Istoria temprana de Xina

De Vicipedia

Sirca 1500 aec, nos pote vide la comensa de la cuasi mital dinastia Shang (~xang). Esta ia es un rena feudal cual ia domina la basin de la rio Huanghe (conoseda en la ueste como la rio Jala), e ia institui alga sites peti, la plu de los en la area aora nomida la provinse Henan. Lo es en la dinastia Shang ce la scrive de simboles de xines ia es developada par la pretes de la dinastia.

En sirca 1000 aec, nos pote vide un dinastia nova, nomida la dinastia Zhou ueste, sentrida en Loyang, ance en cual es aora la provinse Henan. Lo es composada de multe renas feudal peti con un alia a la "re xef" o imperor. Multe de sua coere ia es la resulta de la nesesa constante per defende se contra la barbares cual ensirca los.

La dinasta Zhou este ia comensa en 770 aec. Esta periodo ia es marcada no sola par gera continuante con la barbares, ma ance un cuantia seria de gera entre la partes variosa de Xina. Cultural, la campaniores ia deveni plu valuada en esta periodo, la resulta de sua importa en gera, e la clase de mercatores ia deveni plu importante. Lo es esta periodo cual ia introdui mone.

La teritorios de la dinastias de Xina, tra tempo

En esta dinastia, alga de la filosofistes la plu sinifiante ia apare. Kongzi (551-479 aec) ia introdui confuzisme, un filosofia cual combina etica con tradisiones relijiosa, un filosofia cual ta domina la strutur de politica xines asta la sentenio 20.

A sirca la mesma tempo, nos pote vide ance Laozi introduinte un varia plu sofistica de la adora de natur tradisional nomida dauisme, en un de la libros la plu importante sempre scriveda, la Dau de jing ("libro de la via virtuosa"). En ce confuzisme ta es la filosofia formal de la corte alta, dauisme ta influe ultima e profonda la budisme introduida plu tarda.

De 403 a 221 aec, Xina ia es fendeda entre un cuantia de statos gerante. En 221 aec, la dinastia Qin (~txin) ia institui sua rena. Qin ia es un stato a la frontera a la ueste de la sentro presedente de sivilia xines, e nos ia deriva la nom "Xina" de sua dinastia. La Qin ia institui un stato multe sentrida, longo la mesma modo de la Impero Roman, e lo ia normi mesuras, pesas, e mone. Lo ia es ance en esta eda ce la construi de la Mur Grande de Xina ia comensa, como un atenta per esclui la hunes - la mesma popla ca ta menasa la Impero Roman plu tarda.

De 206 aec a 9 ec, nos pote vide la dinastia Han ueste. Han ia es un rena sude de la rena Zhou, ancora en cual es aora Henan. La dinastia Han ia vinse la hunes en sirca 100 aec (cual ia forsa los en la dirije de Europa), e ia estende sua teritorio a la ueste. Los ia institui ance la Vias de Seda famosa, vias a Asia ueste usada per comersia con Persia, Europa, e India. La majoria de persones en Xina vide se como parte de la popla han.

De 25 a 220 ec, la dinastia Han este ia prende controla, e ia introdui un flori grande de sua sivilia. Comersia con la Impero Roman e otras en seda e porselana ia buma. Paper ia es inventada sirca 100 ec, e budisme ia comensa influe Xina de India norde-ueste e la rena elinica de Bactria (parte de cual es aora Afganistan) par la Vias de Seda.

De 220 ec, nos ave la periodo de tre renas, segueda par un periodo en cual Xina ia es divideda entre imperos separada norde e sude. La norde ia es invadeda par un combina de tribus de hunes e turcicas, en cuando la sude ia entra un serie de cambias dinastial. En 379 ec, budisme mahaiana ia deveni la relijio ofisial, vivente armoniosa con confuzisme e fusante con dauisme.

Xina ia es reunida en 581 ec su la dinastia Sui, la politicas de cual ia es adotada en 617 par la [[dinastia Tang]. Notable en esta periodo, la sistem de esaminas de la servi sivil ia es instituida en 606 ec. Esta sistem ta continua asta cuando la comunistes prende controla en 1951. La dinastia Tang ia dura asta 907 ec.

La sentenio de 900 ec ia es un periodo de cambias rapida de dinastias, e nos pote vide un reversa de la fortunas de la budistes, ci ia es persegueda ativa. En 960 ec, la dinastia Song norde ia furni alga stablia, sola par paia tribui a la mongoles, ma ia developa un renase du de cultur e economia. En esta periodo, la lingua xines ia es ordinada par Zhu Xi, filosofiste e profesor (1112-1200 ec), leteratur, depinta, e porselana ia flori, e primi e polvo negra ia es inventada.

En 1196, Txingis Han ia deveni la renor suprema de la mongoles e sua alias turces, e ia prosede condui los en Xina, prendente Beijing en 1215, instituinte la dinastia Yuan. A la mesma tempo, el ia envia sua soldatos a ueste tan distante como Polsca e Magiar. Cuando el ia mori en 1227, sua impero ia es fendeda entre alga partes plu peti, renada par sua fios variosa. La mongoles ta continua rena la stepes tra la sentenio de 1400, asta Ivan 3 ia libre Moscva sola en 1480!

Marco Polo, un aventuror venezian, ia visita Xina en esta periodo, e ia reveni con naras de ricia cual ta resulta en la benes xines deveninte tan valuada en Europa ca los ia es en la Impero Roman. Triste, en 1325 Xina ia sufri de un de sua famion la plu grande, cual ia mata 8 milion de sua popla de 45 milion.

En 1368, la mongoles ia es forsada estra Xina, e la dinastia Ming ia comensa. Lo ia ave un governa forte sentrida, fundida sur prinsipes confuziste solida. La capital ia es moveda a Beijing en 1421, do lo ta resta asta aora. La Mur Grande ia es estendeda a 2450 km.

La dinastia Ming ia produi un otra renase, con novelas, mapas, arciteta grande, porselana, e un tecnica medical nova nos nomi agopuntur. A la otra lado, los no desira multe interata con la mundo ultra la impero: comersia european ia es limitada a la colonia portuges de Macau.

De 1644 a 1911, Xina ia es renada denova par barbares, esta ves la mandju de Mandju de Xina norde-este. La mandjus, con un popla limitada, ia es ansiosa per usa la strutures esistente de burocratia xines, e ia misca se con la popla nativa tan multe como posible. Vera, sua dinastia Qing ia vide la crese en popla la plu grande en istoria, e estendeda la impero a sua estende aora. A la comensa, los ia coraji comersia con la europeanes, ma plu tarda ia clui la impero de la esterna. Como tota conose aora, la europeanes es rara impedida cuando un mercato tan grande apare a la orizon, e la imperos colonial - spesial la Impero Brites - ta ageti a la gloria cual ia es Xina.