Developa de lingua

De Vicipedia
Jump to navigation Jump to search

Seguente C. G. Boeree, lingua ia comensa con un asosia simple de alga vosis con ojetos ("can"), atas ("vade"), e cualias ("calda"). Enfantes ia aprende esta asosias de sua jenitores, en loca de inventa un vocabulo nova en cada jenera. Ma de cuando la idea de asosia ia es realida, lo es probable ce la cuantia de esta "proto-parolas" ia crese rapida.

Posible, alga pronomes ia es creada a esta eda ance: "me", "tu", "acel", "esta". Los es posible derivada de jestis.

Alora, simil a enfantes moderna, la umanas primitiva ia comensa junta du vosis con lunlotra: "can vade", "can grande", "oso (de) can", etc. E alora, la cadena de vosis ia crese a tre: "me vide can", "can grande vade", etc. Ma la forma sola de sintatica ia es la ordina simple de la parolas, probable en la ordina de importa. Lo es ance probable ce esta ia es la state de lingua per multe milenios.

Esta ia developa probable temprana en nosa evolui, ante Homo sapiens, e no ia nesesa alga partes spesialida de la serebro, an si, serta, lo ia envolve la cortex de oia e la areas de move cual controla la vosi.

La tradui de la mundo persepida, con se complicadas multidimensional, a un grupo linial de vosis ia causa ce areas spesialida de la cortex deveni multe vantajosa, e donce umanas ia comensa difere la area de Wernicke e la area de Broca de la cortexes de oia e ata. Lo pare ce la spesiali ia aveni en sola un lado de la serebro, posible car sola un lado es nesesada, e la otra pote es retenida per sua roles orijinal. Cuando lingua ia deveni un parte plu e plu importante per survive e reprodui, la spesiali de la cortex ia es elejeda natural.

Tra la edas, umanas ia inventa sintatica vera en la forma de segues fisada de parolas: sujeto-ojeto-verbo, posible, con ajetivos e indicas de posese ante la nomes e, cuando los ia ariva, la usa de posposadas en loca de preposadas. Egal posible, los ia prefere sujeto-verbo-ojeto, con ajetivos e indicas de posese pos la nomes, e preposadas en loca de posposadas. O, posible, alga grupos de umanas ia adota sua segues prefereda unica.

Alora, parolas comun ia comensa es usada como paroletas con sinifias plu astrata. Per esemplo, "testa" ia pote es usada per "alta", "supra", o "sur", e "segue" per "pos", etc. Un parola como "fini" ia pote es usada per la forma pasada perfeta de la verbo. Esclamas ia pote deveni otra paroletas. Per esemplo, "eh?" ia pote es usada per indica demandas. Alga ajetivos ia pote es usada per cuali verbos o an otra ajetivos, e no sola nomes. On pote vide restas de esta metodo en alga linguas moderna.

Alga de esta paroletas ia deveni juntada a la parolas plu importante en la forma de cliticos, afisas, o an infletas. La sintatica e la morfolojia usada par la jenitores ia es comunicada a la enfantes par esemplos, e alora la enfantes ia estende esta esemplos par jenerali la regulas per comparti situas e nesesas nova.

Plu tarde, umanas ia inventa la idea de envolve un frase en un otra, e la usa de paroletas spesial como "cual", "ce", "si", "car", etc. Estas revela ancora se orijin en parolas con sinifias relatada. E los ia reconose ce on pote usa pronomes per lia la atores en esta proposas.

Ultima, nos ia developa parolas e modos per combina parolas per espresa ideas astrata, e per usa esta parolas nova per crea teorias plu e plu complicada sur la mundo e nos mesma. Con sintatica, morfolojia, proposas, e astratas, la grandia de la serebro ia deveni plu e plu importante como un determinante de survive e reprodui, e la umanas moderna ia es a la via vera a sivilia.

Esce un sola "lingua madre" ia esiste de cual tota otras ia desende? Probable no. La idea de comunica con vosis ia debe estende como un foco savaje entre nosa asendentes Homo, e ia es continuada par nosa asendentes Homo sapiens, ci alora ia elabora la idea per crea lingua vera. La tribus ia separa repetente de lunlotra, e migra repetente a distante de lunlotra, e a cada separa e migra, sua linguas cambia e comensa difere plu e plu. Si on ave limitada comunica de un otra tribu, car lo es miliones de cilometre a via o car lo es en la vale a la otra lado de un cadena de montes o un rio perilosa, ultima sua lingua e la lingua de la otra tribu ta difere de lunlotra, posible a un grado cual preveni cualce comunica, an si la du tribus ta recomensa interata.

La idea ce nosa asendentes ia comparti un sola lingua es multe interesante, an romantica. Multe linguistes (a amatores) ia atenta reconstrui un lingua o colie de linguas de nosa asendentes orijinal, ma lo es multe clar ce vide plu ca 10,000 anios es tan distante pote nos pote ateni.