Clases sintatical de parolas

De Vicipedia
Jump to navigation Jump to search

Parolas pote es clasida en modos varios. Linguistes clasi comun parolas en du clases: la clase abrida e la clase cluida. La clase abrida es multe grande pote aseta multe parolas nova. La clase cluida es plu peti e plu stable e no aseta fasil parolas nova.

La clase abrida[edita | edita la fonte]

La clase abrida inclui nomes, verbos, ajetivos, e averbos:

Nomes (o sustantivo) indica tipal ojetos fisical como persones, locas, e cosas – ma nomes pote indica ance consetas plu astrata ce es gramatical simil. Comun, on introdui un nom con determinantes, e pote segue el con ajetivos, formulas de preposada, e proposas ajetival.

Verbos sinifia tipal avenis (“pluve”), atas e la sesa de atas ("core", "para"), relatas ("ave", "perde"), o states ("sta", "fonde"). Verbos es comun alterada per indica person, tempo, moda, aspeta, etc. El pote es alterada par averbos, formulas de preposada, e proposas averbal.

Ajetivos es parolas ce altera la sinifia de nomes. Ajetivos indica tipal la cualias de la persones o cosas indicada par nomes.

Averbos es parolas ce descrive cuasi cualce otra cosa, per esemplo verbos, ajetivos, otra averbos, determinantes, preposadas, formulas varios, e an frases completa. Usual, averbos informa sur locas, tempos, situas, causas, o maneras. Averbos es tipal la mesma como, simil a, o derivada de ajetivos.

Esclamas (o interjetas) es parolas ce indica la emosias de la parlor o scrivor.

La clase cluida[edita | edita la fonte]

La clase cluida inclui determinantes, preposadas, juntas, e paroletas:

Determinantes es parolas ce descrive nomes par espresa la referes de la nom, incluinte identia e cuantia. Esemplos de determinantes comun inclui tota, la, un, esta, acel, ce, cual. Determinantes pote ance inclui ajetivos de posese. Un otra grupo de determinantes es parolas ce indica cuantia, como "multe", "poca" e numeros.

Preposadas introdui formulas de nom, e formi un formula de preposada. Tipal, un formula de preposada descrive un nom, pronom, ajetivo, o averbo presedente – o el pote descrive un frase intera. La preposada indica como la formula de nom relata a la strutur ce conteni el: el mostra la rol ce el ave en la descrive. Multe linguas ave posposadas en loca de preposadas.

Juntas es parolas ce lia du cosas la un a la otra. Ave du spesies: conjuntas e sujuntas. Un conjunta lia du composantes de la mesma spesie, per produi un composante plu grande de esta spesie. Per esemplo, du formulas nomal juntada par e produi un formula nomal plu grande. Un sujunta lia un suproposa a la frase conteninte, indicante la rol de la suproposa en la frase.

Paroletas (o particulas) inclui parolas varios ce no conveni fasil en la otra clases. El inclui parolas ce indica tempo, aspeta, moda, e vos de verbos, grados de ajetivos e averbos, e parolas como "no" e "si".