Sigmund Freud e psicoanalise

De Vicipedia
Jump to navigation Jump to search


La asendentes de psicoanalise[edita | edita la fonte]

Lo suprende studiantes comun ce psiciatria - cual sinifia la aida medical de la mente - no ia es inventada par Sigmund Freud. Psicoanalise - un spesifada e sinifiante tipo de psiciatria - ia es la bebe de Sigmund Freud. Psiciatristes ia esiste ante Freud, e la plu de psiciatristes oji no es freudian.

La terma psiciatria ia es introduida en 1808 par la mediciste deutx Johann Reil (1759-1813), e lo ta repone lenta la terma plu vea "alieniste". La respeta nova sinialida par la nom nova ia es fundida sur alga bonis sinifiante en la cura de la maladas mental en la dui du de la sentenio de 1700.

(Reil, un mediciste multe amirable, ia sujeste ce la usa de un "piano de gatos" pote aida trae la atende de scizofrenicas catatonica. Un piano de gatos es esata cual la espresa sujeste: un strumento ipotesal en cual un serie de gatos restrinjeda, con crias diferente, ia es stimulada par tira a sua codas. Reil ia dise ce la sona e vide de esta aparata pote trae la atende de la sposa de Lot en la biblia).

On ave tre persones cual merita atende como presedentes importante de psicoanalise: Franz Anton Mesmer, ci ia descovre ipnose; Philippe Pinel, ci ia cambia la modo en cual nos pensa de e trata la maladas mental; e Jean-Martin Charcot, ci es comun videda como la padre de neurolojia.

Franz Anton Mesmer[edita | edita la fonte]

Franz Anton Mesmer

Franz Anton Mesmer (1734-1815) ia nase 23 maio 1734 en Iznang, Deutxland, prosima a la lago Bodensee. El ia reseta sua diploma de dotor medical de la Universia de Wien en 1766. Sua tese dotoral ia conserna la idea ce la planetas influe nosa sania sur tera. El ia sujesta ce la gravita de la planetas pote cambia la distribui de nosa spiritos animal. Plu tarda, el ia cambia sua teoria per asentua magnetia en loca de gravita, e el ia introdui la terma "magnetia animal". Pronto, lo ta es conoseda como mesmerisme.

El ia es capas, en fato, de causa ce persones entra states de transe, an con convulsas, par brandi baras magnetida supra la person. Sua presentas dramosa ia es multe popular per un tempo, an si el ia crede ce cualcun pote ateni la mesma resultas. Vera, alga de sua pasientes ia reseta un grado de lejeri de sua sintomes - un resulta cual ta es investigada par otras.

Cuando el ia es acusada de froda par otra medicistes en Wien, el ia vade a Paris. En 1784, la re de Frans, Louis 16, ia asinia un comite, cual ia inclui Benjamin Franklin, per investiga Mesmer es sua praticas. Los ia conclui ce sua resultas ia es causada par no cosa plu ca sujesta.

An con condena par multe de la elite educada, mesmerisme ia deveni un moda popular en la salones de Europa. Per servi la multe persones povre ci ia veni a el per aida, el ia desinia un tipo de banio en cual los pote senta e teni la baras magnetida par se mesma. Ultima, el ia crea un organiza per instrui otra mesmeristes.

Mesmer ia mori 5 marto 1815 en Meersburg, ance prosima a lago Bodensee, Deutxland.

Un mediciste engles, James Braid (1795-1860), un rexercor multe plu atendente de la fenomeno de Mesmer, ia nomi lo ipnose. Desasosiada de Mesmer, ipnose ta continua per ave un vive longa (si controversa) tra la sentenio de 1900.

Philippe Pinel[edita | edita la fonte]

Pinel a la Salpetriere

Philippe Pinel (1745-1826) ia nase a 20 april 1745, en la vileta San Andre. Sua padre ia es e un capelor e un sirurjiste, un combina comun en acel eda, car ambos careras ia nesesa un mano stable con un lama. Sua madre ia es ance de un linia longa de medicistes.

Philippe ia comensa sua studias plu interesada en leteratur - spesial en Jean-Jacques Rousseau - ca en medica. Ma, pos alga anios studiante teolojia, el ia comensa la studia de medica, e el ia reseta sua diploma dotoral de la Universia de Toulouse en 1773.

Pinel ia move a Montpellier en 1774, do es servida como un ensenior privata per studiantes rica en anatomia e matematica. El ia es asetada a la Sosia Real de Siensas de Montpellier pos presenta du paperes sur la usa de matematica en studias anatomial. El ia move a Paris en 1778, do el ia encontra un cuantia de la siensistes e filosofistes onorada de la eda (incluinte Benjamin Franklin), e el ia deveni familial con la ideas nova de John Locke e la sensalistes franses. An si el no pote pratica en Paris, el ia deveni un scrivor medical bon respetada, conoseda spesial per sua studias de casos atendente e completa.

Un punto de cambias en sua vive ia veni en 1785, cuando un ami de el ia developada un maladia mental cual resulta en sua mori. Pinel ia deveni dedicada a la studia de maladias mental, e ia deveni la xef de la refujeria per omes demente e Paris a Bicetre en 1792. En acel anio, el ia sposi Jeanne Vincent, con ci el ia ave tre fios.

Lo ia es a Bicetre ce el ia ateni sua rol en istoria. Ante ce el ia veni a Bicetre, la omes ia es retenida en cadenas, tratada odiable, e presentada como un demostra dial a la publica como divertis. En 1793, Pinel ia institui un program nova de cura umana, cual el ia nomi terapia moral. La omes ia es donada abitadas limpa e comfortable, e ia es instruida en labora simple ma produosa.

En 1795, el ia es asiniada la rol de la mediciste xef a la ospital famosa tra la mundo a Salpetriere. Asi, ance, el ia furni sua tratas luminada a la maladas mental. En la mesma anio, el ia deveni profesor de patolojia medical a Paris. En 1801, Pinel ia introdui la testo prima sur terapia moral a la mundo.

Pinel es ance recordada per rejeta completa la teoria de posese par demones de maladia mental, e per elimina tratas como sangui de sua ospital. El ia introdui ance otra cosas nova a sua ospital, como vasines e la usa de la stetoscopio. El ia es un mediciste per Napoleon e ia es nomida un cavalor de la "Legion d'Honneur" e 1804. El ia mori en Paris a 25 otobre 1826.

La inovas de Pinel ia es pronto imitada en otra nasiones, par tal notables como William Tuke en England, Vincenzo Chiarugi en Firenze, e Dorothea Dix en la SUA.

Jean-Martin Charcot[edita | edita la fonte]

Charcot a la Salpetriere

Jean-Martin Charcot (1825-1893) ia nase en Paris 29 novembre 1825. El ia reseta sua diploma medical a la Universia de Paris en 1853. En 1860 el ia deveni un profesor a la mesma universia. Du anios plu tarda, el ia comensa labora ance a la Ospital de Salpetriere. En 1882, el ia abri un clinica de neurolojia a la ospital. Lo, e el, ia deveni conoseda tra Europa, e studiantes ia veni de Frans e de otra pais de Europa, per studia la campo nova con Charcot. Entre acel studiantes ia es Alfred Binet e Sigmund Freud joven.

En medica, Charcot es bon conoseda per sua studias de la neurolojia de disturbas de move, la maladias resultante, aneurismes, e la loci de funsionas de la serebro. El es videda como la padre de neurolojia moderna, e la person ci diagnose prima sclerose multiple.

En psicolojia, el es conoseda la plu per sua usa de ipnose per trata susedosa femes ci sufri de la sindrom psicolojial nomida alora isteria. Aora nomida la sindrom de converti, isteria ia envolve un perde de alga funsiona fisiolojial como vide, parla, la sensa de toca, move, etc, ma cual no es fundida sur dana real neurolojial.

Charcot ia crede ce isteria ia es la resulta de un sistem de nervos debil par erita, combinada con la efetos de un esperia traumal. Cuando el ia ipnose esta pasientes, los developa un state simil a la isteria mesma. El ia trova ce, en alga casos, la sintomes ta descrese pos ipnose - an si el ia es sola interesada en studia isteria, no en remedia lo! Otras ta usa ipnose plu tarda como un parte de remedia la problem.

Charcot ia mori en Morvan, Frans, a 16 agosto 1893.

La suconsensa[edita | edita la fonte]

La conseta de la suconsensa, forte asosiada con psicoanalise, ia es prima notada en la discute de "persepis peti" par Leibniz. Par estas, el intende alga stimulas de un intensia multe debil cual pote entra la mente sin la consensa de la person. Oji, on ta nomi los "mesajes sulimina". La realia de tal cosas es multe dutada oji.

Johann Friedrich Herbart (1776-1841) ia es la autor de un testo sur psicolojia, publicida en 1816. Ma, seguente Kant, el no ia crede ce psicolojia pote deveni un siensa. El ia prende la consetas de la asosistes e fusa los con la dinamicas de la monades de Leibniz. Ideas ia ave un enerjia de se mesma, el ia dise, e pote forsa se sur la mente consensa par esede un borda spesifada. Cuando ideas no ia acorda con lunlotra, un o la otra ta es represada, pd forsada su la borda e en la suconsensa. Esta debe remente on de la ideas de Freud, estra la fato ce Herbart ia introdui los un sentenio plu temprana!

Schopenhauer es frecuente videda como la orijina de la suconsensa, e el ia parla multe sur instintos e la natur nonrazonante de umanas, e ia usa libre parolas como represa, resiste, e sulimina! Nietzsche ia parla ance de la suconsensa. Un de sua dises la plu famosa es "Me memoria dise ce me ia fa lo. Mea orgulo dise ce me no ia pote fa lo. Ultima, mea memoria sede".

Un plu prefreudian debe es notada: Karl Eduard von Hartmann (1842-1906). El ia misca la ideas de Schopenhauer con misticisme iudi (la kaballah) e ia scrive la "Filosofia de la suconsensa" en 1869, apena a la ora per influe un neurolojiste joven nomida Sigmund Freud.

On debe comprende ce on ave multe teoristes con poca o no usa per la conseta de la suconsensa. Brentano, la avo de fenomenolojia e esistentialisme, no ia crede ce lo esiste. William James, ance, no crede en lo. E no la psicolojistes de Gestalt. Memorias, per esemplo, pote es comprendeda como retenida en alga state fisical, posible como trasas en la serebro. Cuando stimulada, nos recorda. Ma los no es en la mente - consensa o suconsensa - asta stimulada.

En ajunta a la conseta de la suconsensa, un otra monumento temprana de psiciatria ia es la introdui de la diagnose cauta de maladas mental, comensante con la labora de Emil Kraepelin (1856-1926). La clasi prima ia es de cual el ia nomi "dementia praecox", cual sinifia la dementia de adolese. Kraepelin ia inventada la termas neurose e psicose, e nomida la sindrom de Alzheimer per Alois Alzheimer, ci ia descrive lo prima. On debe ance nota Eugen Bleuler, ci ia crea la terma scizofrenia per repone dementia praecox en 1911.

Sigmund Freud[edita | edita la fonte]

Sigmund Freud
"Anna O" a Bellevue

La nara de Freud, como los de la plu persones, ia comensa con otras. En esta caso, acel otras ia es sua mestre, Joseph Breuer, e un pasiente de Breuer con la nom falsa Anna O.

Anna O. ia es un pasiente de Joseph Breuer de 1880 tra 1882. Con 21 anios, Anna ia spende la plu de sua tempo curante sua padre malada. Anna ia developa un tose mal cual no ave un causa fisical. El ia developa alga difisiles de parla, alora ia deveni muda, e alora ia comensa parla sola en engles, en loca de sua normal deutx.

Cuando sua padre ia mori, el ia comensa refusa comedas, e ia developa un colie strana de problemes. El ia perde la senti de toca en sua manos e pedes, ia developa alga paralise, e ia comensa avente spasmas nonvolente. El ia ave ance alusinas vidal e vide tunelin. Ma cuando spesialistes ia es consultada, no causas fisical per esta problemes ia pote es trovada.

Si tota de esta no sufisi, el ia ave fantasias simil a naras de fes, pendulis de umor, e ia atenta suiside alga veses. La diagnose par Breuer ia es ce el ia sufri de lo cual es nomida alora isteria (aora nomida sindrom de converti), cual sinifia ce el ia ave sintomes cual ia pare como fisical, ma no ia es fisical.

En la seras, Anna ia sumerji en states de cual Breuer nomida "ipnose spontan", o cual Anna ia nomida "nubes". Breuer ia trova ce, en esta states transin, el ia pote esplica sua fantasias e otra esperias de la dia pasada, e ce el senti se plu bon a pos. Anna ia nomi esta episodios "scopi la ximine" e "la remedia de parla".

A veses cuando "scopi la ximine", alga aveni emosiosa ia es recordada cual ia dona sinifia a alga sintom spesifada. La esemplo prima ia veni pronto pos cuando el ia refusa bevi per un periodo. El ia recorda, en sua "nubes", vidente un fem bevi de un vitro de cual un can ia bevi un momento a ante. En cuando recorda esta, el ia esperia sentis forte de repulsa... e alora ia bevi un vitro de acua! En otra parolas, sua sintom - la evita de acua - desapare tan pronto como el ia recorda la aveni radisal, e ia esperia la emosia forte cual ia es propre per acel aveni. Breuer ia nomi esta prosede "catharsis", de la parola elinica per limpi.

Des-un anios plu tarda, Breuer e sua aidor, Sigmund Freud, ia scrive un libro sur isteria. En lo, los ia esplica sua teoria: Cada isteria es la resulta de un esperia traumal, un cual no pote es integrada en la comprende de la mundo de la person. La emosias propre per la trauma no ia es espresada en cualce modo direta, ma no vapori simple: Los espresa se en condui cual, en un modo debil e vagante ofre un responde a la trauma. Esta sintomes es, en otra parolas, sinifiante. Cuando la pasiente pote deveni consensa de la sinifias de sua sintomes (tra ipnose, per esemplo), alora la emosias nonespresada es relasada e no nesesa plu espresa se como sintomes. Lo es analoja a la bisturi de un aseseta, o la drena de un infeta.

En esta modo, Anna ia pote sutrae sintom pos sintom. Ma lo debe es notada ce el ia nesesa Breuer per fa esta: Cuando el ia es en un de sua states ipnosal, el ia debe toca sua manos per serti ce Breuer ia ala, ante parla. E triste, problemes nova continua aveni.

Seguente Freud, Breuer ia reconose ce Anna ia cade en ama con el, e ce el ia es cadente en ama con el, Plu, el ia reporta a cadun ce el ia es ensinta con sua enfante. On pote dise ce el ia desira lo tan forte ce sua mente ia informa sua corpo ce lo ia es vera, e el ia developa un ensinta isterica. Breuer, un om sposida en la eda victorian, ia sesa subita la encontras clinical con Anna, e ia perde tota interesa en isteria. Per favore, on debe reconose ce rexerca resente sujesta ce multe de esta avenis, incluinte la ensinta isterica e la retira rapida par Breuer, ia es probable esajeras o estendes de realia par Freud!

Lo ia es Freud ci ia ajunta plu tarda lo cual Breuer no ia aseta en publica - ce desiras sesal secreta ia reposa a la funda de tota de esta neuroses isterica.

Per completa sua nara, Anna ia spende tempo en un ospitaleta. Plu tarda, el ia deveni un person ativa e bon respetada - la aidor sosial prima en Deutxland - su sua nom vera, Bertha Pappenheim. El ia mori en 1936. El va es recordada, no sola per sua propre atenis, ma como la inspira per la teoria de personalia la plu influente de la sentenio 1900.

Biografia[edita | edita la fonte]

Sigmund Freud ia es naseda 6 maio 1856 en un vileta peti - Freiburg - en Moravia. Sua padre ia es un mercator de lana con un mente agu e un umor bon. Sua madre ia es un fem vivosa, la sposa du de sua sposo e 20 anios plu joven ca el. El ia ave 21 anios cuando el pare sua fio prima, sua cara, Sigmund. Sigmund ia ave du duifrates plu vea e ses conasedas plu joven. Cuando el ia ave 4 o 5 anios - el no ia es serta - la familia ia move a Wien, do el ia abita per la plu de sua vive.

Un enfante briliante, sempre a la alta de sua clase, el ia vade a universia per studia medica, un de la poca elejes per un xico iudi en Wien en acel dias. Ala, el ia deveni envolveda en rexerca su la dirije de un profesor de fisiolojia nomida Ernst Brucke. Brucke ia crede en lo cual ia es alora un idea, popular si radisal, cual nos nomi aora reduisme: "No otra forsas estra la forsas fisical e cimical comun, es ativa en la organisme". Freud ia spende multe anios atentante "redui" personalia a neurolojia, un idea el ta abandona plu tarda.

Freud ia es multe bon a sua rexerca, consentrante sur neurofisiolojia, an inventante un tecnica spesial per tinje selulas. Ma sola un cuantia limitada de postos ia es desponable, e otras ia es ante el. Brucke ia aida el per oteni suporta per studia, prima con la psiciatriste grande Charcot en Paris, e alora con sua competor Bernheim en Nancy, Frans. Ambos de esta siensistes ia es investiga la usa de ipnose con istericas.

Pos spende un tempo corta como un abitante en neurolojia e la dirijor de un departe per enfantes en un ospital en Berlin, el ia reveni a Wien, sposi sua prometeda pasiente Martha Bernays, e comensa sua pratica en neuropsiciatria con la aida de un ami, Joseph Breuer.

Lo es vera ce Freud ia esperimenta con cocaina, ia coraji Martha e sua amis per proba lo, e ia scrive sur sua potias de restora. Plu tarda, el ta regrete sua zelo per la droga e retira sua suporta.

La libros el ia scrive e la lesones el ia presenta ia dona a el fama, ma ance esclui par la comunia medical. El ia trae sirca el alga suportores multe intelijente ci ia deveni la cor de la promove psicoanalise. Triste, Freud ia ave un tende per rejeta persones ci no ia acorda completa con el. Algas ia separa de el como amis; otras ia vade a via per crea scolas de pensa competente.

Freud ia migra a England apena ante la Gera Mundal 2 ia comensa, cuando Wien ia deveni un loca cresente perilosa per iudis, spesial per los tan famosa como Freud. No multe a pos, el ia mori de canser de la boca e mandibula cual el ia sufri per la 20 anios final de sua vive.

Teoria[edita | edita la fonte]

Freud no ia inventa, esata, la ideas de la mente consensa e suconsensa, ma el ia populari serta la ideas. La mente consensa es lo cual on esperia a cualce momento, persepis presente, memorias, pensas, fantasias, emosias, etc. Operante a lado con la mente consensa es lo cual Freud ia nomi la preconsensa, simil a lo cual nos ta nomi oji la memoria disponable: cualce cosa cual es no consensa, ma pote deveni consensa, la memorias tu no es, a la momento, pensante sur ma pote remente se fasil. Nun ave un problem con esta du stratos de mente. Ma Freud ia sujesta ce estas es la stratos la plu peti!

La strato la plu grande es la suconsensa. Lo inclui tota cosas cual no es fasil otenable par consensa, incluinte multe cosas cual ave sua orijinas ala, como nosa instintos o desiras fisical, e cosas cual en poneda ala car nos no pote regarda los, como memorias e emosias asosiada con trauma.

Seguente Freud, la suconsensa es la fonte de nosa motivas, incluinte la nesesadas simple per comedas o seso, compulsas neurosica, o la motivas de un artiste o siensiste. An tal, nos es frecuente forsada per nega o [[resiste (psicolojial|) deveni consensa de esta motivas, e los es comun disponable a nos sola en un forma desemblante.

La id, la ego, e la superego[edita | edita la fonte]

Realia psicolojial, seguente Freud, comensa con la mundo, plen de ojetos. Entre los es un ojeto multe spesial, la organisme. La organisme es spesial car lo ata per survive e reprodui, e es gidada a esta goles par sua desiras fisiolojial: fame, side, la evita de dole, e seso.

La psice de freud.jpg

Un parte multe importante de la organisme es la sistem de nervos, cual ave como un de sua cualias un sensosia per la desiras de la organisme. A nase, acel sistem de nervos es no multe plu ca lo de cualce otra animal, cual Freud ia nomi la Es en deutx, en latina id - pd la "lo", un cosa plu animal ca umana. La sistem de nervos, como un id, traduis la nesesadas de la organisme a fortias motivante nomida, en deutx, Trieven, cual ia es traduida como instintos o desiras. Freud ia ance nomi los esperas. Esta tradui de nesesadas a esperas es nomida la prosede prima.

La id opera par la prinsipe de plaser, cual pote es comprendeda como un comanda per atende la nesesadas pronto. Imajina un enfante fame, criante se blu. El no "sabe" cual el desira en cualce forma adulte; el sabe sola ce el nesesa lo e el nesesa lo aora. La enfante, en la vista freudian, es id cuasi pur. E la id es no plu ca la representor mental de biolojia.

Nonfortunosa, an si un espera per comedas, como la imaje de un amburger, pote es sufisinte per sasia la id, lo no es sufisinte per sasia la organisme. La nesesa deveni plu forte, e la esperas continua. Tu ia pote nota ce, cuando tu no ia sasia un nesesada, lo comensa comanda plu e plu de sua atende, asta on ariva a un punto a cual on no pote pensa de cualce otra cosa. Esta es la desira rompente en la consensa.

Fortunosa per la organisme, on ave un parte peti de la mente, la consensa, cual es liada a la mundo tra la sensas. Sirca esta parte peti de consensa, en la anio prima de la vive de un enfante, alga de la "lo" deveni "me" (Ich en deutx), alga de la id deveni ego. La ego relata la organisme a realia par consensa, e el xerca per ojetos per sasia la desiras cual la id ia crea per representa la nesesadas de la organisme. Esta ativia desiniada per solve esta problemes es nomida la prosede du.

La ego, no como la id, opera seguente la prinsipe de realia, cual dise "sasia un nesesa tan pronto como un ojeto conveninte es trovada". La ego representa realia e, per un estende sinifiante, razona.

Ma, en cuando la ego es atenta manteni la felisia de la id (e ultima la organisme), la ego encontra con ostaculos en la mundo. El ia a veses encontra ance ojetos cual aida el en ateni sua goles. E el reteni un arcivo de esta ostaculos e aidas. Spesial, el rejistra la recompensas e punis presentada par du de la ojetos la plu influente en la mundo de la enfante: mama e papa. Esta arcivo de cosas per evita e la taticas la plu bon per sasia la organisme, ta deveni la superego (Überich en deutx). Lo no es completida asta sirca sete anios. En alga persones, lo es nunca completida.

On ave du aspetas de la superego: Un es la consiensa, cual es un interni de punis e avertis. La otra es nomida la ego ideal, cual deriva de la recompensas e modeles positiva presentada a la enfante. La consiensa e ego idea comunica sua esijes a la ego con sentis como orgulo, vergonia, e culpablia.

Lo es como nos oteni, en enfantia, un colie nova de nesesada e desiras, esta ves de orijinas sosial en loca de biolojial. Nonfortunosa, esta esperas nova pote desacorda con los de la id. On debe nota ce la supraego representa sosia, e sosia desira frecuente no cosa plu ca tu sasia nunca tua nesesadas!

La fases de developa[edita | edita la fonte]

Freud ia nota ce, a tempos variosa en nosa vives, partes diferente de nosa pel dona a nos nosa plaser la plu grande. Teoristes plu tarda ta nomi estas zonas erojen. Lo pare a Freud ce la bebe trova sua plaser la plu grande en suca, spesial a la teta. En fato, bebes ave un tende forte per trae cuasi tota cosas en sua ambiente a contata con sua bocas. Alga tempo plu tarda, la enfante foca sur la plaser anal de reteni e espulsa sua feces. Per tre o cuatro anios, la enfante ia descovre cisa la plaser de toca o frota contra sua jenitales. Sola plu tarda, en nosa maturia sesal, nos ta trova nosa plaser la plu grande en copula. En esta oservas, Freud ia ave la ingredientes per un teoria de fases de developa psicosesal.

La fase bocal dura de nase a sirca 18 menses. La foca de plaser es la boca. Suca e morde es ativias favoreda.

La fase anal dura de sirca 18 menses a 3 o 4 anios. La foca de plase es la ano. Reteni la feces e relasa los es joiada multe.

La fase falin dura de 3 o 4 a 5, 6, o 7 anios. La foca de plaser es la jenitales. Masturba es comun.

La fase ascondeda dura de 5, 6, o 7 a maturia sesal, pd sirca 12 anios. En esta nivel, Freud ia crede ce la desira sesal ia es supresada en la servi de aprende. On debe nota ce, an si la plu de enfantes pare alga calma, sesal, en sua anios en scola, posible un cuarti de los o plu es ocupada par masturba e jua "dotor" (pd esamina partes de la corpo de un otra, normal ascondeda). En la eda represada de Freud, esta enfantes ia es, a min, plu cuieta ca sua corespondentes moderna.

La fase jenital comensa a maturia sesal e representa la reveni de la impulsa per seso, e plu spesifada, la foca de plaser en copula. Freud ia crede ce masturba, seso bocal e anal, omosesalia, e multe otra cosas cual nos trova asetable en adultia oji, ia es nonmatur, pd la person con esta abituas es "blocida" en un nivel plu basa.

Esta es un teoria de niveles vera, sinifiante ce freudianes crede ce tota de nos viaja tra esta fases, en esta ordina, e cuasi prosima a esta edas.

La crise edipal[edita | edita la fonte]

Edipo sieca, gidada par sua fia Antigone, pos la pesta de Tebe

Cada fase ave alga taxes difisil asosiada con lo, do problemes ariva plu comun. Per la fase bocal, esta es desteti. Per la fase anal, lo es la developa de bon abituas de urini e feci. Per la fase falin, lo es la crise edipal, nomida per re Edipo de naras de Elas antica, ci ia mata sua padre (ci el no ia conose) e sposi sua madre (ci el no ia conose ance).

Asi es como la crise edipal opera: La ojeto prima de ama per tota de nos es nosa madre. Nos desira sua atende, sua ama, sua caresas; nos desira el, en un modo cuasi sesal. Ma la fio ave un competor per la ama de sua madre: sua padre! Sua padre es plu grande, plu forte, plu intelijente, e el dormi con la madre, en cuando la enfante peti anela en sua leto peti e solitar. Papa es la enemi.

A sirca la tempo en cual la fio peti reconose esta situa arcetipal, el ia deveni consensa de alga de la diferes plu sutil entre xicos e xicas, plu ca la longia de capeles e stilos de vesti. De sua perspetiva naive, la difere es ce el ave un penis, e xicas no ave un. A esta paso en vive, lo pare a la enfante ce la posese de alga cosa es infinita plu bon ca no posese alga cosa, e donce, el es felis con esta situa.

Ma ultima, la demanda aveni: do es la penis de la xica? Posible el ia perde lo en alga modo. Posible lo ia es cortida. Posible esta pote aveni per el! Esta es la comensa de ansia de castra, un alga mal nom per la teme de perde sua penis.

Donce, car la fio reconose la superioria de sua padre, e teme la perde de sua penis, comensa usa alga defendes per sua ego: El despone sua desiras sesal de sua madre a xicas, e plu tarda, femes; e el identifia con la "atacor", sua padre, e comensa ata plu e plu como el, cual es per dise, un om matur. Pos alga anios en la periodo ascondeda, el entra adolese e la mundo demente de eterosesalia matur. (Recorda ce omosesalia no es "matur", seguente Freud.)

La fia peti comensa ance sua vive amante sua madre, donce nos ave un problem plu: como pote el cambia sua desiras a sua padre afin el pote prosede tra la crise edipo. Freud esplica esta con la idea de invia de la penis: La xica ia nota ance la difere entre xicos e xicas e senti ce el, en alga modo, no es tan bon ca xicos. El ta desira un penis ance, e tota la potia asosiada con lo. A la minima, el ta gusta un sustitui per un penis, como un bebe. Como tota enfantes reconose, on debe ave un padre en ajunta a un madre per ave un bebe, e donce la xica comensa desira sua padre.

Papa, natural, ave ja un amor. La fem joven alora despone sua desiras de padre a xicos e, plu tarda, a omes, e identifia con sua madre, la fem ci ave la om ci la xica ia desira. Nota ce un cosa es mancante asi: La xica no pote sufri de la motiva potiosa de ansia de castra, car el no pote perde lo cual el no posese. Freud ia crede ce la asentia de esta teme grande es la causa de la fato (como el vide lo) ce femes ia es min forte eterosesal ca omes, e un poca min moral.

Ante la lejor deveni tro disturbada par esta esplica min-ca-adulante de la sesalia de femes, on debe nota ce multe persones ia responde ja a lo. Nos va discute lo en la discute plu tarda.

Terapia[edita | edita la fonte]

La terapia ce Freud ia developa ia es plu influente ca cualce otra, e plu influente ca cualce otra parte de sua teoria. Asi es alga de la puntos major:

  • Un atmosfera destensa. La pasiente debe senti libre per espresa cualce cosa. La situa de terapia es, en fato, un situa sosial unica, un do on no debe teme judi sosial o espulsa. En terapia, la terapiste debe cuasi desapare. E per ajunta a la destensa, lampos oscurida, mures cual para sona, e un sofa per reposa completa la sena.
  • Asosia libre. La pasiente pote parla sur cualce cosa. La teoria dise ce, con destensa, la disputa suconsensa ta ultima veni a la surfas. Lo no es tro erante si on vide un similia entre la terapia freudian e sonia. Ma, en terapia, on ave la terapiste, ci es educada per reconose alga indicas de problemes e sua solves ce la pasiente ta nota.
  • Resista. Un de esta indicas es resiste. Cuando un pasiente atenta cambia la discute, no pote continua, comensa dormi, veni tarda, o oblida un encontra completa, la terapiste dise "a!" Esta resistes sujesta ce la pasiente es prosiminte alga cosa en sua asosias libre ce el - suconsensa, natural - trova como menasante.
  • Analise de sonias. En dormi, nos es alga min resistente a nosa suconsensa, e nos ta permete alga cosas, en un forma simbolin, natural, per leva a consensa. Esta esperas de la id dona a la terapiste e pasiente con plu indicas. Multe formas de terapia usa sonias, ma la interprete freudian es distinguida par sua tende per xerca per sinifias sesal.
  • Liscas de parla. Estas es comun nomida liscas freudian o un ereta de parla. Freud ia crede ce los ia es ance indicas de desacorda suconsensa. Freud ia es ance interesada en la bromas ce sua pasientes ia presenta. Vera, Freud ia pensa ce cuasi tota cosas sinifia alga cosa sirca sempre - un era de numeros a la telefon, un verje de la auto, un parola malspeleda, ia es ojetos de studia seria per el. Ma el mesma ia nota, en un responde a un studiante ce ia demanda per cual sua sigar (Freud ia fuma los sin sesa) es un simbol, ce "a veses, un sigar es no plu ca un sigar". (Vera?)

Otra freudianes ia deveni interesada en probas de projeta, como la esamina de Rorschach (o manxas de inca). La teoria su esta probas es ce, cuando un stimula es ambigua, la pasiente ta pleni lo con sua propre temas suconsensa. Ancora, estas pote furni la terapistes con indicas.

Transfere, purga, e intui[edita | edita la fonte]

La sofa famosa de Freud, en London

Transfere aveni cuando un pasiente projeta emosias a la terapiste cual parteni plu a alga otras importante. Freud ia crede ce transfere ia es nesesada en terapia per trae la emosias represada cual ia pesta la pasiente per tan longa, a la surfas. On no pote senti vera coler, per esemplo, sin un person real per ci on senti coleria. La relata entre la pasiente e la terapiste, oposante la imajes popular, es multe intima en terapia freudian, an si on debe comprende ce lo ave sua limitas.

Purga es la versa subita e dramosa de emosia cual aveni cuando la trama es reviveda. La caxa de teletas sur la table no es ala per decora.

Intui refere a consensa de la fonte de la emosia, e la aveni traumal orijinal. La parte major de terapia es completida cuando purga e intui es esperiada. Cual ia debe aveni multe anios pasada - ma no ia aveni car tu ia es tro joven per trata con lo, o su tro multe presas desacordante - ia aveni aora, e tu es a la rua a deveni un person plu felis.

Freud ia dise ce la gol de terapia es simple "per fa ce la suconsensa deveni consensa".

Discute[edita | edita la fonte]

La sola cosa plu comun ca un amira sieca per Freud pare es un odia egal sieca per el. Serta, la disposa la plu coreta ta es a alga loca entre esta estremas. Prima on debe esplora alga defetos en sua teoria.

La parte la min popular de la teoria de Freud es la crise edipal e la ideas asosiada como ansia de castra e invia de penis. Cual es la realia su esta consetas? Lo es vera ce alga enfantes es multe fisada a sua jenitor de la seso oposante, e multe competente con la jenitor de la mesma seso. Lo es vera ce alga xicos es ansiosa sur la diferes entre omes e femes, e an teme ce algun ta corti sua penis. Lo es vera ce alga xicas es ance ansiosa, e desira un penis. E lo es vera ce alga de esta enfantes reteni esta desiras, temes, e intendes a adultia.

La plu de teoristes vide esta esemplos como devias e no universales, esetas e no regulas. Los aveni en familias cual no funsiona tan bon como los debe, la jenitores no es felis con lunlotra, e usa sua enfantes contra lunlotra. Los aveni en familias en cual jenitores desvalua leteral sua fias per es femes, e parla sur corti la penis de un fio ostinante. Los aveni spesial en visinerias en cual informa coreta sur an la plu simple de fatos sesal no es otenable, e enfantes aprende ideas erante de otra enfantes.

Si on vide la crise de edipo, ansia de castra, e invia de penis en un modo plu metafor e min leteral, los es consetas multe usosa: Nos ama vera nosa madres e padres, e ance compete con los. Enfantes aprende jeneral la condui normal de eterosesalia par imita la jenitor de la mesma seso e pratica sur la jenitor de la otra seso. En un sosia dominada par omes, la posese de un penis - pd esente un mas - es plu bon ca no, e la perde de acel prestijia como un mas provoca ansia. E desira de la prestijia, la vantajes, de un om (no la desira de un penis) es un cosa razonable per espeta en un xica con aspiras. Ma Freud no ia intende ce nos vide esta consetas como metafores. Alga de sua seguores, a la otra lado, vide los como metafores.

Sesalia[edita | edita la fonte]

Un critica plu jeneral de la teoria de Freud es sua asentua sur sesalia. Tota, bon e mal, pare como la resulta de la espresa o represa de la motiva sesal. Multe persones ia duta esta, e demanda si on ave cualce otra fortias laborante. Freud se mesma ia ajunta plu tarda la instinto per mori, ma acel ia deveni un otra de sua ideas min popular.

Prima, on debe nota ce, en fato, un cuantia grande de nosa ativias es en alga modo motivada par seso. Si on regarda seria a nosa sosia moderna, on ta trova ce la plu de anunsias usa imajes sesal, ce filmas e televide comun no deveni popular si los no inclui alga "titila", ce la industria de moda es fundida sur un jua continuante de asconde-e-descovre sesal, e ce tota de nos spende un parte sinifiante de cada dia juante la "jua de cortea". Ma nos no senti ancora ce tota vive es sesal.

(Nota ce la clases plu basa - cual inclui la plu de popla - ia es completa consensa de sesa, con la majoria de omes. Ma femes joven de la clase alta ia es la pasientes cual Freud ia encontra cuasi sempre!)

Lo es un bon atribuida per Freud ce el ia pote leva supra la disposas sesal de sua cultur. An sua mestre, Breuer, e la briliante Charcot no pote tota aseta la natur sesal de la problemes de sua pasientes. La era cual Freud ia fa es plu un caso de jenerali tro multe, e no nota la cambias de cultur cual ariva ja. Lo es ironiosa ce multe de la cambia de cultur en disposas sesal ia es, en fato, la resulta de la laboras de Freud!

La suconsensa[edita | edita la fonte]

Un conseta final cual es comun criticada es la suconsensa. Lo no es sujestada ce alga cosa como la suconsensa es la causa de alga de nosa condui, ma la cuantia e la natur esata de la bestia.

Conduistes, umanistes, esistentialistes tota crede ce (a) la motivas e problemes cual pote es atribuida a la suconsensa es multe min ca lo cual Freud ia suposa, e (b) la suconsensa no es la calderon grande de ativia turbante el ia insiste. La plu de psicolojistes oji vide la suconsensa como lo cual nos no nesesa o desira per vide. Alga teoristes no usa la conseta en cualce modo.

A la otra lado, a min un teoriste - Carl Jung - ia proposada un suconsensa cual fa ce la suconsensa de Freud pare pico. Plu sur Jung plu tarda.

Aspetas positiva[edita | edita la fonte]

Persones ave la tende nonfortunosa per "lansa la bebe a via con la acua de banio". Si los no acorda con ideas a, b, e c, los pensa ce x, y, e z debe es falsa ance. Ma Freud ia ave alga bon ideas, tan bon ce los ia es incluida en multe otra teorias, a un punto do nos oblida per dona el la lodas.

Prima, Freud ia fa ce nos deveni consensa de du fortias enorme e sua esijes sur nos. Cuando tota ia crede ce persones ia es fundal razonante, el ia mostra como multe de nosa condui ia es fundida sur biolojia. Cuando tota ia conseti de persones como culpable como individuas per sua atas, el ia mostra la fortia de sosia. Cuando tota ia vide mas e fema como roles determinada par natur o Dio, el ia mostra cuanto los depende de la dinamica familial. La id e la supraego - la espresas mental de biolojia e sosia - va es sempre con nos en alga forma o un otra.

Contribui du es la teoria fundal, vadente a retro a Breuer, de alga sintomes neurosica causada par traumas psicolojial. An si la plu de teoristes no plu crede ce tota neuroses pote es esplicada en esta modo, o ce lo es nesesada ce on revive la trauma per deveni plu sana, lo ia deveni un comprende comun ce un enfantia plen de descura, maltrata, e trajedia tende resulta en un adulte nonfelis.

Contribui tre es la idea de defendes de la ego. An si tu no es comfortable con la idea de la suconsensa de Freud, lo es clar ce nos parteni de la manipulas peti de realia e nosa memorias de acel realia per conveni nosa propre nesesas, spesial cuando acel nesesas es forte. Aprende como reconose esta defendes: Tu va trova ce la posese de nomes per los va aida tu per nota los en otras e en se mesma.

E final, la forma fundal de terapia ia es, per la plu parte, fisada par Freud. Esta alga terapias de conduisme, la plu de terapia es ancora "la terapia de parla", e ancora inclui un ambiente destensada fisical e sosial. E, an si otra teoristes no gusta la idea de transfere, la natur multe intima de la relata de terapia es jeneral asetada como importante per susede.

Alga de la ideas de Freud es clar liada a sua cultur e eda. Otra ideas no es fasil demostrada. Alga pote es la resulta de la personalia e esperias de Freud mesma. Ma Freud ia es un oservor eselente de la natur de vive de umanas, e cuantias sufisinte de lo cual el ia dise es ancora pertinente oji, ce el va es un parte de testos de personalia per multe anios de aora. An cuando teoristes ariva a ideas multe diferente de Freud, los compara sua ideas con los de Freud.