Aitian (gramatica)

La creol aitian ave un gramatica multe simple. La vocabulo de aitian es per la plu parte de franses, ma la gramatica es simil a la gramatica de otra creoles e pijines tra la mundo.

Pronomes

Lo ave ses pronomes, un per cada combina de person e cuantia, e ave no difere entre la ojeta direta e nondireta.

person/cuantia	Creol	Forma corta	Franses	Elefen
1 singular	mwen	m	je, me, moi	me
2 singular	ou *	w	tu, te, vous	tu
3 singular	li	l	il, elle	el, lo
1 plural	nou	n	nous	nos
2 plural	nou, ou **		vous	vos
3 plural	yo	y	ils, elles	los

* alga veses on scrive ou como w.

** varia con la situa.

Posese

Posese es indicada par pone la posesor pos la cosa posesada. Esta es simil a la construi franses "chez moi" o "chez lui" (me casa, sua casa).

Aitian	Elefen
lajan li	sua mone
fanmi mwen, fanmi m	mea familia
kay yo	sua casa(s)
papa ou, papa w	tua padre
chat Pyè a	la gato de Petro
chèz Mari a	la seja de Maria
zanmi papa Jan	la ami de la padre de Joan
papa vwazen zanmi nou	la padre de la visina de nosa ami

Articles

Aitian ave un article de nondefini yon, simil a un en elefen. El es derivada de la franses il y a un ("el ala ave un" o "ave un"). Esta es usada sola con nomes nonplural, e el es poneda ante la nom.

Aitian	Elefen
yon kouto	un cotel
yon kravat	un cravata

Aitian ave ance un article de defini, simil a elefen "la". El es poneda pos la nom, e la sona varia dependente a la sona final de la nom. Si la sona final es un vocal segueda par un consonante, ambos nonasal, la article es la.

Aitian	Elefen
kravat la	la cravata
liv la	la libro
kay la	la casa

Si la sona final es un vocal nasal segueda par un consonante nonasal, la article es lan.

Aitian	Elefen
lanp lan	la lampa
bank lan	la banco

Si la sona final es un consonante segueda par un vocal, ambos nonasal, la article es a.

Aitian	Elefen
kouto a	la cotel
peyi a	la pais

Si la sona final es un consonante nasal segueda par un vocal nonasal, la article es an.

Aitian	Elefen
fanmi an	la familia
mi an	la mur

Si la sona final es un vocal nasal, la article es an.

Aitian	Elefen
chien an	la can
pon an	la ponte

E si la sona final es un consonante nasal, la article es nan.

Aitian	Elefen
machin nan	la auto
telefòn nan	la telefon
madanm nan	la fem

La plural de un nom no es indicada par cambia la nom. En loca, on ajunta yo pos la nom, cual indica ambos pluralia e defini, como "la ...-s" en elefen. Pluralia no es indicada per nomes nondefini, e pote es deduida par la situa.

Aitian	Elefen
liv yo	la libros
machin yo	la autos
Fi yo mete wòb	La fias pone roba(s)

Aitian ave sola un parola - sa - ce coresponde a la parolas franses "ce", "ceci", e "ça", e la parolas de elefen "esta" e "acel". Sa es comun seguente par a o yo per marca la cuantia.

Aitian	Elefen
Jaden sa (a) bèl	Esta jardin es bela

Como "esta" en elefen, sa pote es ance usada como un pronom.

Aitian	Elefen
Sa se zanmi mwen	esta es me ami
Sa se chien frè mwen	esta es la can de me frate

Verbos

Multe verbos en aitian es la mesma como la verbos infinitivo de franses, ma los es speleda fonetical. Verbos en aitian ave sola un forma e cambias de tempo, etc, es fada par la uso de paroletas.

Aitian	Elefen
Li ale travay le maten	El vade labora a la matina
Li dòmi le swa	El dormi a la sera
Li li Bib la	El leje la Biblia
Mwen fè manje	Me prepara la come
Nou toujou etidye	Nos studia sempre

"Es" es espresada en aitian par du parolas - se e ye. Se es usada per junta un sujeto con un completante.

Aitian	Elefen
Li se frè mwen	El es me frate
Mwen se yon doktè	Me es un doctor
Sa se yon pye mango	Acel es un arbor mango
Nou se zanmi	Nos es amis

La sujeto sa o li pote es ometeda a alga veses cuando usada con se.

Aitian	Elefen
Se yon bon ide	Acel es un bon idea
Se nouvo chemiz mwen	Esta es me camisa nova

Per indica la futur, on usa vin - "deveni" - en loca de se.

Aitian	Elefen
L ap vin bòfrè m	El va es me frate par sposi
Mwen vle vin yon doktè	Me vole deveni un dotor
Sa ap vin yon pye mango	Acel va deveni un arbor mango
N ap vin zanmi	Nos va es amis

Ye sinifia ance "es", ma es usada sola a la fini de frases, pos la verbo e la sujeto, en esta ordina.

Aitian	Elefen
Ayisyen mwen ye = Mwen se Ayisyen	Me es aitian
Ki moun sa ye?	Ci es acel?
Kouman ou ye?	Ci tu es?

On no usa un verbo per "es" cuando la completante es un ajetivo. La ajetivo es usada como un verbo. Donce malad sinifia ambos "malada" e "es malada".

Aitian	Elefen
M gen yon zanmi malad	Me ave un ami malada
Zanmi mwen malad	Me ami es malad

La verbo "ave" es genyen, comun cortida a gen. Lo pote ance sinifia "gania".

Aitian	Elefen
Mwen genyen lajan nan bank lan	Me ave mone en la banco
Mwen genyen match la	Me ia gania la max

Esta verbo indica ance la esiste de alga cosa, como "on ave" en lfn.

Aitian	Elefen
Gen anpil Ayisyen nan Florid	On ave multe aitianes en Florida
Gen yon moun la	On ave algun asi/ala
Pa gen moun la	On no ave algun asi/ala

(nota pa sinifia "no")

Konn o konnen sinifia "conose".

Aitian	Elefen
Èske ou konnen non li?	Esce tu conose sua nom?
M pa konnen kote li ye	Me no conose do el es

Konn - ma no konnen - sinifia ance "sabe".

Aitian	Elefen
Mwen konn fè manje	Me sabe coce (leteral: "me sabe fa come")
Èske ou konn ale Ayiti?	Esce tu ia vade a Aiti? (leteral: "Esce tu sabe como vade a Aiti?")
Li pa konn li fransè	El no pote leje franses (leteral: El no sabe leje franses)

Fè sinifia "fa". El ave multe sinifias simil e es usada en multe frases idiomal.

Aitian	Elefen
Kouman ou fè pale kreyòl?	Como tu ia aprende parla aitian? (leteral: "Como tu ia fa parla aitian?")
Mari konn fè mayi moulen	Maria sabe como fa gaxa de mais

Kapab (comun cortida a ka, kap, o kab) sinifia "pote".

Aitian	Elefen
Mwen ka ale demen	Me pote vade doman
Petèt m ka fè sa demen	Posable me pote fa acel doman

Tempo

Verbos en aitian no cambia per tempo o otra formas. On usa sola un forma con paroletas variosa. La forma simple es usada per ambos la presente e la pasada.

Aitian	Elefen
Mwen pale kreyòl	Me parla creol
Mwen manje	Me ia come

(Nota ce manje es usada como "come" en elefen - per ambos la ata e la cosa. m ap manje bon manje sinifia "me come bon come")

Per otra tempos, on usa parolas spesial ante la verbo.

Paroleta	Tempo	Comentas
te	pasada simple/pasada perfeta
tap (o t ap)	pasada continuante	un ajunta de te e ap
ap	presente continuante	con ap e a (a su), la pronomes deveni corta - m ap, l ap, n ap, y ap, etc.
a	futur	con alga limitas de usa
pral	futur prosima o esata	tradui como "vade"
ta	futur dependente	un combina de te e a

Tempo	Aitian	Elefen
Pasada simple/pasada perfeta:	Mwen te manje	Me ia come Me ia come ja
Pasada continuante:	Mwen t ap manje	Me ia es comente
Presente continuante:	M ap manje	Me es comente
Presente continuante (con "aora"):	M ap manje kounye a	Me es comenta aora
m'ap usada per futur:	M'ap manje apres mwen priye Mwen m'ap di sa	Me va come pos me prea Me no va dise acel
Futur prosima o esata:	Mwen pral manje	Me va come pronto
Futur:	N a wè pita	Nos va vide tu plu tarde

Otra esemplos:

Aitian	Elefen
Mwen te wè zanmi ou yè	Me ia vide tu ami ier
Nou te pale lontan	Nos ia parla longa
Lè li te gen uit an...	Cuando el ave oto anios...
M a travay	Me va labora
M pral travay	Me vade labora
N a li l demen	Nos va leje el doman
Nou pral li l demen	Nos va vade leje el doman
Mwen t ap mache e m wè yon chyen	Me ia es pasea e me ia vide la can

Otra paroletas per tempo inclui fèk e sòt, ce indica la pasada resente. Estas es usada comun la un con la otra:

Aitian	Elefen
Mwen fèk sòt antre kay la	Me veni de entra la casa

Un paroleta de moda es ta, simil a "ta" en elefen, e egal a la moda ipotesal en franses:

Aitian	Elefen
Yo ta renmen jwe	Los ta vole jua
Mwen ta vini si mwen te gen yon machin	Me ta veni si me ta ave un auto
Li ta bliye w si ou pa t la	El ta oblida tu si tu no ta es asi

La parola pa vade ante la verbo e otra paroletas per nega la verbo:

Aitian	Elefen
Woz pa vle ale	Rosa no vole vade
Woz pa t vle ale	Rosa no ia vole vade

Gramaticas

Aitian • Arabi • Catalan • Deutx • Elefen • Engles • Espaniol • Esperanto • Franses • Goto • Interlingua • Italian • Latina • Ositan • Romanian • Rumans • Rusce • Tibetan • Xines