Serpentes e scalas
Serpentes e scalas, orijinal nomida moksha patam, es un jua de table antica de India per du o plu juores, videda oji como un jua clasica tra la mundo. Lo es juada sur un table de jua con cuadros numerida, orijinal 100 cuadros, ordinada en un grilia de 10 par 10. Un cuantia de imajes de "scalas" e "serpentes" es primida sur la table, cada liante du cuadros spesial. La ojeto de la jua es ce on naviga sua peso, seguente lansas de la dado, de la comensa (cuadro 1) a la fini (cuadro 100), aidada par asende sur scalas, o impedida par la serpentes.
La jua es un corsa simple fundida sur no plu ca acaso, e es popular con enfantes joven. La varia istorial ia ave sua radises en lesones sur moralia, en cual la progresa par la juor a supra representa un viaja de vive, complicada par virtuas (la scalas) e vilia (la serpentes)
La jua ia es popular en India antica con la nom moksha patam. Lo es ance asosiada con filosofia tradisional de induisme, cual contrasta la forsas de carma (destina) e desira. Un varia nomida gyan o jnan chaupur (la jua de sajia) es asosiada con filosofia de jainisme. La leson moral de la jua ia es ce un person pote ateni moksha (salva) par sua atas bon, ma reincarne como un forma de viventes plu basa par sua atas mal.
Un varia temprana de a jua ia conteni 5 scalas e 12 serpentes, con 100 cuadros. La cuadros de virtua ia es fida (un scala cual comensa a cuadro 12), fidablia (51), jenerosia (57), sabe (76), e astenisme (78). La cuadros de malia ia es nonobedi (un serpente comensante a cuadro 41), vania (44), vulgaria (49), fura (52), menti (58), enebria (62), deta (69), omiside (73), furia (84), avaria (92), orgulo (95), e lasivia (99). Nota ce la jua ia ave multe plu serpentes ca scalas!
Cuando la jua ia es introduida a England victorian en 1892, la virtuas e vilias ia es reponeda con varias engles, con la intende de refleta plu bon la prinsipes de moralia victorian. Cuadros nomida sasia, grasia, e susede ia es atenida par la scalas de frugalia, repenti, e industria, e la serpentes de favore, nonobedia, e pigra causa ce on fini en maladia, desonora, e povria.
Cuando la jua ia es plu developada par la industria de primi e la industrias nova de diverti, la lista ia cambia de ves a ves. Entre la virtuas popular ia es la cuatro virtuas clasica - modera, cautia, coraje, e justa. Un otra colie de posible serpentes e scalas es la 7 pecas e la 7 virtuas listada par Dante Alighieri:
Pecas:
- umilia, simplia
- compatia, servi
- modera, autocontrola
- virjinia, puria sesal
- pasientia, pas
- carita, jenerosia
- asiduia, produosia
Virtuas:
- orgulo, vania
- invia, jelosia
- glotonia, porcinia
- lasivia, desira sesal
- coleria, furia
- avaria, materialisme
- pigria, osiosia
A la otra lado, alga formas no inclui cualce virtuas o pecas!