On ave ance multe prosedes morfolojial per deriva nomes de verbos. Verbos permete ance la usa de afisas multe produinte de deriva, la plu de cual indica transitivia o vos. Como en otra linguas mesoamerican, la linguas maia usa radises per partes de la corpo en un modo metafor, spesial per forma locativas e nomes de relata, como kaqchikel -pan ("interna" e "stomaco") o -wi ("capeles de la testo" e "sur").