Tengrisme

De Vicipedia
La monte Han Tengri a la reposa de la sol
Un xaman fem de Altai, 1908
La templo Sulde blanca en Uxin Banner en Mongol interna, Xina

Tengrisme es un relijio antica de la popla turcica e mongol de Asia sentral, sentrida sur un dio - Tengri - de la sielo. Lo ia es la relijio xef de la turces e mongoles (incluinte bulgares e xiongnu), hunes, e posible la mandjus e magiares, e un relijio de stato de alga statos medieval de Mongol a la Balcanes. Per la sentenios 12 o 13, tengrisme ia deveni un relijio monoteiste, ma lo ave la cualias de un relijio de xamanes. La nom de la relijio deriva de la nom Tengri ("la sielo") de turcica vea. Lo es aora promoveda par la inteletosas de Asia sentral e partes de Rusia. Pos la fini de la Uni Soviet, lo ia deveni ancora popular.

Kök Tengri ("sielo blu") es la dio suprema, la "un", la creor de tota cosas. Lo es tipal comprendeda en un modo panteiste como un asoluta non-antropomorfe, simil a la Dau de dauisme. Tota otra divines es adorada como la revelas de Tengri o como la spiritos de la elementos, pe tera, acua, foco, sol, luna, stela, aira, nubes, venta, tempesta, tona e lampo, pluve e arco de sielo.

En tengrisme, la universo es divideda entre la mundo divin de la sielo, la mundo suteran, e la mundo comun. En alga reportas, lo ave sete niveles o plu. Lo es crededa ce xamanes pote comunica o an visita mundos variosa. Spiritos, divinas, o xamanes de esta otra mundos pote, a veses, visita nosa mundo como fantasmas o otra mostras. La tema de un universo jirante es comun, como la move de la sol e la saisones, e ance la spiritos de tota viventes, ci es renaseda pos mori.

La mundo de la sielo sembla nosa mundo, ma no es manxada par umanas. Natur es sana e pur, e la nativas ia devia nunca de la tradisiones de sua asedentes. Esta mundo es plu briliante ca la nosa. Alga veses, la portes de sielo abri e la lus brilia tra la nubes. En esta situa, xamanes e sua preas ave plu efetos. Un xaman pote vade a un viaja imajinal a la sielo, montante un avia o cavalo o servo.

La mundo suteran es ance simil a lo de nos. Sua abitantes sembla umanas ma ave du spiritos en loca de nosa tre spiritos. Los manca la spirito amin cual produi la temperatur de la corpo e permete respira. Donce, los es pal e sua sangue es negra. La sol e luna de la mundo suteran dona min lus ca la nosa.

Lo es crededa ce umanas e animales ave multe spiritos. Jeneral, cada person es videda como avente tre spiritos, ma la cuantia e la nomes de spiritos difere entre la tribus. Car animales ave spiritos, umanas debe respeta animales.

Un rexercor, Julie Stewart, ia dedica sua tota vive a rexerca en Mongol. El descrive la spiritos en un de sua articles:

  • Amin ruhu furni respira e la temperatur de la corpo. Lo dona enerjia a la corpo.
  • Sünesün ruhu es estra la corpo e move tra acua. Lo es la spirito cual, pos mor, pote entra un bebe per comensa un vive nova.
  • Sülde ruhu es la spirito cual dona un person sua personalia. Si la otra spiritos departe de la corpo, on perde sola sua consensa. Ma si esta departe de la corpo, on mori. Esta resta en natur e no revive.