Sistemes de relatas familial

De Vicipedia
Jump to navigation Jump to search

Sistemes de relatas familial determina la condui de persones en un sosia con lunlotra. Si un person (A) nomi un otra (B) "madre", per esemplo, A ave debes fial a B, e B ave debes madral a A. Multe importante es la idea de insesto: en cuasi tota sosias, on no pote sposi un relatada ci on nomi "madre", "padre", "fia", "fio", etc – an si esta person es plu distante relatada en realia. En sosias tribal, esta parolas determina cual parte de un vileta es familia, e esta determina la rol de familias en la vileta o an la tribu.

Termas[edita | edita la fonte]

Ego ("me"): La nom tradisional per la person sentral en un descrive de un sistem de desende.

Relata direta: jenitores e enfantes de ego, per un o plu jeneras.

Relata coladal: la relatadas direta de la sore o frate de un de la relatadas direta de ego.

Cusin paralel: la fios e fias de la frate de la padre o sore de la madre.

Cusin crusada: la fios e fias de la sore de la padre o frate de la madre.

Matrilinial: relatas es determinada sola par segue la desende de un asendente fema tra femas.

Patrilinial: relatas es determinada sola par segue la desende de un asendente mas tra mases.

Ambilinial: la determina de desende par ambos linias.

Matriladal: relatadas a la lado de la madre.

Patriladal: relatadas a la lado de la padre.

Biladal: la relatadas a ambos lados.

Tipolojia de Morgan[edita | edita la fonte]

Tipolojia de Morgan

Sistem hawaian: Esta es la plu clasinte e la plu simple, e distingui sola entre sesos e jeneras.

Sistem inuit: Esta es e clasinte e descrivente. Lo distingui entre sesos e jeneras, e ance entre desendentes direta e coladal. Esta es la sistem de la plu de cultures de Europa, e es la funda de la nomes familial en elefen.

Sistem sudani: Esta sistem es la plu descrivente. No du relatadas ave la mesma termas. Cusines es distinguida par seso, par paralel o crusada, e par la lado (de la madre o de la padre). Per prosimi a esta sistem en elefen, on debe usa espresas como "frate de me padre" e "fia de la sore de mea madre", etc. Esta sistem ia es usada par la romanes antica.

Sistem irocuoi: En ajunta a la distinguis de la sistem inuit, esta sistem distingui entre la tios e la tias de la jenera de la jenitores. Ego nomi la sore de sua madre "madre" e la frate de sua padre "padre", ma la frate de sua madre o la sore de sua padre ave nomes diferente. La enfantes (cusines paralel) de tota madres e padres es donce nomida sores e frates e es regardada como consanguines. La enfantes de la otra tias e tios (cusines crusada) no es sores o frates, e es disponable per sposi. Elefen pote prosimi a esta sistem par usa "padre" per la frate de sua padre, "madre" per la sore de sua madre, "frate" e "sore" per la fio e fia de cualce padre o madre, e parolas como "tia", "tio" e "cusin" sola per persones estra los.

Sistem cro: Simil a la sistem irocuoi, ma lo distingui entre la relatadas a la lado de la madre e los de la lado de la padre. Relatadas a la lado de la madre ave (usual) nomes descrivente, e los a la lado de la padre ave nomes clasinte. Donce, la enfantes de la frate de la madre es cusines (e sposable), ma la sore de la padre e sua enfantes ave la mesma nom. Esta sistem es plu comun en sosias matrilinial.

Sistem omaha: Como la sistem cro, ma reversada: La relatadas a la lado de la madre ave nomes clasinte e los a la lado de la padre ave nomes descrivente. Donce, la enfantes de la sore de la padre es cusines (e sposable), ma la frate de la madre e sua enfantes ave la mesma nom. Esta sistem es plu comun en sosias padrelinial.

Sistem dravidica: Esta sistem ia es descovreda en la desenio de 1950. Lo es simil a la sistem irocuoi, ma con plu detalias. Si on descrive la relatadas entre du persones como mas e fema, e dona "0" a la femas e "1" a la mases e soma los, on pote determina si la otra es sposable o no. En un sosia matrilinial, un resulta nonreta (pe, 3, 5, 7, etc) indica ce el es sposable; en un sosia patrilinial, un resulta reta (pe, 2, 4, 6, etc) indica ce el es sposable.

Eda relativa[edita | edita la fonte]

Multe linguas e cultures usa nomes diferente per edas diferente, spesial per un frate o sore plu vea o plu joven. En elefen, on pote sola usa espresas como "frate plu vea" e "frate plu joven".

Familia en elefen[edita | edita la fonte]

La sistem de relatas en elefen es simil a lo de la sistem "inuit" a supra:

La jenitores de ego es nomida madre e/o padre; la conasedas es nomida frate e/o sore.

La jenitores de la jenitores de ego es avo e ava, o sin indica la seso avi. Tota jenitores plu temprana usa la mesma nomes, ma pote aseta un prefis numeral per indica la jeneras supra la avi plu prosima.

La conasedas de la jenitores de cualce jenera es nomida tio e tia, o sin indica de seso tie. Denova, on pote ajunta un prefis numeral per indica la jenera supra lo de la jenitores.

La enfantes de ego es nomida fia e/o fio, con fie si la seso no importa.

La enfantes de enfantes es nomida neto e neta, o nete sin indica la seso. Plu jeneras su la netes pote ave un numero prefisada per indica la jeneras su la netes.

La enfantes de la ties prima de ego es nomida cusino o cusina o cusin sin indica de seso.

La enfantes de la conasedas de ego es nomida sobrino o sobrina o simple sobrin sin indica la seso. Denova, prefisas numeral pote es ajuntada per indica la jeneras su la sobrines prima. Estas aplica ance a la enfantes de la cusines de ego.

Nomes de membros de la familia

Normal, la numerales no es usada. Donce on usa madre, padre, sore, frate, fia, e fio per membros de sua familia nucleal, ma on usa...

ava e avo per relatas direta de jeneras plu vea,
neta e neto per relatas direta de jeneras plu joven,
tia e tio per relatas colada de jeneras plu vea,
sobrina e sobrino per relatas coladal de jeneras plu jove,
cusinas e cusinos per relatas colada de sua propre jenera.

Si la jenera no es conoseda (per esemplo, con relatas distante) o un parola familial es usada per algun ci no es relatada (como un parola de amosia o aminia), on pote usa la parola cual coresponde plu bon con la edas relativa. Per esemplo, un om vea ci on gusta pote es nomida tio. Per indica respeta grande, on pote usa avo o ava, como alga etnicos de americanes orijinal refere a un diva o otra spirito importante como ava. Simil, on pote usa fio o fia per un person plu joven per ci on senti multe amosia, o usa cusin per un bon ami. En lfn, la usa de metafores es corajida.