Psicolojia temprana

De Vicipedia
Jump to navigation Jump to search


Psicolojia como nos ave oji no ia apare subita sur la sena inteletal. Lo no es posible per dise esata cuando lo ia comensa, o ci ia es la fundor. En loca, nos pote sola indica un cuantia de corentes cual porta nos de filosofia e siensas natural a alga cosa reconosable como psicolojia. Esta capitol va esamina a du de esta corentes "primeval": asosisme como la comensa de un teoria cognisial, e la introdui de cuanti en la formas de psicofisica e la proba de intelijentia.

Asosisme[edita | edita la fonte]

Asosisme es la teoria ce la mente es composada de elementos, comun refereda como sensas e ideas, cual es organizada par asosias variosa. An si la idea orijinal pote es trovada en Plato, lo es Aristotele ci reseta la onora per developa lo. Aristotele ia ave cuatro leges de asosia cuando el ia esamina la prosedes de rejistra e recorda:

1. La lege de contata o prosimia: Cosas o aveni cual es prosima a lunlotra en spasio o tempo tende es liada con lunlotra en la mente. Si tu pensa de un tas, tu pote pensa de un plateta. Si tu pensa de prepara cafe, tu pote alora pensa de bevi la cafe.

2. La lege de frecuentia. La plu frecuente du cosas o avenis es liada, la plu potiosa es la asosia. Si tu ave un ecler con tua cafe cada dia, e ia fa tal per la 20 anios pasada, la asosia va es serta forte.

3. La lege de similia. Si tu cosas es simil, la pensa de un va tende stimula la pensa de la otra. Si tu pensa de un jemelo, lo va es difisil no pensa de la otra. Si tu recorda un aniversario, tu pote trova ce tu pensa ance sur otras.

4. La lege de contrasta. A la otra lado, vide o recorda alga cosa pote ance stimula la recolie de alga cosa completa oposante. Si tu pensa de la person la plu grande ce tu conose, tu pote subita pensa ance la person la plu corta. Si tu es pensante sur aniversarios, la un cual ia es completa diferente de tota la otras es probable ance recordada.

Asosia, seguente Aristotele, aveni en la "sensa comun". Lo es en la sensa comun ce la apare, la trama, la odor e sabor de un poma, per esemplo, ia junta con lunlotra e deveni la idea de un poma.

Per du mil anios, esta cuatro leges ia es suposada como vera. San Thomas Aquinas ia asetada lo completa. Ma nun ia pare interesa en asosia. Lo ia es videda sola como un descrive simple de un aveni comun. Lo ia es videda como la ativia de razona pasiva. La astrata de prinsipes o esenses - multe plu sinifiante per filosofiste - ia es la domina de razona ativa.

En la Lumina, filosofistes ia comensa deveni interesada en la idea de asosia denova, como un parte de sua studias de vide e sua interesa en epistemolojia. Hobbes ia comprende esperias complicada como asosias de esperias simple, cual es asosias de sensas. La metodo de asosia, seguente Hobbes, es coere (prosimia), e la fator fundal de fortia de asosia ia es repete (frecuentia)

John Locke, ci rejeta la posible de ideas inata, ia fa ce sua sistem ia es dependente de un asosia de sensas a ideas simple. Ma el ia distingui entre ideas de sensas e ideas de refleta, cual sinifia razona ativa. Sola par ajunta ideas simple de refleta a ideas simple de sensa, on pote deriva ideas complicada. El ia sujesta ance ce emosias complicada ia deriva de dole e plase (ideas simple) asosiada con otra ideas.

David Hume ia trata asosia zelosa. Recorda ce el ia vide tota esperias como ave no realia sustantial su los. Donce, cualce coere la mundo (o la ego) pare ave es un caso de la aplica simple de esta leges natural de asosia. El ia lista tre:

1. La lege de sembla, pd similia.
2. La lege de prosimi spasial.
3. La lege de causa e efeto, pd prosimi tempal.

David Hartley (1705-1757) ia es un mediciste engles ci ia es el ci ia populari la idea de asosisme, spesial en un libro nomida "Oservas de Umanas". Sua asentua ia es sur la lege de prosimi (en spasio e tempo) e la lege de frecuentia. Ma el ia ajunta un idea el ia trae de Isaac Newton: Esta asosia ia es un caso de "vibras" ajustada en la nervos! Esta ideas fundal es multe simil a los de D. O. Hebb en la sentenio de 1900.

James Mill (1773-1836) ia detalia ance sur la asosisme de Hume. El ia vide la mente como funsionante pasiva par la lege de prosimi, con la lege de frecuentia e la lege de vivin "impresante" la asosia. Sua asentua sur la lege de frecuentia como la clave a aprende ia fa sua ideas multe simil a la conduistes de la sentenio de 1900. Ma el es la plu famosa per sua rol como padre de John Stuard Mill.

John Stuart Mill[edita | edita la fonte]

J. S. Mill, par Watts, 1973

"Ce tan poca osa es noncomun aora marca la peril xef de la eda".

John Stuart Mill ia nase 20 maio 1806 en London. Sua padre ia es James Mill, un istoriste, filosofiste, e teoriste sosial. Sua madre ia es Harriet Barrow, e lo pare ce el ave cuasi no influe sur John. Sura padre ia deside ce el ta usa la prinsipes de utilitarisme e asosisme (con la consulta de sua bon ami, Jeremy Bentham) per educa John "siensal".

Lo ia pare prosede bon: John ia comensa aprende elinica a tre anios, latina a oto anios. A 14 anios, el ia studia franses, matematica, e cimica en Frans. A 16 anios, el ia comensa labora como un notario per sua padre a Casa de India, la xeferia de la Compania de India Este. Par 18 anios, John ia es publicinte articles sur la filosofia de utilitarisme.

Ma, a 20 anios, el ia sufri un crise menta, cual el ia descrive en sua autobiografia (1873). El ia atribui la crise, sin duta coreta, a sua educa rijida.

En 1830, el ia encontre Harriet Taylor, un fem sposida. El ia resta fidante a el asta sua sposo ia mori 21 anios plu tarda, cuando ia sposi final. Triste, el ia mori sola sete anios plu tarda.

En esta periodo, el ia servi como un esaminor per la Compania de India Este. El ia ance servi como un membro libraliste de Parlamento de 1865 a 1868. El ia dise "Conservalistes no es par nesesa stupida, ma la plu de persones stupida es conservalistes". El ia mori a sua casa en Avignon, Frans, 8 maio 1873.

Sua obra la plu conoseda es "Sur libria", publicida en 1859. Sua obra la plu importante regardante siensa e psicolojia es "Un sistem de lojica", prima primida en 8143 e continuante tra multe plu editas tra la resta de la sentenio de 1800.

El ia comensa con la fundas instituida par Hume, sua padre James Mill, e otras:

1. Un impresa sensal resulta en un representa mental (idea o imaje);
2. Si du stimulas es presentada con lunlotra e repeteda, los crea un asosia en la mente;
3. La intensia de tal un dupli pote servi la mesma funsiona como repete.

Ma el ajunta ce asosias pote es plu ca la soma simple de sua partes. Los pote ave cualias o atribuis diferente de la partes en la mesma modo ce acua ave cualias diferente de la idrojen e osijen cual composa lo. Donce, J. S. Mill ia developa un asosisme cual es plu como "cimica mental" ca "soma mental".

J. S. Mill ia acorda con Hume ce tota cual nos pote sabe de nosa mundo e nosa ego es cual nos esperia, ma el nota ce jenerali permete ce nos parla con alga confida sur cosas estra esperia. E el ia crede ce on ave causas real per fenomenos coerente.

Esta es frecuente nomida fenomenalisme. El ia defini materia, per esemplo, como "la posiblia permanente de sensa". Esta perspetiva ta ave efetos profonda sur positivisme lojical de la sentenio de 1900 (pd Wittgenstein, Ayer, Schlick, Carnap, e otras) ci ia furni la funda filosofia per la plu de conduistes.

El ia promove un metodo siensal cual foca sur indui: Jeneralis de esperias condui nos a teoria, de cual nos pote alora developa ipoteses alternativa; Nos vade per proba esta ipoteses par oserva e esperimenta, la resultas de cual permete ce nos boni la teoria, etc. Esta idea sirculo de progresa siensal es conoseda como la metodo de ipotese e dedui. En esta modo nos pote lenta construi leges de natur en cual nos pote es cresente confidante. Esta metodo ia es multe popular entre la siensistes de sua eda.

Plu spesifada, el introdui sinco prosedes per mostra causa. La prosedes plu simple es estas:

1. La metodo de acorda: Si un fenomeno aveni en du situas diferente, e esta du situas ave sola un cosa en comun, acel "cosa" es la causa (o efeto) de la fenomeno.
2. La metodo de diferes: Si un fenomeno aveni en un situa ma no en un un otra, e acel du situas ave tota en comun estra un cosa, alora acel "cosa" es la causa (o efeto) de la fenomeno.
3. La metodo de varias acompaniante: Si un fenomeno varia coerente con la varias de un otra fenomeno, la un es la causa o efeto, o es en alga otra modo envolveda en la causa de la otra. Esta es, natural, la funda de corelata, cual, an si lo no pote demostra la dirije de causa, indica vera la esiste de un relata causal.

Regardante psicolojia, el ia razona ce lo pote serta, en tempo, deveni un siensa, ma no probable un siensa esata. Predise la condui de umanas pote es sempre esta nosa capasias, e donce nos debe limita nos mesma a parlante sur tendes,

Sua utilitarisme ia reconose ce felisia no es restrinjeda a plaser fisical (o la evita de dole), ce lo pote esiste tipos o cualias diferente de felisia. "Lo es plu bon ce on es Socrate nonsasiada ca ce on es un fol sasiada". Donce, an ci nos pote serta comensa como un vivente simple cual xerca per plaser, tra tempo nos pote developa motivas multe plu umaniste. Ultima, esta sinifia ce valuas moral alta pote es enseniada, e no depende sola sur cualias de carater inata.

Cuando regardante casos sosial, J. S. Mill ia aplica sur utilitarisme estendeda: Esce un institui spesifada ajunta a la bonstate umana? O esce nos ave alternativas plu bon? El razona, per esemplo, ce femes ta es permeteda per vota car la interesas de femes pote ajunta un ecuilibra a la interesas de omes, e pote resulta en un sosia plu bon. El ia razona ce libria personal ta permete individuas creosa per contribui plu fasil a sosia. E el ia nota ce capitalisme de la mercato libre tende resulta en nonegalia e povria, e nos ta es plu bon servida par un forma de sosialisme.

Thomas Brown (1778-1820) de la Scola Scotes ia dona la detalias final a asosisme: Sua leges de sujeste (sua nom per asosia) ia es sembla, contrasta, e prosimi en spasio e tempo, la mesma como los de Aristotele. El ia ajunta un colie de leges minor - dura, vivosia, frecuentia, e resentia - cual ia forti sujestes. Alora el ia considera ance la grados de coesiste con otra asosias, diferes fisical de mente o tempera, situas diferente de la momento, la state de sania o efetosia de la corpo, e abituas pasada. Final, el ia comprende asosia como un prosede ativa en un mente ativa e oliste.

Alexander Bain (1818-1903, un ami de vive intera de J. S. Mill, ia lia asosia con fisiolojia. Asetante la lege de prosimi, similia, e frecuentia, el ia vide los, como David Hartley, como neurolojial. El ia ajunta la lege de asosia composada, cual dise ce la plu de asosias es entre grupos intera de otra asosias. E el ia ajunta la lege de asosia construinte, cual dise ce nos pote ance, ativante, creante, ajunta a nosa asosias par nos mesma.

Un de la prinsipes fundal de Bain es la prinsipe Spencer-Bain: La frecuentia o probablia de un ata crese si lo es segueda par un aveni plasente, e descrese si lo es segueda par un aveni dolente. Esta es, natural, la mesma prinsipe cual la conduistes va developa un sentenio plu tarde.

Bain ia ave un rol an plu grande en la istoria de psicolojia. Prima, el es comun onorada per scrive du de la testos de psicolojia la plu temprana - "La sensas e la inteleto" (1855) e "Emosias e la vole" (1859), ambos cual estende tra multe editas, e ia es usada, per esemplo, par William James. El ia ance funda la prima jornal en engles, nomida "Mind" (mente), en janero 1876.

Hermann Ebbinghaus[edita | edita la fonte]

Ebbinghaus

La persones presedente ia es vera filosofistes, no sientistes. La psicolojiste ci ia atenta prima studia asosia siensal ia es Hermann Ebbinghaus.

Hermann Ebbinghaus ia nase a 23 janero 1850, en Barmen, Deutxland. Sua padre ia es un mercator rica, ci ia coraji sua fio per studia. Hermann ia atenda la Universia de Halle e la Universia de Berlin, e ia reseta sua diploma dotoral de la Universia de Bonn en 1873. Cuando viaja tra Europa, el ia vide un copia de "Elementos de psicofisica" par Fechner, cual ia influe el per studia psicolojia.

Ebbinghaus ia comensa sua rexerca a sua casa en Berlin, e ia publici un libro nomida "Sur memoria: un investiga en psicolojia esperimental" en 1885. Sua rexerca ia envolve la memori de silabas sin sinifias, cual es composada de un consonante, un vocal, e un otra consonante. El ta eleje 12 parolas, e alora atenta memori la lista. El ia recorda la cuantia de atentas nesesada, e la efetos de varias como la reaprende de listas vea, o si la silabas sujeste un sinifia. La resultas ia es confirmada e es ancora valida oji.

El ia scrive ance la article prima sur la esamina de intelijentia de enfantes en scola, e ia crea un esamina de completa un frase cual ia deveni un parte de la esamina Binet-Simon. El ia ance publici testos sur psicolojia en 1897 e 1902 cual ia es popular per multe anios. Ebbinghaus ia mori en 1909, un asendente clar per la promove cognisial de oji.

La leges de asosia ta continua ave un influe potiosa en psicolojia. La conduistes ia foca sur asosias de stimula-stimula e stimula-responde. La psicolojistes de Gestalt ia developa la asosias variosa los ia nomi la leges de Prägnanz. Entre la psicolojistes cognisial, on ave teorias variosa de asosia semantica. E la psicolojistes fisiolojial parla sur la funda neurolojial per asosia. La idea par es con nos permane. Ma alora, como la filosofistes elinica e medieval ia sabe, asosia es sola un descrive simple de un aveni comun!

Psicofisica[edita | edita la fonte]

Ernst Heinrich Weber

Repetente, filosofistes ia dise sin duta ce psicolojia no pote es un siensa. La ativias e la contenis de la mente no pote es mesurada, e donce un empiricalia como lo atenida par fisica e cimica ia es ultra sua estende. Psicolojia ta resta sempre sujetal.

Esta ia cambia final en la sentenio de 1800 temprana. Ernst Weber (1795-1878 ia nase 24 junio en Wittemburg, Deutxland, numero tre de 13 enfantes. El ia reseta sua diploma dotoral de la Universia de Leipzig en 1815, en fisiolojia. El ia comensa ensenia ala direta pos gradua, e ia continua asta sua jubilea en 1871.

Sua rexerca ia es xef sur la sensas de toca e cinestesia (la esperia de posa e move de musculos). El ia es la person prima per demostra clar la esiste de cinestesia, e el ia mostra ce toca ia es vera un colie de sensas, composada de sensas per presa, temperatur, e dole.

Sua intereses ia direta el a alga tecnicas: Prima, on ave la limita de du puntos, cual inclui la mesura de la distantia la plu peti notable per toca a partes variosa de la corpo. Per esemplo, la lingua ia ave la limita la plu peti (un mm), e la dorsa la plu grande (60 mm).

Un otra tecnica usa cinestesia: La difere apena notable es la difere la plu peti de pesa cual un person pote persepi cuando teninte du cosas. El ia descovre ce la difere apena notable ia es un frato de la pesas usada. Si tu teni un pesa de 40 kg en un mano, tu ta pote reconose ce un pesa de 41 kg en la otra es diferente. Ma si lo ia es un peso de 20 kg, tu ta pote reconose un difere de sola dui kg. En otra parolas, nos pote reconose un 1/40 difere, con cualce pesa.

Esta es nomida la lege de Weber, es la lege prima relatante un stimulo fisical con un esperia mental.

Gustav Fechner[edita | edita la fonte]

Gustav Fechner

Gustav Fechner ia nase 1 april 1801. Sua padre, un pastor de un vileta, ia mori temprana en la enfantia de Gustav, donce el, con sua madre e frate, ia vade per abita con sua tio. En 1817, con 16 anios, el ia vade a via per studia medica a la Universia de Leipzig (Weber ia es plu interesada par ensenia). El ia reseta sua diploma de dotor medical en 1822 con 21 anios.

Ma sua interesas ia move a fisica e matematica, e el ia gania sua mone par ensenia privata, tradui, e a veses dona lesones. Pos scrive un paper sinifiante sur eletrica en 1831, el ia es invitada per deveni un profesor de fisica a Leipzig. Ala, el ia deveni ami con un cuantia de persones, incluinte Wilhelm Wundt, e sua interesas ia move denova, esta ves a psicolojia, spesial vide.

En 1840, el ia sufri un crise mental e ia debe resinia sua posto como la resulta de depresa sever. A sua plu mal, el ia resta en sua salas solitar, evitante lus, cual ia feri sua oios, e an ia pinta sua sala negra. Cuando el reposa en sua leto un matina, 22 otobre 1850, el ia reali subita ce lo ia es vera posible per lia la mundo fisical e mesurable con la mundo mental, suposada como nonabri a investiga siensal! Cuando sua problem ia boni, el ia reveni a scrive e esperimenta, usante se mesma como un sujeto.

Como multe otras de sua eda, el ia trova la duple-aspetisme de Spinoza convinsente e trova en panspicisme un cosa simil a un relijio personal. Su la nometa Dr Mises, el ia scrive alga satiras sur medica e filosofia. Ma el ia usa lo ance pe comunica, tipal en un modo comica, sua perspetiva spirital. Como un panpsiciste, el ia crede ce tota natur ia es vivente e capas de consensa de un grado o un otra. An la planeta mesma, el ia crede, ave un spirito. El ia nomi esta vista la vista de la dia, e oposada lo a la vista de note de materialisme.

El ia sujesta ce nosa vive aveni en tre pasos: la vive fetal, la vive comun, e la vive pos mori. Cuando nos mori, nos spirito ta junta con otra spiritos como parte de un spirito suprema.

Lo ia es duple-aspetisme cual ia condui el a studia (e nomi) psicofisica, cual el ia defini como la studia de la relatas sistemal entre avenis fisical e mental. En 1860, el culmina sua carera par publici "La elementos de psicofisica".

En esta libro, el ia introdui un espresa matematical de la lege de Weber. La espresa pare como esta:

*R/R = k

cual sinifia ce la i de la cambia minima en un stimula detetable (*R) a la fortia de la stimula (R) es un constante (k). (R es per la deutx Reiz, cual sinifia stimula.) O:

S = k log R

en cual S es la sensa esperiada.

Fechner ia mori 28 novembre 1887.

Cual Weber e Fechner ia mostra es cual fa ce los es multe plu sinifiante ca sola la lege de Weber es ce avenis psicolojial ia es vera liada a avenis fisical e mesurable en un modo sistemal, cual tota ia crede es nonposible. Psicolojia pote es un siensa!

La inova du de cuantia ia es la mesura de alga cosa multe plu complicada, e multe plu psicolojial: intelijentia. Nos debe onora du mentes grande: Francis Galton en England, e Alfred Binet en Frans.

Francis Galton[edita | edita la fonte]

Francis Galton

Francis Galton ia nase 16 febrero 1822, prosima a Birmingham, England. El ia es la plu joven de sete enfantes, e la cusin de Charles Darwin. Sua padre, un bancor rica, ia insiste educa Francis a casa, spesial car Francis ia pote leje cuando el ia ave no plu ca 2 1/2 anios!

Plu tarda en enfantia, el ia es enviada a scola abitada, cual el ia despeta e critica an en adultia. A 16 anios, el ia vade per studia medica a King's College a Oxford. El ia fini sua diploma a Cambridge en 1843, con 21 anios.

Sua padre ia mori, cual fa ce Galton ia deveni un aristocrata joven rica. El ia viaja multe e ia deveni un membro de la Sosia Jeografial Real, per cual el ia developa mapas de teritorios nova e recontas de sua aventuras. El ia deveni presidente de acel institui en 1856

Galton ia ave un tende per mesura tota cosas - estendente an a la mesura de la gluteos de la femes el ia encontra en sua viajas en Africa (alga cosa el ia debe fa de un distantia, natural, par trianguli). Esta interesa en mesura ia condui a sua inventa de la mapa de clima (incluinte la altas, basas, e frontes - termas cual el ia introdui) e per sujesta la usa de impresas de ditos a Scotland Yard (la polisia sentral de Britan).

Sua osese ia condui ultima a sua atentas a mesura intelijentia. En 1869, el ia publici "Jenio eritada: un investiga de sua leges e segues", en cual el ia demostra ce la enfantes de jenios tende es jenios se mesma.

En 1874, el ia produi "Omes engles de siensa: sua natur e eleva" fundida sur leteras de sonda longa, enviada a miles de siensistes reconoseda. En esta volum, el ia nota ce, an si la potensia per intelijentia alta es ancora clar eritada, lo nesesa es nurida per developa sua plen grandia. Spesial, la educa vasta e libral furnida par la sistem de scolas en Scotland ia es demostrada como multe plu superior ca la sistem de England cual el ia odia tan multe.

En 1883, el ia scrive "Rexerca en la capasia umana e sua developa". Esta ta es la prima ves ce algun ia compara jemelos identica e fratal, un metodo aora videda como ideal cuando investiga casos de natur contra eleva.

En 1888, el ia publici "Corelatas e sua mesura, xef de datos antropometrial". Como la titulo sujesta, el ia es Galton ci ia inventa corelata, e ance la grafica de sperde e la regresa a la promedia. Plu tarda, Karl Pearson (1857-1936) ta descovre la formula matematical de corelata.

Francis Galton ia mor en 1911, pos un vive estrema produinte.

Alfred Binet[edita | edita la fonte]

Alfred Binet

Naseda 11 julio 1851 en Nice, Frans, Alfred ia es un enfante solitar. Sua madre, un artiste, ia eleva el par se mesma pos un divorsa de sua padre, un mediciste.

El ia comensa studia medica, ma ia desideda per studia psicolojia par se mesma. Car el ia es rica autonom, el ia es libre per fa cual el gusta! El ia labora con la psiciatriste Charcot a la dementeria a La Salpetriere, do el ia studia ipnose.

En 1891, el ia move a Paris per studia a la laboreria de psicolojia fisolojial a la Sorbonne, do el ia developa un varia de interesas en rexerca, spesial los cual envolve diferes individua. En 1899, el e sua studiante graduada, Theodore Simon (1873-1961) ia es encargada par la governa de Frans per studia retarda en la scolas franses, e per crea un esamina per difere enfantes normal de enfantes retardada.

Pos sposi, el ia comensa studia sua du fias e el esamina los con taxes simil a los creada par Piaget, e otra esaminas. Esta ia resulta en la publici de "La studia esperimental de intelijentia" en 1903.

En 1905, Binet e Simon ia produi la "Scala de intelijentia de Binet-Simon", la esamina prima cual ia permete esamina direta de intelijentia. Los estende la esamina a enfantes normal en 1908, e a adultes en 1911.

Binet ia crede ce intelijentia es complicada, con multe fatores, e no como un cosa simple o singular. El no ia gusta la usa de un numero singular, como lo developada par William Stern en 1911, nomida la IQ (de engles "intelligence quotient"). El ia crede ance ce, an si jenetica ave, posible, limitas culminante de intelijentia, la plu de nos ave multe spasio per boni con la tipo coreta de educa.

El ia averti ce sua esaminas debe es usada con restrinje: An un enfante de du anios su sua nivel de eda pote plu tarda mostra se como plu briliante ca la plu! El ia teme ce IQ ta prejudi enseniores e jenitores, e ce persones ta tende vide lo como fisada e para suporta sua enfantes prematur ci ia ave numeros basa.

El ia sujesta alga cosa cual el ia nomi ortopedia mental: eserses en atende e pensa cual pote aida enfantes nonvantaje "aprende como aprende". El ia mori en 1911, un om multe plu avansada ca sua sosia, e plu sajia ca la plu.

La temes cual Binet ia espresa ia es bon fundida. Per esemplo, Charles Spearman (1863-1945) ia introdui la idea ce "intelijentia jeneral" (g) es real, unial, e eritada.

Multe plu mal ia es la atas de Henry Goddard (1866-1957). El ia tradui la esamina Binet-Simon a engles. El ia studia un familia en Jersey Nova el ia nomi la Kallikaks. Algas de los ia es normal, ma multe ia es "feebleminded" (con mentes debil, sua propre terma). El ia trasa sua jenealojia per suporta la idea de erita de intelijentia. Car el ia crede ce on ave un lia forte entre mentes debil e crimin, el ia sujesta ce statos institui programes de sterili de los ci ave mentes debil. 20 statos ia crea leges per esta.

Goddard ia esamina ance migrantes entrante la SUA, cuando suplicada par la Service de Migra. Sua esaminores ia trova de entre 40 e 50% de migrantes ia ave mentes debil, e los ia es pronto deportada. El ia ance sujesta ce nasiones spesifada como ave plu mentes debil ca otras. Nota bon ce esta migrantes parla rara multe engles, e ia es esaminada en un prosede misera de pasa tra la burocratia de Isola Ellis, pos un viaja longa ultra la Atlantica en salas peti e folida (e cual senti de vomita!).

Un otra terma sujestada par Galton es eujenetica. Lo es la politica de ave persones reprodui seguente alga norma de intelijentia (e otra cualias), e la sterili de los ci no ateni acel normas. Lo ia deveni un realia instituida en 1907, cuando la lejeria de Indiana ia crea un lege cual permete la sterili de "defetosas" posible. Un Ofisia de Arcivos per Eujenetica ia es instituida en Cold Spring Harbor, e sua legores ia desinia leges en 1914 cual ia es promoveda como modeles per la nasion intera.

Virginia ia adotada tal un lege en 1924. Emma Buck, sua fia Carrie e un enfante neta Vivian, ia es judida como defetosa, e sua caso (Buck v Bell) ia es enviada a la Corte Suprema. La corte, su Oliver Wendell Holmes, ia suporta la leges de sterili. Holmes ia dise:

"Lo es plu bon per la mundo si, en loca de espeta per esecuta la projenias dejenerada per crimines, o de permete ce los fami per sua stupidia, sosia pote preveni los ci es clar nonconveninte de continua sua tipo. La prinsipe cual susta vasini compulsada es sufisinte vasta per covre la corti de la tubos de la utero. Tre jeneras de stupidas es sufisinte".

An si siensistes ia disputa la razona su la leges de sterili, 33 statos ia adota los, e sirca 65 000 sitadanes american ia es sterilida. La Nazis ia funda sua leges de eujenetica sur la leges american e ia sterilida 350 000. Eujenetica ia deveni gradal nonpopular cuando la teror de Deutxland nazi ia deveni publica, e lo sesa gradal en la desenio de 1940. Ma la Corte Suprema no ia reversa sua opina sur la caso.

Persones ci leje sur eujenetica e la leges de sterili tipal pensa ce esta es un esemplo grande de como nonmoral siensistes pote es. En realia, la leges ia es fundida sur linias de la biblia cual dise ce "simil veni de simil", la mesma linias usada oji par creistes.