La menti grande

De Vicipedia
Jump to navigation Jump to search

La menti grande (deutx: große Lüge) es un tecnica de propaganda. La espresa ia es creada par Adolf Hitler, cuando el dita sua libro Mein Kampf (1925), sur la usa de un menti tan enorme ce nun ta crede ce algun "ta pote ave la noncortesia per contorse la veria tan malfamosa." Hitler ia crede ce la tecnica ia es usada par la iudi per culpa la defeta de Deutxland en la Gera Mundal 1 sur la jeneral deutx Erich Ludendorff, ci ia es un gidor importante en la move nasionaliste e antisemita en la Republica Weimar.

Esta ia es inspirada par la prinsipe - cual es vera en se mesma - ce en un menti grande on ave sempre un forsa de credablia; car la masa grande de un nasion es sempre plu fasil malida en la strato profonda de sua natur emosial ca consensa o volente; e donce, en la simplia primitiva de sua mentes, los cade plu pronto a un menti grande ca un menti peti, car los mesma comun dise mentis peti en casos peti, ma ta vergonia usa mentis grande

Lo no ta aveni en sua testas per fabrica falsas enorme, e los ta no crede ce otras pote ave la noncortesia per contorse la veria tan malfamosa. An si la fatos cual demostra ce esta es tal ta es clar mostrada a sua mentes, los va duta e vasila e continua ancora pensa ce cisa un otra esplica esiste. Per la menti multe noncortes va sempre lasa trasas pos lo, an pos lo ia es secur cloida, un fato cual es conoseda par tota mentores esperta en esta mundo, e par tota ci conspira con lunlotra en la arte de menti

— Adolf Hitler, Mein Kampf, vol. I, c. X

Plu tarde, Joseph Goebbels introdui un teoria cuasi diferente. El ia scrive esta paragraf en un article de 12 janero 1941, 16 anios pos la usa prima de la espresa. La article Aus Churchills Lügenfabrik ("de la fabriceria de mentis de Churchill") ia es publicada en Die Zeit ohne Beispiel:

La secreta esensal de la xefes engles no depende de intelijentia spesifiada. En loca, lo depende de testos densa e spesial stupida. La engles segue la prinsipio ce, cuando on menti, on debe menti grande, e adere a lo. Los manteni sua mentis, an con la risca de pare riable.

La espresa ia es ance usada en un reporta preparada en la gera par la Ofisia de Servi Stratejial de la SUA en descrivente la profil psicolojial de Hitler:

Sua regulas ia es: permete nunca ce la publica refresci; confesa nunca ce sua enemi pote cisa ave alga cualias bon; lasa nunca cualce spasio per alternativas; aseta nunca cualce culpa; consentra a un enemi a un ves e culpa lo per tota cual vade mal; persones va crede un menti grande plu pronto ca un menti peti; e si tu repete lo sufisinte frecuente, sufisinte persones va crede lo, pronto o plu tarde.

La menti grande continua es usada par multe moves radical, comuniste, neonazi, raziste, relijioniste, nasionaliste, etc. Lo es ance usada en comersia e mercatisme.