Evenci (lingua)

De Vicipedia
Jump to navigation Jump to search
Un familia estendeda de evencis, sirca 1900

Evenci (nomida "tungus" en la pasada; ance nomida "solon") es la membro la plu grande de la grupo norde de la linguas tungusica, un grupo cual inclui ance even, negidal, e orocen. Lo es parlada par la popla evenci en Rusia e Xina.

En alga areas la influes de la linguas iacut e buriat es spesial forte. La influe de rusce es jeneral enorme: en 1979, 75.2% de la evencis ia parla rusce, e la persento ia crese a 92.7% en 2002. Enfantes evenci ia es forsada aprende rusce a la scolas abitada soviet, e ia reveni a sua casas con un capas povre per parla sua lingua nativa. La lingua evenci varia multe entre sua dialetos, cual es divideda entre tre grupos grande: la dialetos norde, sude, e este. Estas es plu divideda entre dialetos minor. Un sistem de scrive ia es creada per la evencis en la Uni Soviet en 1931, prima usante la alfabeta latina, e en 1937, la alfabeta cirilica. En Xina, evenci es scriveda en la alfabeta mongol, como un esperimenta. La lingua es jeneral considerada como perilida.

Evenci es multe aglutinante, usante sufisas, no flexes. Cada morfem es clar reconosable e porta sola un peso de sinifia. Pronomes distingui entre singular e plural, e inclui formas incluinte e escluinte de "nos". Evenci ave un sistem de casos grande, con 13 casos (an si on ave alga varias entre la dialetos), e es un lingua con un sistem nominativa-acusativa. Lo difere entre posese alienable e nonalienable (pd per ojetos cual es o no es separable de la sujeto).