Maria (madre de Jesus)

De Vicipedia
Un depinta tipal de Maria, par Giovanni Battista Salvi da Sassoferrato, sirca 1640-1650

Maria ia es un fem iudi de Nasrat en la rejion de Galil en la sentenio prima ec. Lo ia es la madre de Jesus, seguente la Atesta Nova de la Biblia e la Curan. La evanjelios de Mateo e Luca en la Atesta Nova e la Curan descrive Maria como un virjin. En cristianisme, el ia consepi Jesus cuando el ia es un virjin, tra la Spirito Santa. La consepi miraclosa ia aveni cuando el ia es prometeda a Josef. Maria ia acompania Josef a Betlehem, do Jesus ia nase.

La evanjelio de Luca comensa sua nara de la vive de Maria a cuando la anjel Gabriel ia apare a Maria e ia anunsia sua eleje divin per es la madre de Jesus. Seguente la evanjelios, Maria ia es presente a la crusi e es representada como un membro de la comunia cristian temprana en Ieruxalim. Seguente la credes de la eglesas catolica e ortodox, a la fini de sua vive, sua corpo ia es direta asendeda a sielo.

Maria ia es respetada de cristianisme temprana, e es videda par miliones como la santa la plu meritosa de la relijio. El es alegada como apare miraclosa a credores a multe veses tra la sentenios. La setos ortodox, catolica, anglican, e luteran crede ce Maria, como madre de Jesus, es la Madre de Dio (elinica: Θεοτόκος). On ave alga diversia en la credes sur Maria e la modos de adora en la tradisiones variosa de cristianisme. La eglesa catolica ave dogmas distinguinte sur Maria, pd sua rol como Madre de Dio, la consepi pur de el mesma, sua virjinia eterna, e sua asende a sielo. Multe protestantes minimi la rol de Maria en cristianisme, fundida sur sua poca referes en la Biblia. Maria ave ance un rol respetada en Islam, do un de la capitoles plu longa de la Curan es sur el.