Jua de ganso
La Jua de la Ganso es un jua de table en cual 2 o plu juores move pesos sirca un corsa par lansa dados. La gol de la jua es la ateni de cuadro 63 ante cualce otra juor, en evita ostaculos como "la taverna", "la ponte", e "moria".
La jua orijina, posible, en la sentenio 16, e es considerada la prototipo de multe de la juas de curso comersial de Europa de sentenios plu tarda. La jua ia es juada xef en Europa e es videda como un diverti per la familia. Varias comersial ia apare en la desenios de 1880 e 1890, e ave cualias tipal de Europa vea, como un poso vea e enfantes en vestes de la periodo.
La inspira per la jua no es serta. Algas lia la jua con la Disco de Phaistos per sua forma spiral, ma espertas pensa ce la du no es probable liada. Un varia de la jua ia es donada par Francesco 1 de Medici de Firenza a Re Filipo 2 de Spania entre 1574 e 1587. En junio de 1597, John Wolfe ia nota la jua en la Stationers' Register como "la jua nova e multe plasente de la ganso".
La table es composada de un corsa con cuadros numerida en ordina (tipal 63), e es comun ordinada en un spiral con la punto de comensa a la esterna. La peso de cada juor es moveda seguente la lansas de dados. Distribuida tra la table es un cuantia de cuadros con la imaje de un ganso; fini a tal cuadro permete ce la juor move ancora par la mesma distantia. Plu vias corta, como cuadros marcada con un ponte, move la peso de la juor a alga otra cuadro. On ave ance alga cuadros de puni, cual forsa ce la juor move sua peso a retro, o la perde de un o plu turnos; la plu reconosable de estas es lo marcada par un cranio, un simbol de moria. Fini sur esta cuadro resulta en ce la juor es enviada a retro a la comensa.
Multe varias con temas ia es creada, con sujetos interesante o strana como patini, Richard Nixon, e pompas de cloaca. Estas pote es valuada per sua valua istorial o artiste, an par los ci ave no interesa en la jua mesma. Alga editas ia es vendeda per miles de dolares a subastas o esibida en museos.