Fem

Greve Internasional de Femes, Parana, Arjentina, 2019

Un fem es tradisional definada como un umana fema e matur, pd no un enfante, ma la borda entra un adulte e un adolesente es comun nonserta. En biolojia, un fem es un umana con la organos de seso fema, cual es nesesada per la conseti e pare de enfantes. En ajunta, un fem tipal ave otra cualias fisical, como senos, per nuri enfantes e per atrae un amor.

An si la sinifia biolojial es un realia, los no es nesesada en tota casos. Alga omes ia ave tratas medical, incluinte sirurjia, per deveni, a min esterna e en situas sosial, un fem. Cultures moderne tende aseta los como femes, an si multe cultures e individuas no acorda. Otra persones es "interseso", pe es naseda con cualias fisial de seso cual no conveni un jenero o la otra. Jeneral, los eleje vive (o, tipal, la jenitores eleje per los) como un om o fem e, denova, en cultures moderne, los es asetada como los presente se.

En developa fetal temprana, embrios de ambos jeneros apare neutral. La apare neutral es plu prosima a la fema ca la mas. Un feto tipal developa como un mas si lo es esposada a un cuantia sinifiante de testosterona (tipal car la feto ave un cromosoma Y, eritada de la padre). En la otra caso, la feto tipal developa com un fema, e tipal car el ave un cromosoma X de la padre, o si la padre ia contribui no un X e no un Y. Plu tarde, a maturi sesal, estrojen femi un fem joven, e el reseta la cualias sesal de un fem adulte.

Promoves declara egalia de oportunia per ambos jeneros e diretos egal sin regarda a jenero. Par un combina de cambias economial e la efortas de la promove femiste, en la desenios resente, femes en multe sosias ave aora asede a careras ultra la roles tradisional de "sposa e madre". Ma plu bonis resta nesesada.