Nomes derivada de verbos

De Vicipedia

Elefen ave la sufisas seguente per cambia verbos a nomes:

  • -eria
  • -or
  • -iste
  • -ador
  • -nte
  • -da

Ance, un verbo pote es usada como un nom sin ajunta un sufisa.

Locas[edita | edita la fonte]

La sufisa la plu simple es -eria. El formi la nom de un loca do la ata aveni normal:

  • escava  >  escaveria – un loca do on mina rocas e minerales
  • forja  >  forjeria – un loca do on crea ojetos metal par caldi e colpa
  • oserva  >  oserveria – un loca do on fa oservas siensal de avenis
  • primi  >  primeria – un loca do on primi libros e cosas simil

Faores[edita | edita la fonte]

Cuatro sufisas formi nomes de la faores de atas.

-or nomi un person (o un animal personida) ci fa abitual la ata:

  • anunsia  >  anunsior – un person ci fa anunsias
  • boxe  >  boxor – un person ci fa la sporte de boxe
  • canta  >  cantor – un person ci canta abitual o profesal, o un avia cual es conoseda per se canta
  • dieta  >  dietor – un person ci dieta abitual (per un periodo)

-iste es la plu comun ajuntada a un nom, per nomi un person ci ave un crede (o talento o modo de vive) ce relata a acel nom. On ajunta el ance a alga verbos per nomi un person ci fa abitual la ata de la verbo – esata como -or. Ma on fa esta sola cuando la parola con -iste es forte internasional:

  • acompania  >  acompaniste – un musiciste ci jua un strumento cuando un cantor canta
    • (Un acompanior es simple un person ci acompania acaso un otra, per esemplo un ami.)

-ador nomi un macina o util cual fa (o ce on usa per fa) un ata:

  • conteni  >  contenador – un ojeto cual on usa per conteni un sustantia
  • desnebli  >  desneblador – un aparato cual sutrae la nebla de sur un fenetra
  • escuta  >  escutador – un aparato cual on porta a se oreas per escuta privata se musica
  • rasa  >  rasador – un util con un lama con cual on sutrae capeles de se pel

-nte es derivada de la participio (un ajetivo derivada de un verbo), e pote es usada per un person ci ata en acel modo per un tempo corta, o per un cosa cual es usada per fa acel ata, ma no es un aparato o util tipal:

  • contamina  >  contaminante – un sustantia cual contamina un otra
  • covre  >  covrente – la parte alta de un ojeto cual covre el
  • desodori  >  desodorinte – un sustantia cual aida sutrae un mal odor

Ojetos e resultas[edita | edita la fonte]

-da nomi la person o cosa cual es la ojeto direta de la ata:

  • corti  >  cortida – la cosa cual on corti o ia corti
  • forni  >  fornida – un come cual on forni o ia forni
  • produi  >  produida – un cosa o sustantia cual on produi o ia produi
  • tradui  >  traduida – la testo cual on tradui o ia tradui

On pote ance reusa la verbo se mesma como un nom, sin ajunta un sufisa. La nom indica la ata (o state) se mesma:

  • aspeta  >  aspeta – la state de aspeta
    • me no gusta la aspeta de acel nubes
  • construi  >  construi – la ata de construi
    • on projeta la construi de dudes casas nova
  • nada  >  nada – la ata de nada
    • nada es bon per la sania

Ma con alga verbos, on desira nomi no sola la ojeto de la ata e la ata se mesma, ma ance un otra cosa ce relata direta a la ata. Esta otra cosa es comun la resulta de la ata. Elefen no ave un sufisa spesial per nomi resultas de atas. En loca, el reusa simple la verbo se mesma, sin sufisa:

  • corti  >  corti – la ata de corti, o la cosa plu corta cual resulta
    • "lfn" es un corti de "lingua franca nova"
  • feri  >  feri – la ata de feri, o la parte danada cual resulta
    • la soldato ia reseta un feri en se braso

La sinifia de alga verbos es tal ce sua resulta semantical es sua ojeto sintatical. Per esta verbos, on usa -da per nomi la ojeto/resulta:

  • crea  >  crea – la ata de crea
    • la crea de un lingua fasil es difisil
  • crea  >  creada – un cosa cual on ia crea
    • esta musica es un creada fea

E alga verbos es comun usada a modo nontransitiva, ma a veses on dona a los un ojeto debil cual es apena plu ce un repete de la idea de la ata se mesma. Per esemplo: "nos dansa la valsa", "el ia vive un bon vive". Per esta verbos, on evita -da:

  • dansa  >  dansa – la ata de dansa, o un stilo definida cual (= en cual) on pote dansa
    • la valsa es un dansa

La verbos es organizada en cuatro clases. Per alga verbos, on pote disputa en cual clase los debe es situada – e vera, car alga verbos ave plu ce un modo de usa, los pote trova se en plu ce un clase. Ma ave asi la scema jeneral:

numero ata ojeto resulta spesie
1 ajunta ajuntada verbos simple
2 dansa dansa verbos con ojeto debil
3 forni fornida fornida verbos con ojeto e resulta identica
4 corti cortida corti verbos con ojeto e resulta diferente

Plu esemplos de cada clase:

  1. Verbos simple
    • vide
    • leje
  2. Verbos con ojeto debil
    • canta
    • dansa
  3. Verbos con ojeto e resulta identica
    • boli
    • fonde
    • Esta inclui verbos con ojeto creada
      • crea
      • jenera
  4. Verbos con ojeto e resulta diferente
    • feri
    • dole
    • pinti
    • sculta