Vendel
Vendel es un parocia en la provinse svensce de Uppland. La vileta survide un estende longa de acua, la Vendelsjön, prosima a cual la Rio Vendel ia ave sua conflue con la Rio Fyris. La eglesa ia es instituida en 1310. Vendel es la loca de un compleso real antica, un parte de "Uppsala öd", un rede de complesos real intendeda per furni revenu per la res svensce medieval.
En 1881 a 1883, alga escavas par Hjalmar Stolpe ia revela 14 enteras en poca ultra la canto sude-este de la semetero. Alga de la enteras ia es contenida en barcones de sirca 9 metres en longia, e los ia es rica furnida con ordinas de armas, incluinte spadas eselente, elmos, calderones, cadenas, perletas, scermos, utiles, etc.
La elmos de enteras 1, 12, e 14 ia es multe simil a un elmo de un entera con barcon a Sutton Hoo, Suffolk, England de la sentenio 7 temprana, con placas primida de senas de gerores. La scermo de entera 12 a Vendel es ance simil a un scermo a Sutton Hoo, con simil placas. La barcones a Vendel ia es identifiada par sua multe rebitas, e ia es acompaniada par multe sacrifias de animales, spesial cavalos, en la enteras. Un entera plu tarda (entera 3) ia conteni un colie importante de morsos de bridas per un cavalo. Esta enteras es datida a la sentenios 6 a 8.
A Husby, prosima a Vendel, on ave un colineta grande cual tradisiones loca nomi Ottarshögen, de Ottar, acc Ohthere, e hög, sinifiante colineta o tumulo. Ohthere es asosiada con la person de la mesma nom en la epica de Beowulf. Un escava en 1917 ia revela la restas de un om potiosa ci ia es enterada ala a la comensa de la sentenio 6, la periodo de Ohthere. La otra enteras de datas simil, asosiada con la familia de Ohthere es a Uppsala vea.
Vendel ia dona sua nom a la periodo (la eda Vendel) en la eda de fero scandinavian, e a la stilo corespondente en arte (la stilo Vendel). Lo ia es comun sujestada ce la Vandales, a a min sua res o renores, ia es liada a est loca. En esta, lo es liada con la nom de un loca asosiada a Valsgärde en la mesma rejion. Lo comparas simil con la entera con un barcon de 27 metres a Sutton Hoo mostra un lia direta entre la armurores ci ia produi la obras trovada a la du locas, un lia cual es sentral a la comprende de ambos. La entera a Sutton Hoo es comun asosiada con Re Raedwald de Anglia Este (rena sirca 599-624), ci en sua rena plu tarda (sirca 616-624) ia es la plu potiosa entre la renores de la renas engles.
Referes:
Hyenstrand Å. Lejonet, draken och korset. Sverige 500-1000. Lund, 2001. S. 92-102.
H. Stolpe and T.J. Arne, La Necropole de Vendel, Kungl. Vitterhets Historie och Antikvitetsakademien (Monograph 17). Stockholm 1927.